រាជធានីភ្នំពេញ ៖ ជនសង្ស័យម្នាក់ត្រូវសមត្ថកិច្ចចាត់ទុកថាជាមុខសញ្ញាដែលជំនាញបំផុតខាងលួចកាច់សោ.កម៉ូតូ កន្លងមកធ្លាប់លួចមិនតិចគ្រឿងនោះឡើយ និងធ្លាប់ជាប់ពន្ធនាគារទៀតផង ប៉ុន្តែមិនរាងចាលឡើយ ។ ចុងក្រោយនេះត្រូវនគរបាលព្រហ្មទណ្ឌស្រុកអង្គស្នួល ចាប់ខ្លួនក្រោយពេលរូបគេបានលួចម៉ូតូ១គ្រឿង ។ មិនតែប៉ុណ្ណោះក៏ឈានទៅឃាត់ខ្លួនម្នាក់ទៀតជាអ្នកទទួលទិញម៉ូតូនៅពេលលួចយកទៅលក់ឲ្យ។
ការចាប់ខ្លួនជនសង្ស័យទាំង២នាក់បានធ្វើឡើងកាលពីម៉ោង១និង១៥នាទីរសៀល ថ្ងៃទី៥ ខែសីហា ឆ្នាំ២០១៨ ក្រោយពីជនសង្ស័យទី១ បានលួចម៉ូតូ១គ្រឿងចេញពីចំណុចមុខបន្ទប់ជួលមួយកន្លែងស្ថិតនៅក្នុងភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល។
ជនសង្ស័យ ១-ឈ្មោះ ផូង កុសល អាយុ២៩ឆ្នាំ ចេះកាច់សោ.កម៉ូតូយ៉ាងស្ទាត់ជំនាញ មានមុខរបរមួយទៀតជាកម្មករសំណង់ មានទីលំនៅក្នុងភូមិពេជ្រឥន្ទ្រា ឃុំបឹងត្រាញខាងជើង ស្រុកសំរោង ខេត្តតាកែវ។ ជននេះធ្លាប់ជាប់ពន្ធនាគារព្រៃ.សម្ដងរយៈពេល១ឆ្នាំពីបទលួច ចេញមកវិញអំឡុងឆ្នាំ២០១៦ ។ ក្រោយមកក៏ធ្វើសកម្មភាពលើសដើម គ្រាន់តែចម្លើយសារភាពត្រួសៗលួចកាច់សោរម៉ូតូសម្រេចជាច្រើនលើក។
ចំណែក២-ឈ្មោះ សែត ផុល អាយុ៤៥ឆ្នាំ ជាអ្នកទទួលទិញម៉ូតូពីជនសង្ស័យ មានមុខរបរមួយទៀតគឺរត់ម៉ូតូឌុប មានទីលំនៅក្នុងភូមិព្រែកហូរលិច ឃុំព្រែកហូរ ក្រុងតាខ្មៅ ខេត្តកណ្តាល។ ជននេះធ្លាប់ទិញម៉ូតូពីជនសង្ស័យទី១លួចបាន៨គ្រឿងមកហើយ ស្រាប់តែចុងក្រោយនេះជនសង្ស័យទី១ លួចកាច់សោ.កម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅពាក់ស្លាកលេខកំពង់ស្ពឺ 1K-8925. ជាកម្មសិទ្ធិរបស់ស្ត្រីម្នាក់ឈ្មោះ ភិន ខេត អាយុ៥៥ឆ្នាំ មុខរបរកសិករ មានទីលំនៅក្នុងភូមិព្រៃមាន ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ ប៉ុន្តែម៉ូតូនេះត្រូវនគរបាលដកហូតយកមកវិញបាន។
ក្រៅពីនេះកម្លាំងនគរបាលបានដកហូតវត្ថុតាងមួយចំនួនទៀត ដូចជា កន្ត្រៃ២, ដែកចុងស្រួច១, ម៉ូតូម៉ាកហុងដាឌ្រីមសេ១១០ ស៊េរីឆ្នាំ២០១២ ពណ៌ខ្មៅពាក់ស្លាកលេខកណ្តាល 1D-8826 និងម៉ូតូម៉ាកស៊ុយហ្ស៊ុយគីនិច ពណ៌ស ពាក់ស្លាកលេខភ្នំពេញ 1CT-4289៤, សោរសម្រាប់ដោះគ្រឿងម៉ូតូមួយចំនួន។
នគរបាលនិយាយថា មុនកើតហេតុជនរងគ្រោះយកម៉ូតូទុកនៅមុខបន្ទប់ជួលខាងក្រោម រួចឡើងទៅសំរាកនៅជាន់ទី២ ដោយចាក់សោ.កត្រឹមត្រូវ ខណៈនោះជនសង្ស័យធ្វើសកម្មភាពកាច់សោ.ក ដោយយកជើងធាក់បំបាក់សោ.ក រួចជិះរត់គេចតែម្តង។ ពេលនោះក៏ជិះម៉ូតូលួចបាននេះទៅកាន់បន្ទប់ជួលរបស់មិត្តភក្តិនៅភូមិព្រៃទាសង្កាត់ចោមចៅ៣ បន្ទាប់មកសម្ងំដោះស្លាកលេខម៉ូតូចេញ ប៉ុន្តែពេលកំពុងដោះក៏ត្រូវនគរបាលតាមទាន់ចាប់ខ្លួនបាន រួចនាំទៅសួរនាំតែម្តង ។
ពេលនោះជនសង្ស័យសារភាពថា ខ្លួនពិតជាលួចម៉ូតូខាងលើពិតមែន មិនតែប៉ុណ្ណោះខ្លួនក៏ធ្លាប់ជាប់គុកព្រៃស១ឆ្នាំផងដែរពីបទលួច។ លុះក្រោយចេញពីគុកវិញ ខ្លួនចាប់យកមុខរបរចាស់ គឺលួចកាច់សោ.កម៉ូតូដដែល ហើយក៏ធ្លាប់ធ្វើសកម្មភាពកាច់សោ.កម៉ូតូនេះបានសម្រេច រួចយកទៅលក់ឲ្យឈ្មោះសែត ផុល បាន៨គ្រឿងមកហើយដែរ៕
ចែករំលែកព័តមាននេះ