រាជធានីភ្នំពេញ ៖ សេចក្តីរាយការណ៍បឋមឱ្យដឹងថា កម្មករកាត់ដេរយីហោ «JU LI»ជាង២០០នាក់ មានភាពតែលតោលដូចជាខ្លែងដាច់ខ្សែ បន្ទាប់ពីថៅកែ២នាក់ប្ដី-ប្រពន្ធបានស្លាប់ចោល ដោយមានជម្ងឺហើយក៏ធ្វើអត្តឃាតចង.កសម្លាប់ខ្លួន ចំណែកសិប្បកម្មមួយនេះ គ្មានអ្នកគ្រប់គ្រងបន្តទៀត ដើម្បីឱ្យសង្វាក់ផលិតកម្មអាចដំណើរការបន្តដូចដើម បាននាំគ្នាធ្វើការតវ៉ា ដោយបានបិទផ្លូវ កាលពីវេលាម៉ោង០៩និង៤០នាទីព្រឹកថ្ងៃទី៦ សីហា នេះ ស្ថិតនៅចំណុចមុខសិប្បកម្ម «JU LI» ក្នុងភូមិចំការឪឡឹក សង្កាត់កាកាកប២ ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តថា ដោយត្រូវបានបិទទ្វារដោយស្វ័យប្រវត្តិជាច្រើនថ្ងៃមកហើយ ចំណែកក្រុមកម្មកមានការជ្រួលច្របល់ រហូតឈានដល់ការធ្វើបាតុកម្មបិទផ្លូវទាមទារ ឱ្យមានដំណោះស្រាយលើប្រាក់ឈ្នួល និងប្រាក់អតីតភាពការងារ ដែលពួកគាត់ត្រូវទទួលបាន ។ ប៉ុន្តែរយៈពេលមួយអាទិត្យមកហើយ គ្មានមន្ត្រីស្ថាប័នណាអើពើឡើយ រហូតដល់ពេលកម្មករនាំគ្នាបិទផ្លូវ ទើបលេចមុខមន្ត្រីក្រសួងការងារ និងមន្ត្រីពាក់ព័ន្ធផ្សេងទៀត បានចុះមកដំណោះស្រាយជូនកម្មករ ។
គួរបញ្ជាក់ថា ថៅកែសិប្បកម្មខាងលើនោះ មានប្រពន្ធឈ្មោះLI FUZI ជនជាតិចិន អាយុ៣៨ឆ្នាំ បានស្លាប់ដោយសារជម្ងឺនៅឯប្រទេសចិន កាលពីអំឡុងខែមិថុនា ឆ្នាំ២០១៨ ប៉ុន្តែសិប្បកម្មមិនបានផ្អាកនោះនោះទេនៅតែដំណើរការជាធម្មតាដដែល ក្រោមការគ្រប់គ្រងបន្តដោយបុរសជាប្ដី។ លុះក្រោយពេលប្រពន្ធស្លាប់ចោលនោះ បានធ្វើឲ្យថៅកែជាប្ដីឈ្មោះ KOR JU អាយុ៤៩ឆ្នាំជាជនជាតិកូរ៉េខាងត្បូង ខូចចិត្តខ្លាំងណាស់គាត់បានផឹកស្រាស្រវឹងរាល់ថ្ងៃនិងបានព្យាយាមធ្វើអត្តឃាតសម្លាប់ខ្លួនតាមប្រពន្ធម្ដងជាពីរដងថែមទៀតផងប៉ុន្តែមិនបានសម្រេចឡើយ ដោយបុគ្គលិកកម្មករជាជួយទាន់ ហើយគាត់ក៏ធ្លាប់ផ្ដាំថាពេលគាត់ស្លាប់ទៅជួយយកសាពទៅបញ្ចុះក្បែរសពប្រពន្ធគាត់ផងព្រោះគាត់ស្រឡាញ់ប្រពន្ធគាត់ខ្លាំងណាស់។
ប៉ុន្តែទីបំផុត គាត់ធ្វើអត្តឃាតទាល់តែបាន ដោយនៅវេលាម៉ោង០៦ និង៣០នាទី ព្រឹកថ្ងៃទី៣០ ខែកក្កដា ឆ្នាំ២០១៨ ត្រូវបានកម្មករប្រទះឃើញគាត់ចងកស្លាប់មានសភាពហើមស្អុយនៅលើជាន់ទី២ផ្ទះជួលលេខ៦០៧អា ផ្លូវលេខ៦៨កា ភូមិ ចំការឪឡឹក សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញបាត់ទៅហើយ ។
លោកវង្ស សុវណ្ណ អគ្គលេខាធិការរងនៃគណៈកម្មាធិការ សម្រាប់ដោះស្រាយបាតុកម្ម និងកូដកម្មនៃក្រសួងការងារបានថ្លែង ទៅកាន់ក្រុមកម្មករថា សូមបងប្អូនមានការស្ងប់ស្ងៀម ព្រោះក្រុមការងារមិនបានព្រងើយកន្តើយអំពីបញ្ហានេះទេ ។ ក្រុមការងារបានដុតដៃដុតជើងក្នុងរឿងហើយពេលនេះ បាននិងកំពុងរៀបចំឯកសារដាក់ជូនស្នើរសុំទៅរាជរដ្ឋាភិបាលនិងសម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ។ ដើម្បីស្នើរសុំថវិកាបុរេប្បទាន នេះហើយម្យ៉ាងទៀតក្រុមការងារក៏កំពុងធ្វើតារាងមួយឲ្យបានច្បាស់លាស់ដើម្បីឡើងប្លង់ទៅចៀសវាងកុំឲ្យមានការខុសឆ្គងតារាង រួចហើយបាន ដាក់ឆ្លងទៅក្រសួងសេដ្ឋកិច្ចហិរញ្ញវត្ថុនិងការិយាល័យហិរញ្ញវត្ថុជាបន្តបន្ទាប់ហើយ។
ចែករំលែកព័តមាននេះ