ទីក្រុងប៉េកាំង ៖ កាលពីល្ងាចថ្ងៃសុក្រ គណៈកម្មការពន្ធរបស់ក្រុមប្រឹក្សារដ្ឋបានប្រកាសថា ប្រទេសចិនបានត្រៀមខ្លួនរួចជាស្រេច ក្នុងការដាក់ពន្ធបន្ថែមលើផលិតផលអាមេរិកប្រមាណ៦០ប៊ីលានដុល្លារ ប្រសិនបើអាមេរិកបន្តបង្កើនភាពតានតឹងផ្នែកពាណិជ្ជកម្ម ។ ប្រទេសចិនមានគម្រោងដាក់ពន្ធលើផលិតផលអាមេរិកប្រមាណ៥.២០៧ប្រភេទ ក្នុងកម្រិត២៥%,…
ទីក្រុងប៉េកាំង ៖ កាលពីល្ងាចថ្ងៃសុក្រ គណៈកម្មការពន្ធរបស់ក្រុមប្រឹក្សារដ្ឋបានប្រកាសថា ប្រទេសចិនបានត្រៀមខ្លួនរួចជាស្រេច ក្នុងការដាក់ពន្ធបន្ថែមលើផលិតផលអាមេរិកប្រមាណ៦០ប៊ីលានដុល្លារ ប្រសិនបើអាមេរិកបន្តបង្កើនភាពតានតឹងផ្នែកពាណិជ្ជកម្ម ។
ប្រទេសចិនមានគម្រោងដាក់ពន្ធលើផលិតផលអាមេរិកប្រមាណ៥.២០៧ប្រភេទ ក្នុងកម្រិត២៥%, ២០%, ១០% និង៥%។ គណៈកម្មការនេះបាននិយាយក្នុងសេចក្តីថ្លែងការណ៍មួយថា ពន្ធទាំងនេះនឹងមានប្រសិទ្ធភាព ប្រសិនបើអាមេរិករារាំងការធ្វើពាណិជ្ជកម្មទ្វេភាគី ដោយបង្កើនពន្ធថ្មីៗលើផលិតផលចិន ។
សេចក្តីប្រកាសនេះបានចេញផ្សាយ បន្ទាប់ពីការិយាល័យអ្នកតំណាងពាណិជ្ជកម្មអាមេរិកប្រកាសកាលពីដើមសប្តាហ៍មុនថា ពួកគេកំពុងពិចារណាលើការបង្កើនពន្ធពី១០%ទៅ២៥% លើផលិតផលចិន ស្មើទឹកប្រាក់ប្រមាណ២០០ប៊ីលានដុល្លារ ។
គួរបញ្ជាក់ថា អាមេរិកបានដាក់ពន្ធលើផលិតផលចិនប្រមាណ៣៤ប៊ីលានដុល្លាររួចមកហើយកាលពីខែកក្កដា ហើយចិនក៏បានឆ្លើយតបវិញផងដែរ ។
គណៈកម្មការនេះបញ្ជាក់ថា ប្រទេសចិនចេញវិធានការដាក់ពន្ធដើម្បីការពារសិទ្ធិ និងអត្ថប្រយោជន៍របស់ខ្លួន, ទប់ស្កាត់ភាពធ្ងន់ធ្ងរឡើងនៃជម្លោះពាណិជ្ជកម្ម រួមទាំងកាត់បន្ថយការប៉ះពាល់លើផលិតកម្មក្នុងស្រុក និងជីវភាពរស់នៅរបស់ប្រជាពលរដ្ឋ ជាដើម។
អ្នកនាំពាក្យក្រសួងពាណិជ្ជកម្មចិនបាននិយាយថា កាលបរិច្ឆេទសម្រាប់ការអនុម័តពន្ធ នឹងពឹងផ្អែកទៅលើសកម្មភាពរបស់អាមេរិក ហើយចិនមានសិទ្ធិចេញវិធានការឆ្លើយតបផ្សេងៗ ។
លោក Xu Hongcai សេដ្ឋវិទូនៅ China Center for International Economic Exchanges មានប្រសាសន៍ថា ៖« បើទោះជាប្រព័ន្ធឧស្សាហកម្មអាមេរិកមានទ្រង់ទ្រាយធំ និងទូលំទូលាយក្តី ប៉ុន្តែផលិតកម្ម និងអតិថិជនរបស់ពួកគេពឹងផ្អែកខ្លាំងលើការនាំចូលអស់រយៈពេលជាច្រើនឆ្នាំមកហើយ ។ វាមិនងាយស្រួលទេសម្រាប់ប្រទេសនេះ ក្នុងការស្វែងរកការនាំចូលជំនួសការនាំចូលពីចិន ព្រោះចិនមានប្រៀបផ្នែកតម្លៃ ខ្សែសង្វាក់ផ្គត់ផ្គង់ និងបច្ចេកវិទ្យា » ៕
ចែករំលែកព័តមាននេះ