រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានវាយបកទៅអតីតថ្នាក់ដឹកនាំអតីតគណបក្សសង្គ្រោះជាតិដែលថ្មីៗកន្លងទៅនេះបានចោទប្រកាន់ថា បក្សកាន់អំណាច និងគណៈកម្មាធិការជាតិរៀបចំការបោះឆ្នោតថា អ្នកចេញទៅបោះឆ្នោតជាតិ…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានវាយបកទៅអតីតថ្នាក់ដឹកនាំអតីតគណបក្សសង្គ្រោះជាតិដែលថ្មីៗកន្លងទៅនេះបានចោទប្រកាន់ថា បក្សកាន់អំណាច និងគណៈកម្មាធិការជាតិរៀបចំការបោះឆ្នោតថា អ្នកចេញទៅបោះឆ្នោតជាតិ កាលពីថ្ងៃទី២៩ កក្កដា ឆ្នាំ២០១៨ កន្លងទៅថ្មីនេះ មានចំនួនជាង៨២% ជាតួលេខបំប៉ោង ។
ថ្លែងនាឱកាសជួបសំណេះសំណាលជាមួយអត្តពលិក កីឡាករ កីឡាការិនី គ្រូបង្វិក រួមនឹងប្រតិភូកីឡាសរុបជាង៧០នាក់ ចូលជួបទទួលដំបូន្មានមួយចំនួន មុននឹងពួកគេចេញទៅចូលរួមប្រកួតកីឡា Asain Games នៅប្រទេសឥណ្ឌូនេស៊ី នៅវិមានសន្តិភាព ព្រឹកថ្ងៃទី០៦ សីហា នេះ សម្តេចបញ្ជាក់ថា ថ្នាក់ដឹកនាំអតីតបក្សប្រឆាំង ឬ «ពួកក្រុមនៅផ្ទះឈ្នះឯង» បន្តចោទប្រកាន់បក្សកាន់អំណាចថា សល់រឿងមួយ គឺគេបន្តចោទថា ការបោះឆ្នោតជ្រើសតាំងតំណាងរាស្ត្រថ្មីៗនេះ គឺមាន «ការលួចបន្លំ និងបំប៉ោងតួលេខ» ។
សម្តេចមានប្រសាសន៍បន្តថា ឥឡូវនិយាយអញ្ចេះ ប្រពៃណីខ្មែរយើង និងលើពិភពលោក គឺភាគច្រើនប្រើពាក្យស្បថ មុនពេលចូលកាន់តំណែង ឬក៏មុនចូលទៅតុលាការកាត់ក្តីជាដើម អញ្ចឹង សម្តេចក៏បបួលលោក សម រង្ស៊ី អតីតមេដឹកនាំអតីតបក្សប្រឆាំងថា តើហ៊ានស្បថជាមួយសម្តេចទេ ? សម្តេចនាយករដ្ឋមន្ត្រីបានចោទជាសំនួរថា តើពួកអ្នកឯងហ៊ានស្បថឲ្យរន្ទះបាញ់ ឬស្អីក៏ដោយឲ្យតែស្លាប់ថា ប្រជាពលរដ្ឋត្រូវគេបំផិតបំភ័យ និងតួលេខអ្នកចេញបោះឆ្នោតជាតួលេខបំប៉ោងដូចអ្វីដែលអតីតមេដឹកនាំបក្សប្រឆាំងបាននឹងកំពុងចោទប្រកាន់នោះ ។ បើហ៊ានស្បថប្រកាសតាមហ្វេសប៊ុកមកថា ងាប់ប្រភេទណាក៏ដោយ គឺសម្តេចហ៊ានស្បថជាមួយ ។
សម្តេចតេជោ ហ៊ុន សែន បញ្ជាក់ថា ៖ «ខ្ញុំហ៊ានស្បថឲ្យងាប់តៃហោង» ។ សម្តេចបន្ថែមថា អតីតមេដឹកនាំអតីតបក្សប្រឆាំងចូលចិត្តនិយាយបំប៉ោងបំផ្លៃការពិត អញ្ចឹង «អ្នកណាចោទប្រកាន់ខុសអ្នកនោះត្រូវទេវតាបរាមុខ» ។ សម្តេច ហ៊ុន សែនបន្តថា៖ «ខ្ញុំសុំស្បថមុនអ្នកឯង ឲ្យស្លាប់គ្មានដីកប់ ឬស្លាប់តៃហោង […] ឡានបុក ធ្លាក់យន្តហោះ រន្ទះបាញ់ ។ អ្នកឯងហ៊ានអត់? រុញអ្នកឯងឲ្យដល់ជញ្ជាំង» ។
សម្តេចក៏បានផ្លែផ្កាឲ្យអតីតមេដឹកនាំបក្សប្រឆាំងឲ្យភ្ញាក់ខ្លួនថា ចូលរួមប្រកួតប្រជែងការបោះឆ្នោតជាមួយសម្តេចប៉ុន្មានអាណត្តិហើយ មិនដែលឈ្នះសោះ គួរតែដឹងខ្លួនហើយ ៕
ចែករំលែកព័តមាននេះ