ខេត្តរតនៈគីរី ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ជាជនជាតិភាគតិច ដែលរស់នៅតំបន់ព្រៃភ្នំតែងតែផឹកស្រា.សជាប្រចាំថ្ងៃភ្លេចបាយភ្លេចទឹករហូតខ្យល់គរស្លាប់យ៉ាងអាណោចអាធ័ម ហេតុការណ៍នេះកើតឡើងកាលពីម៉ោង១២និង៣០នាទីយប់ឈានចូលថ្ងៃទី០៦ ខែសីហា ឆ្នាំ២០១៨ ស្ថិតនៅភូមិថារ៉ងជង ឃុំអូជុំ…
ខេត្តរតនៈគីរី ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ជាជនជាតិភាគតិច ដែលរស់នៅតំបន់ព្រៃភ្នំតែងតែផឹកស្រា.សជាប្រចាំថ្ងៃភ្លេចបាយភ្លេចទឹករហូតខ្យល់គរស្លាប់យ៉ាងអាណោចអាធ័ម ហេតុការណ៍នេះកើតឡើងកាលពីម៉ោង១២និង៣០នាទីយប់ឈានចូលថ្ងៃទី០៦ ខែសីហា ឆ្នាំ២០១៨ ស្ថិតនៅភូមិថារ៉ងជង ឃុំអូជុំ ស្រុកអូជុំ ។
តាមសមត្ថកិច្ចស្រុកបានឱ្យដឹងថា ស្ត្រីរងគ្រោះខាងលើឈ្មោះឡាត់ ម៉ាលើយ អាយុ៥០ឆ្នាំ ជាជនជាតិដើមភាគតិចគ្រឹង មុខរបរកសិករ រស់នៅភូមិ-ឃុំកើតហេតុខាងលើ។
សមត្ថកិច្ចឱ្យដឹងថា មុនកើតហេតុ ស្ត្រីរងគ្រោះបានទៅចូលរួមក្នុងកម្មវិធីសែនផ្ទះបងប្អូនដែលនៅជិតគ្នា ហើយកម្មវិធីនោះមានទាំងស្រា.ស ស្រាពាងនិងស្រាបៀផងដែរដោយមានអ្នកភូមិចូលរួមពី២០ទៅ៣០នាក់ ។ នៅពេលចប់កម្មវិធីសែន ក៏ចាប់ផ្តើមនាំគ្នាផឹកស្រាចាប់ពីម៉ោង៣រសៀលរហូតដល់ម៉ោង១០យប់ទើបនាំគ្នាឈប់ ហើយអ្នកនៅក្នុងកម្មវិធីគេសង្កេតឃើញស្ត្រីរងគ្រោះបានផឹកស្រា.សយ៉ាងច្រើនរហូតស្រវឹងភ្លេចបាយភ្លេចទឹក និងមិនបានត្រឡប់ទៅផ្ទះវិញទេគឺដេកនៅផ្ទះកម្មវិធីនោះតែម្ដង។
សមត្ថកិច្ចបន្តទៀតថា រហូតដល់ម៉ោងកើតហេតុ បងប្អូនសាច់ញាតិបានហៅស្ត្រីរងគ្រោះឱ្យទៅផ្ទះវិញ ស្រាប់តែស្ត្រីរងគ្រោះបានស្លាប់បាត់ទៅហើយធ្វើឱ្យមានការភ្ញាក់ផ្អើលទាំងយប់ ។ លុះព្រឹកឡើងសមត្ថកិច្ចបានចុះទៅធ្វើការត្រួតពិនិត្យ ហើយសន្និដ្ឋានថា ជនរងគ្រោះពិតជាស្លាប់ដោយសារខ្យល់គ រួមផ្សំនឹងផឹកស្រាច្រើនពេកមិនហូបបាយទឹក ដូច្នេះគ្មានរឿងឃាតកម្មអ្វីកើតឡើងឡើយ។ ក្រោយពីត្រួតពិនិត្យរួចបានប្រគល់សពឱ្យបងប្អូន និងប្ដីស្ត្រីរងគ្រោះយកធ្វើបុណ្យតាមប្រពៃណី។
គួររំលឹកថា កាលនៅថ្ងៃទី២០ កក្កដា វេលាម៉ោង២និង៣០នាទីរសៀលក៏មានស្ត្រីម្នាក់ឈ្មោះសាអ៊ួយ ការវីង អាយុ៤០ឆ្នាំ រស់នៅភូមិភ្នំស្វាយ សង្កាត់បឹងកន្សែង ក្រុងបានលុង ក៏ញៀននឹងស្រា.សផឹកជាប្រចាំថ្ងៃ រហូតដល់ស្លាប់ដូចគ្នាផងដែរ៕
ចែករំលែកព័តមាននេះ