រាជធានីភ្នំពេញ ៖ អំពើចោរកម្មដ៏លេចធ្លោបច្ចុប្បន្ននេះ គឺក្រុមចោរឆក់ដែលតែងតែធ្វើសកម្មភាពគ្មានលស់ថ្ងៃឡើយ ហើយក៏បានធ្វើសកម្មភាពមិនរើសមុខទេ សូម្បីជនបរទេសក៏ឆក់ដែរ និងច្រើនតែធ្វើសកម្មភាពនៅពេលយប់ ។
ក្នុងចេតនាប្រឆាំងនឹងអំពើចោរកម្មដែលមានស្ថានទម្ងន់ទោសនេះ នគរបាលការិយាល័យព្រហ្មទណ្ឌរាជធានីភ្នំពេញ កាលពីព្រឹកថ្ងៃទី៥ សីហា បានបង្ហាញមុខក្រុមចោរឆក់យ៉ាងសកម្មក្នុងរាជធានីភ្នំពេញចំនួន៥នាក់ ដែលធ្វើសកម្មភាពរាប់ភ្លេច រាប់មិនអស់និងបានបង្ហាញវត្ថុតាងកាបូបដែលពួកគេឆក់បានរាប់សិបកាបូបផងដែរ ។
ជនសង្ស័យ១-ឈ្មោះ ហូ ផាន់ណា ភេទប្រុស អាយុ១៩ឆ្នាំ មានទីលំនៅផ្ទះគ្មានលេខ ផ្លូវ៣៦៩ ភូមិកោះក្របី សង្កាត់ព្រែកថ្មី ខណ្ឌច្បារអំពៅ ។ ២-ឈ្មោះ ទន់ អង្គាបុត្រ ភេទប្រុស អាយុ២៥ឆ្នាំ ស្នាក់នៅផ្ទះលេខ៥ផ្លូវលេខ២១០ ភូមិ៤ សង្កាត់ឃ្មួញ ខណ្ឌសែនសុខ និង៣-ឈ្មោះ កិច សុខវិសាល ភេទប្រុស អាយុ២២ឆ្នាំ ស្នាក់នៅផ្ទះលេខ៧ ផ្លូវលេខ១៤ សង្កាត់ភ្នំពេញថ្មី ខណ្ឌសែមសុខ ។
ពិធីបង្ហាញខ្លួនជនសង្ស័យជាក្រុមឆក់កាបូបខាងលើនេះ ធ្វើឡើងដោយលោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ដោយមានការអនុញ្ញាតពីលោកនាយឧត្តមសេនីយ៍អគ្គស្នងការរងនគរបាលជាតិ និងស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី សុង លី ស្នងការរងទទួលផែនកណ្តាលនគរបាលព្រហ្មទណ្ឌ ។
លោក ប៊ុន សត្យា ឱ្យដឹងពីព័ត៌មានលំអិតថា កាលពីថ្ងៃទី២ទី៣ សីហា កម្លាំងជំនាញការិយាល័យព្រហ្មទណ្ឌកម្រិតស្រាល បានចុះសហការជាមួយនគរបាលមូលដ្ឋាន ធ្វើការស្រាវជ្រាវ និងឈានដល់ការឃាត់ខ្លួនជន សង្ស័យជាក្រុមឆក់កាបូបចំនួន៣នាក់ ។ ប៉ុន្តែក្នុងចំណោម៣នាក់នេះ ជនសង្ស័យតែងបានចេញធ្វើសកម្មភាពផ្សេងៗគ្នា ដែលពួកគេនៅមានគ្នាជាច្រើននាក់ទៀត ពាក់ព័ន្ធប្រព្រឹត្តបទល្មើសចំនួន៩ករណីនេះគ្រាន់នៅចាំបានត្រួសៗប៉ុណ្ណោះ ។ ជាក់ស្តែងដូចជាឈ្មោះ ហូ ផាន់ណា និងបក្សពួកដែលកំពុងគេចខ្លួនបានសារភាពដោយធ្វើសកម្មភាពចំនួន៥លើក ។
លើកទី១-ឆក់កាបូបជ័រ ពណ៌ក្រហម នៅចំណុចរង្វង់មូលព្រះនរាយណ៍ តាមបណ្តោយផ្លូវជាតិលេខ២ ក្រុងតាខ្មៅ ខេត្តកណ្តាលកាលពីវេលាម៉ោង៣រសៀលថ្ងៃទី៦ កក្កដា ២០១៧ ។
លើកទី២-ឆក់កាបូបពណ៌ផ្ទៃមេឃ នៅចំណុចរង្វង់មូលព្រះនរាយណ៍ តាមបណ្តោយផ្លូវជាតិលេខ២ ក្រុងតាខ្មៅ ខេត្តកណ្តាល កាលពីវេលាម៉ោង១២ព្រឹកថ្ងៃទី១០ កក្កដា ២០១៧ ។
លើកទី៣-ឆក់កាបូបដៃតូច នៅចំណុចស្ថានីយប្រេងឥន្ធនៈតូតាល់ តាមបណ្តោយផ្លូវជាតិលេខ២ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញ កាលពីវេលាម៉ោង៥ល្ងាចថ្ងៃទី២៦ កក្កដា ២០១៧ ។
លើកទី៤-ឆក់កាបូបស្ពាយម៉ាក LV នៅចំណុចផ្លូវលេខ៤៨៨ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ កាលពីវេលម៉ោង៥ល្ងាច ថ្ងៃទី២៤ កក្កដា ២០១៧ ។
លើកទី៥-ឆក់បានកាបូបស្ពាយម៉ាក LVដែរ ពណ៌សូកូឡា ប្រព្រឹត្តកាលពីវេលាម៉ោង១២ថ្ងៃត្រង់ ថ្ងៃទី២៤ កក្កដា ២០១៨ នៅចំណុចមុខផ្ទះលេខ២១ ផ្លូវលេខ២៣៧ សង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ ។
លោក ប៊ុន សត្យា បន្តថា ជនសង្ស័យរូបនេះត្រូវសមត្ថកិច្ចឃាត់ខ្លួនកាលពីវេលារសៀលថ្ងៃទី២ សីហា នៅចំណុចភូមិកោះក្របីសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។ ការឃាត់ខ្លួនបាននេះគឺ ខណៈពេលតាមប្រមាញ់ម៉ូតូ១គ្រឿងដែលចោរលួចមានបង្គប់ប្រព័ន្ធ GPS ។ ពេលឃាត់ខ្លួនបានធ្វើការដកហូតម៉ូតូម៉ាក SUZUKI NEX ពណ៌ស ផលិតឆ្នាំ២០១៤មួយគ្រឿង ទូរស័ព្ទដៃម៉ាក Iphone៥s មួយគ្រឿង កាបូបស្ពាយមួយ កាបូបលុយមួយ និងសោរបងផ្ទះប្រើតេឡេមួយជារបស់ជនរងគ្រោះឈ្មោះ សៅ ស៊ីណា ភេទប្រុស អាយុ៣៣ឆ្នាំ ស្នាក់នៅផ្ទះលេខ៤៨៩ ផ្លូវ២៧១ សង្កាត់បឹងទំពុន១ ខណ្ឌមានជ័យ ។
បន្ទាប់មកសមត្ថកិច្ចរកឃើញនិងដកហូតបានកាបូបយួរដៃរបស់ស្រី្តចម្រុះពណ៌ចំនួន៤៨កាបូបស្ពាយចំនួន១២ កាបូបដៃដាក់លុយធម្មតាចំនួន១២ សោរថយន្តចំនួន៥ សោម៉ូតូចំនួន២ ។ចំណែកជនសង្ស័យ២នាក់ទៀតគឺឈ្មោះ ទន់ អង្គាបុត្រ និងឈ្មោះ កែវ សុខវិសាល បានសារភាពធ្វើសកម្មភាពឆក់ចំនួន៣លើកដែលនៅចាំ ។
លើកទី១-ឆក់កាបូបស្ពាយពណ៌ខ្មៅ ប្រព្រឹត្តកាលពីវេលាម៉ោង១០និង៣០នាទីយប់ថ្ងៃទី១ សីហា នៅចំណុចមុខហាងពិភពម៉ូដ ផ្លូវលេខ១៩ សង្កាត់ជ័យជំនះ ខណ្ឌដូនពេញ ពីជនបរទេសឈ្មោះ CHALOU CLARA ភេទស្រី អាយុ២៨ឆ្នាំ ជាជនជាតិបារាំំង ជាភ្ញៀវទេសចរណ៍ដែលចូលមកស្នាក់នៅផ្ទះសំណាក់ឡេស៊ីកេកូ ផ្លូវលេខ២៥៨ សង្កាត់ចតុមុខ ខណ្ឌដូនពេញ ។ ជនរងគ្រោះបាត់បង់សម្ភារកាបូបស្ពាយពណ៌ខ្មៅ១ លិខិតឆ្លងដែន១ កាតធនាគារ១ ដែលមានទឹកប្រាក់ចំនួន៦០ដុល្លារអាមេរិក ។
លើកទី២-ឆក់ទូរស័ព្ទដៃម៉ាក Iphone៥s ពណ៌ទឹកមាស ប្រព្រឹត្តនៅចំណុចក្បែរបញ្ជាការដ្ឋានកងរាជអាវុធហត្ថខណ្ឌទួលគោក កាលពីវេលាម៉ោង៦ល្ងាចថ្ងៃទី២៨ កក្កដា ២០១៨ ។
លើកទី៣-ឆក់ទូរស័ព្ទដៃម៉ាកអាហ្វូន៦ផ្លឹស ពណ៌ទឹកមាស នៅចំណុចមុខវិទ្យាល័យ ជា ស៊ីមសាមគ្គី ផ្លូវលេខ២៧១ សង្កាត់បឹងសាឡាង ខណ្ឌទួលគោក កាលពីវេលាម៉ោង៦ល្ងាច ថ្ងៃទី២៤ កក្កដា ២០១៨ ។ វត្ថុតាងជាមធ្យោបាយជិះធ្វើសកម្មភាពម៉ូតូម៉ាកSUZUKI NEX ពណ៌ខៀវ ពាក់ផ្លាកលេខភ្នំពេញ១FY-៨២០៣ មួយគ្រឿង ទូរស័ព្ទម៉ាកណូគារ២៣០ ពណ៌ខ្មៅ១គ្រឿង ទូរស័ព្ទដៃសាំសុង ពណ៌ស១គ្រឿង និងខ្សែដៃលោហៈធាតុពណ៌លឿងស ក្លែងក្លាយ១ខ្សែ ម៉ូតូម៉ាកឌ្រីមសង់១២៥ ពណ៌ខ្មៅ ស៊េរី២០១៨ ពាក់ផ្លាកលេខត្បូងឃ្មុំ ១E-៩១១៨ មួយគ្រឿង ។
ដកហូតបានមកវិញជាភស្តុតាងរបស់ជនរងគ្រោះ កូនកាបូបស្ពាយ ពណ៌ខ្មៅ១ លិខិតឆ្លងដែនរបស់ជនជាតិបរទេស១ច្បាប់ និងលើកទី៤ ដែលសរុបមាន៩ដងដែលមិនចាំព្រោះច្រើនពេក ។ គឺពួកគេទាំង៥នាក់ជាក្រុមតែមួយ ក្រៅពីធ្វើចោរឆក់ ពួកគេបានធ្វើសកម្មភាពប្រព្រឹត្តបទល្មើសគ្រឿងញៀនផងដែរ ដែលត្រូវបានសមត្ថកិច្ចចាត់បញ្ចូលក្នុងសំណុំរឿង ដើម្បីបញ្ជូនទៅសាលាដំបូងចាត់ការតាមផ្លូវច្បាប់ ៕
ចែករំលែកព័តមាននេះ