រាជធានីភ្នំពេញ ៖ ស្ត្រីម្នាក់ខណៈផឹកស្រាស្រវឹងបានវាយដំធ្វើបាបកូនស្រីអាយុ៨ឆ្នាំ ព្រមទាំងចាប់អូសដៃបម្រុងរត់ចូលរថយន្តទៀត តែត្រូវបានអ្នកឃើញហេតុការណ៍នោះនាំគ្នាជួយឃាត់និងចាប់ ហើយប្តឹងសមត្ថកិច្ចមូលដ្ឋានឱ្យមកអន្តរាគមន៍ ។ ករណីនេះ បង្កឲ្យមានការភ្ញាក់ផ្អើលឡើងកាលពីវេលាម៉ោង១១ និង៣០នាទីយប់ថ្ងៃទី៤ សីហា ស្ថិតនៅរង្វង់មូលចោមចៅ ក្នុងភូមិចោមចៅ សង្កាត់ចោមចៅ៣ ខណ្ឌពោធិ៍សែន
ជ័យ ។ ស្ត្រីជាម្តាយឈ្មោះ ស្រឿន ចន្ធី អាយុ៣២ឆ្នាំ ស្នាក់នៅបន្ទប់ជួលម្តុំខាងជើងសាលាសង្កាត់ចោមចៅ៣ និងមានស្រុកកំណើតនៅភូមិរកាក្រោម ឃុំខ្ពប ស្រុកស្អាង ខេត្តកណ្តាល ចំណែកកូនស្រីឈ្មោះ សុខ ស្រីស្រស់ ។
ប្រភពពីស្ត្រីម្នាក់ដែលឃើញហេតុការណ៍នេះប្រាប់ថា នៅវេលាម៉ោងជាង១១យប់នោះ ខណៈគាត់ទៅអង្គុយហូបអាហារពេលយប់ នៅម្តុំរង្វង់មូលចោមចៅ ស្រាប់តែឃើញស្ត្រីខាងលើក្នុងភាពស្រវឹងចុះពីលើកង់បីវាយកូនស្រី បណ្តាលឱ្យស្រែកយំផ្អើលអ្នកដំណើរ ព្រមទាំងចាប់អូសទាញដៃបម្រុង រត់ចូលរថយន្តទៀតផង ។ ពេលនោះ អ្នកឃើញហេតុការណ៍ក៏នាំគ្នាជួយឃាត់និងចាប់ ហើយប្តឹងសមត្ថកិច្ចមូលដ្ឋានឲ្យមកអន្តរាគមន៍នាំទៅប៉ុស្តិ៍ដើម្បីសាកសួរ ។
តាមស្ត្រីជាម្តាយនិយាយថា ដោយសារគាត់មានផ្ទៃពោះជិតគ្រប់ខែអត់លុយ ក៏បានទៅរកខ្ចីលុយអ្នកស្គាល់គ្នា ដើម្បីទុកសម្រាលកូន តែខ្ចីគេមិនបាន ឯប្តីក៏ចុះចោលទៅមានស្រីផ្សេងទៀត ។ ដោយសារទ័លច្រកខ្លាំង ទើបផឹកស្រាឲ្យស្រវឹង រួចចាប់ទាញដៃកូនស្រីបម្រុងរត់ចូលរថយន្តឱ្យបុកស្លាប់ទាំងអស់គ្នាតែ
ម្តងទៅ តែក៏ត្រូវបានអ្នកឃើញជួយចាប់ឃាត់ ។
ក្រោយពីសមត្ថកិច្ចនាំមកដល់ប៉ុស្តិ៍នគរបាលចោមចៅ៣ ក៏បានរៀបចំកន្លែងឱ្យម្តាយនិងកូនស្រីនេះដេកនៅមួយយប់សិន រង់ចាំព្រឹកឡើង ទើបឱ្យត្រឡប់ទៅវិញ ៕
ចែករំលែកព័តមាននេះ