ខេត្តសៀមរាប ៖ ព័ត៌មានបឋមបានឲ្យដឹងថា បុរសម្នាក់ជាមនុស្សញៀនស្រាបានយកកាំបិតប៉័ងតោអារ.កសម្លាប់បុរសចំណាស់ដែលជាជនពិការស្វិតជើងបណ្តាលឱ្យស្លាប់ក្នុងថ្លុកឈាម បង្កឱ្យមានការភ្ញាក់ផ្អើលកាលពីម៉ោង៨យប់ថ្ងៃទី៥ សីហា នៅលើគ្រែក្រោមផ្ទះជនរងគ្រោះស្ថិតក្នុងភូមិថ្នល់ចែក ឃុំកៀនសង្កែ ស្រុកសូទ្រនិគម ។
ជនរងគ្រោះដែលស្លាប់ឈ្មោះ ឈិត ខ្វាន់ ភេទប្រុស អាយុ៥៦ឆ្នាំ ជាជនពិការស្វិតជើង មានទីលំនៅភូមិកើតហេតុខាងលើ ចំណែកជនសង្ស័យឈ្មោះ អ៊ុច ចាន់ណា ហៅជីវ ភេទប្រុស អាយុ២៤ឆ្នាំ មានទីលំនៅភូមិថ្នល់ចែក ឃុំកៀនសង្កែ ស្រុកសូទ្រនិគម (ផ្ទះជនសង្ស័យនិងផ្ទះជនរងគ្រោះនៅទល់មុខគ្នា) ។
បើតាមសាក្សីជាអ្នកជិតខាងបានរៀបរាប់ប្រាប់សមត្ថកិច្ចឲ្យដឹងថា មូលហេតុផ្តើមចេញពីជនសង្ស័យជាមនុស្សញៀនស្រា ហើយមានសតិមិនប្រក្រតី រីឯជនរងគ្រោះជាមនុស្សពិការស្វិតជើង ដើរកាន់ឈើច្រត់ និងមិនដែលមានទំនាស់ ឬគំនុំជាមួយគ្នានោះទេ ហើយជនសង្ស័យធ្លាប់ផឹកស្រាជុំគ្នាជាមួយជនរងគ្រោះទៀតផង ។
ប្រភពដដែលបានបន្តថា ក្រោយពេលអារ.កសម្លាប់ជនរងគ្រោះរួចហើយ ជនសង្ស័យបានទុកកាំបិតចោលនៅលើគ្រែក្បែរសពជនរងគ្រោះ និងបានស្រែកផ្អើលពេញភូមិថា «មានរឿងហើយៗ» រួចក៏រត់គេចខ្លួនបាត់ស្រមោល។ ករណីខាងលើនេះ សមត្ថកិច្ចកំពុងស្រាវជ្រាវស៊ើបអង្កេតបន្តតាមនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ