ទីក្រុងបាងកក ៖ មន្ត្រីពាណិជ្ជកម្មប្រទេសថៃគិតថា ការនាំចេញអង្កររបស់ប្រទេសនេះនឹងបន្តរឹងមាំនៅឆ្នាំក្រោយ ដែលអាចនាំចេញបានយ៉ាងហោចណាស់ចំនួន១០លានតោន ព្រោះតែកំណើននៃតម្រូវការជាបន្តបន្ទាប់ ។
លោក Adul Chotinisakorn ប្រធាននាយកដ្ឋានពាណិជ្ជកម្មបរទេស បានឲ្យដឹងថា ៖ «ទស្សនវិស័យនៃការនាំចេញអង្កររបស់ថៃ នឹងមានភាពវិជ្ជមានរហូតដល់ឆ្នាំក្រោយ ដោយការនាំចេញអាចនឹងកើនឡើងដល់១០លានតោនដូចឆ្នាំ២០១៨នេះដែរ » ។
ក្រសួងកសិកម្មអាមេរិកបានព្យាករថា ការនាំចូលអង្ករនៅទូទាំងពិភពលោក នឹងកើនឡើងពី៤៨,៦៧លានតោនក្នុងឆ្នាំនេះ រហូតដល់៤៩,៥លានតោននៅឆ្នាំក្រោយ ។
លោក Adul Chotinisakorn បានបន្ថែមទៀតថា តម្លៃអង្កររបស់ថៃ ក៏បានប្រកួតប្រជែងនៅក្នុងទីផ្សារពិភពលោកផងដែរ ។
មកដល់ថ្ងៃទី១ ខែសីហា ឆ្នាំ២០១៨នេះ ប្រទេសថៃបាននាំចេញអង្ករចំនួន៦,៤លានតោន ដែលទាបជាងឆ្នាំមុន០,២% ក្នុងតម្លៃ៣,២៦ប៊ីលានដុល្លារ ។
លោក Adul Chotinisakorn បន្ថែមថា មន្ត្រីនាយកដ្ឋានពាណិជ្ជកម្មបរទេស នឹងពិភាក្សាជាមួយភាគីប្រទេសចិន ស្តីពីគម្រោងរបស់ចិន ក្នុងការទិញអង្ករបន្ថែមចំនួន១លានតោននៅឆ្នាំនេះ ដែលជាផ្នែកមួយនៃកញ្ចប់វិនិយោគ រួមមាន គម្រោងផ្លូវរថភ្លើងល្បឿនលឿន, ការទិញអង្ករ២លានតោន និងកៅស៊ូ២០ម៉ឺនតោនផងដែរ ។
មន្ត្រីថៃ និងភាគីប្រទេសចិនបានចុះអនុស្សរណៈនៃការយោគយល់គ្នា (MoU) កាលពីខែធ្នូ ឆ្នាំ២០១៤ ដើម្បីទិញអង្ករថ្មីនិងចាស់ ចំនួន១លានតោន រួមទាំងកៅស៊ូ២០ម៉ឺនតោនផងដែរ។ អនុស្សរណៈនៃការយោគយល់គ្នានេះ គឺជាផ្នែកមួយនៃកិច្ចព្រមព្រៀងសាងសង់ផ្លូវរថភ្លើងល្បឿនលឿនរវាងប្រទេសទាំងពីរ ៕
ចែករំលែកព័តមាននេះ