រាជធានីភ្នំពេញ ៖ មន្ត្រីជាន់ខ្ពស់នៃអគ្គនាយកដ្ឋានកសិកម្ម បានឱ្យដឹងថា កម្ពុជាអាចនាំចេញចេកអំបូងលឿងទៅកាន់ប្រទេសចិនដោយផ្ទាល់យ៉ាងយូរនៅចុងឆ្នាំ២០១៨នេះ បន្ទាប់ពីភាគីទាំងពីរបានចុះហត្ថលេខាលើពិធីសារកាលពីថ្ងៃទី២ សីហា រួចមក ។
ប្រាប់ក្រុមសារព័ត៌មានក្នុងពិធីចុះហត្ថលេខាលើពិធីសារ ស្ដីពីលក្ខខណ្ឌតម្រូវភូតគាមអនាម័យ សម្រាប់នាំចេកកម្ពុជាទៅកាន់ប្រទេសចិន ដែលធ្វើឡើងនៅទីស្តីការក្រសួង លោកបណ្ឌិត ហ៊ាន វណ្ណហន អគ្គនាយកកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា បន្ទាប់ពីកម្ពុជា-ចិន ចុះហត្ថលេខានៅថ្ងៃនេះរួចហើយ លោករំពឹងថា នៅចុងឆ្នាំនេះ កម្ពុជាអាចនាំចេញចេកអំបូងលឿងទៅប្រទេសចិន ព្រោះបែបបទ និងការតាំងចិត្តរបស់អគ្គនាយកដ្ឋានកសិកម្ម ដែលជាសេនាធិការរបស់ក្រសួងកសិកម្ម នឹងខិតខំប្រឹងប្រែងធ្វើយ៉ាងណាឱ្យបានលឿនបំផុត ។ លោកបណ្ឌិតបញ្ជាក់ថា ៖« យើងត្រូវការពេល២ឬ៣ខែទៀត ដើម្បីឱ្យខាងកសិដ្ឋានធំៗដែលមានដាំចេក មកទំនាក់ទំនងជាមួយអគ្គនាយកដ្ឋានកសិកម្ម ហើយយើងនឹងណែនាំ រៀបចំធ្វើម៉េច ឱ្យការដាំដុះរហូតដល់ពេលប្រមូលផល និងការវេចខ្ចប់ គោរពទៅតាមអនុលោមភាពជាមួយលក្ខខណ្ឌដែលបានកំណត់ក្នុងពិធីសារ » ។
បើតាមអគ្គនាយកកសិកម្ម កម្ពុជាទើបតែនឹងមានចេក ហើយប្រភេទចេកដែលធ្វើការនាំចេញនោះ វាមិនមែនដូចចេកណាំវ៉ា ចេកពងមាន់ ឬចេកអំបូងខៀវនោះទេ វាជាពូជចេកដែលធន់នឹងការដឹកជញ្ជូន និងអាចទុកដាក់បានយូរ ដែលនៅលើពិភពលោក គេនិយមចេកអំបូងលឿងនេះ ។ លោកបណ្ឌិតបន្តថា ៖« មកដល់ពេលនេះ យើងពង្រីកផ្ទៃដីបាន៥ពាន់ហិកតា ហើយផ្ទៃដីកសិដ្ឋានទាំងអស់នោះកំពុងតែពង្រីកបន្តទៅទៀត ដោយក្នុង១ឆ្នាំ យើងអាចប្រមូលផលបាន៣០ម៉ឺនតោនសម្រាប់នាំចេញ » ។
ឯកអគ្គរដ្ឋទូតចិនប្រចាំកម្ពុជា លោក ស្យុង ប៉ បានមានប្រសាសន៍ថា ពិធីសារចុះហត្ថលេខានៅថ្ងៃនេះ នឹងបានបើកទ្វារសម្រាប់ការនាំចេញចេករបស់កម្ពុជាទៅកាន់ទីផ្សារប្រទេសចិន ដើម្បីឱ្យអតិថិជននៅប្រទេសចិនបានពិសាចេកដាំនៅកម្ពុជា ។ លោកថា ៖« សម្រាប់ខ្លួនខ្ញុំផ្ទាល់ ខ្ញុំស្រឡាញ់ និងចូលចិត្តផ្លែឈើដាំនៅប្រទេសកម្ពុជា ហើយយើងនឹងជំរុញឱ្យកសិផលកាន់តែច្រើននាំចេញទៅលក់នៅប្រទេសចិន »។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កម្ពុជា-ចិន បន្តឯកភាពគាំទ្រគ្នាទៅវិញទៅមកក្រោមលក្ខខណ្ឌពហុភាគី និងថ្នាក់តំបន់ និងជំរុញការអនុវត្តពិធីសារ និងដំឡើងកម្រិតពាណិជ្ជកម្មសេរីអាស៊ាន-ចិន ។
លោករដ្ឋមន្ត្រីបានគូសបញ្ជាក់ថា ៖« ក្រោមក្របខ័ណ្ឌកម្ពុជា-ចិននេះដែរ ក្រសួងកសិកម្ម រុក្ខាប្រមាញ់ និងនេសាទ បានសហការជាមួយភាគីចិនទាំងរដ្ឋ និងវិស័យឯកជន ក្រោមការអនុវត្តអនុស្សរណៈយោគយល់គ្នាចំនួន១៧, កិច្ចព្រមព្រៀងចំនួន៧, ពិធីសារនិងលិខិតប្តូរសារចំនួន៧ ព្រមទាំងផែនការសកម្មភាព៣ផ្សេងទៀត » ។
ស្របជាមួយគ្នានេះដែរ បើតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរជូនក្រុមហ៊ុនចិនធំមួយឈ្មោះ LONGMATE AGRICULTURE CO., LTD ដើម្បីវិនិយោគលើដំណាំចេក និងវេចខ្ចប់សម្រាប់នាំចេញ ក្រោមទុនវិនិយោគប្រមាណជាង៣២លានដុល្លារ មានទីតាំងនៅភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត ដែលអាចបង្កើតការងារប្រមាណជាង៥៧២កន្លែង ៕
ចែករំលែកព័តមាននេះ