ប្រទេសវេណេស៊ុយអេឡា ៖ ទីប្រឹក្សាសន្តិសុខជាតិអាមេរិកលោក JOHN BOLTONកាលពីថ្ងៃទី៥ សីហា បានបដិសេធរាល់ការចូលរួមរបស់រដ្ឋាភិបាលអាមេរិក ក្នុងការប៉ុនប៉ងធ្វើឃាតប្រធានាធិបតីវេណេស៊ុយអេឡា លោកនីកូឡាស់ម៉ាឌូរ៉ូ កាលពីយប់ថ្ងៃទី៤ សីហា នៅទីក្រុងការ៉ាកាស់។
តាមកម្មវិធីទូរទស្សន៍ FOX NEWS SUNDAY លោកBOLTONថ្លែងថា ខ្ញុំអាចអះអាងគ្មានការរារែកថា ពុំមានការលូកដៃណាមួយរបស់រដ្ឋាភិបាលអាមេរិក ក្នុងរឿងនេះឡើយ។ លោកបញ្ជាក់ថា លោកបានពិភាក្សាជាមួយអ្នកទទួលបន្ទុក បេសកកម្មការទូតអាមេរិកក្នុងទីក្រុងការ៉ាកាស់ ហើយបញ្ជាក់ថា ពុំមានជនជាតិអាមេរិកណាម្នាក់ជាប់ទាក់ទិនឡើយ។
កាលពីយប់ថ្ងៃទី៤ សីហា នាឱកាសនៃការថ្លែងសុន្ទរកថាមួយរំលឹកខួបលើកទី៨១នៃការបង្កើតកងឆ្មាំជាតិវេណេស៊ុយអេឡា លោកម៉ាឌូរ៉ូ គេចផុតពីគ្រោះថ្នាក់នៃការប៉ុនប៉ងវាយប្រហារដោយ DRONES បំពាក់គ្រឿងផ្ទុះ។ បន្ទាប់ពីនេះបន្តិចលោកម៉ាឌូរ៉ូ បានចាត់ទុកការវាយប្រហារនោះថា ជាស្នាដៃបណ្ដាក្រុមស្ដាំនិយមជ្រុលវេណេស៊ុយអេឡា របស់រដ្ឋាភិបាលកូឡុំប៊ី និងពួកមនុស្សដែលរស់នៅសហរដ្ឋអាមេរិក។
នាថ្ងៃទី៥ សីហា រដ្ឋមន្ត្រីមហាផ្ទៃវេណេស៊ុយអេឡា ប្រកាសថា រហូតមកទល់ពេលនេះភេរវករ៦នាក់ត្រូវបានចាប់ខ្លួន។ រដ្ឋមន្ត្រីរូបនេះលោកណេស្ទ័ររេវេរ៉ូលអះអាងថា ភេរវករ៦នាក់ចាប់ខ្លួនរួចរថយន្តច្រើនគ្រឿងរឹបអូស ពេលមានការឆែកឆេរតាមសណ្ឋាគារនានានៃរដ្ឋធានី ដែលភស្ដុតាងជាក់ស្ដែងទាំងឡាយត្រូវបានរកឃើញ។ ពួកអ្នកអនុវត្តផ្ទាល់និងពួកអ្នករៀបចំផែនការវាយប្រហារ ទាំងក្នុងនិងទាំងក្រៅប្រទេស កំណត់ដឹងអត្តសញ្ញាណអស់ហើយ រួចការចាប់ខ្លួនមនុស្សឯទៀតៗនឹងមាននាប៉ុន្មានម៉ោងខាងមុខ។
ការវាយប្រហារធ្វើដោយ DRONES ២គ្រឿងដោយ១គ្រឿងៗបំពាក់គ្រឿងផ្ទុះយោធា C4 មានកម្លាំងខ្លាំង១គីឡូក្រាម អាចបង្កការខូចខាតក្នុងរង្វង់៥០ម៉ែត្រ។ DRONE មួយហោះសំដៅវេទិកាតែឧបករណ៍រំខាន ធ្វើឲ្យវាងាកចេញពីទិសដៅ ទើបការផ្ទុះកើតមានក្រៅរង្វង់គ្រោងទុក៕
ចែករំលែកព័តមាននេះ