ប្រទេសស្វ៊ីស ៖ មនុស្ស២០នាក់ស្លាប់ដោយសារការធ្លាក់យន្តហោះយោធាមួយដែលប្រមូលទុក (យន្តហោះចាស់ៗសម័យសង្គ្រាម) ពេលវាហោះបុកភ្នំមួយនាខាងកើតស្វ៊ីស។ នោះជាគ្រោះថ្នាក់អាកាសលើកទី៣ ក្នុងប្រទេសនេះរយៈពេលតែ៨ថ្ងៃ។
គ្រោះថ្នាក់នោះកើតមានកាលពីរសៀលថ្ងៃទី៤ សីហា នៅខេត្ត GRISONS ដោយក្នុងចំណោមមនុស្សទាំង២០នាក់ ស្ថិតក្នុងយន្តហោះនេះដែលមានអ្នកដំណើរ១៧នាក់ និងសមាជិកក្រុមយានិក៣នាក់ ពុំមាននរណាម្នាក់នៅរស់រានមានជីវិតឡើយ។
ក្នុងសន្និសីទសារព័ត៌មាននាជើងភ្នំ PIZ SEGNAS កន្លែងយន្តហោះធ្លាក់ អ្នកនាំពាក្យប៉ូលិសខេត្តលោកស្រី ANITA SENTI ថ្លែងនាថ្ងៃទី៥ សីហាថា ប៉ូលិសប្រាកដដែលមនុស្ស២០នាក់ស្លាប់។ ហើយយន្តហោះធ្លាក់ជាយន្តហោះម៉ាស៊ីន៣ធុន JUNKERS JU52 HB-HOT ផលិតកាលពីឆ្នាំ១៩៣៩ នៅអាល្លឺម៉ង់ ជារបស់ក្រុមហ៊ុន JU-AIR បង្កើតឡើងកាលពីឆ្នាំ១៩៨២ ដោយបណ្ដាមិត្តភក្ដិរបស់កងទ័ពអាកាស ដែលចង់បន្តការហោះហើរយន្តហោះធុននោះ៣គ្រឿងដែលកែប្រែថ្មីដោយកងទ័ពអាកាសស្វ៊ីស។
ប៉ូលិសនិយាយថាយន្តហោនេះដឹកបុរស១១នាក់ និងនារី៩នាក់ ក្នុងនោះមានប្ដីប្រពន្ធជនជាតិអូទ្រីស និងកូនប្រុសពួកគេ។ ពួកអ្នកដំណើរវិលត្រឡប់ពីការដើរកម្សាន្តទេសចរណ៍នៅ LOCARNO ជាទីក្រុងមួយនាភាគខាងត្បូងស្វ៊ីស ជាប់មាត់បឹង MAJEUR ជាកន្លែងពួកគេទៅកាលពីព្រឹកថ្ងៃទី៣ សីហា។ ពួកគេត្រូវវិលមកកាន់ព្រលានយន្តហោះយោធា DUBENDORF ជិតក្រុង ZURICH មុនម៉ោង១៧ ថ្ងៃទី៤ សីហា។
យន្តហោះបានធ្លាក់ដោយបុកចង្កេះភ្នំ PIZ SEGNAS ប៉ែកខាងលិចត្រង់កម្ពស់២.៥៤០ម៉ែត្រ៕
ចែករំលែកព័តមាននេះ