ខេត្តកំពង់ឆ្នាំង ៖ ដោយនៅក្នុងបណ្ដាញសង្គមមានអខោនឈ្មោះ Boribo Distric (បរិបូរណ៌ ឌីសស្ទ្រីក) ដែលគេស្គាល់ថា ជាអខោនផ្ទាល់ខ្លួនរបស់លោកអភិបាលស្រុកបរិបូណ៌បានចេញសេចក្តីអំពាវនាវឲ្យប្រជាពលរដ្ឋដែលប្រើប្រាស់ជលយានទាំងអស់ នៅមាត់កំពង់ទឹក ឆ្នុកទ្រូ សូមមេត្តាកុំបើកលឿនៗពេក ដែលបណ្តាលឲ្យកើតជារលកទឹកធំៗធ្វើឲ្យបាក់ជើងទេ ផ្លូវដែលទើបកសាងថ្មី សូមជួយថែរក្សាផ្លូវលេខ៥២របស់យើងទាំងអស់គ្នា ។
ជុំវិញសេចក្តីអំពាវនាវនេះភ្នាក់ងារកោះសន្តិភាពបានសុំធ្វើការបំភ្លឺពីលោក ឃួន សៅរុំអភិបាលស្រុកបរិបូណ៌តាមទូរស័ព្ទដោយលោកមានប្រសាសន៍យ៉ាងខ្លីថា បងប្អូនប្រជាពលរដ្ឋដែលបើកកាណូតបាឡាស្មាច់លឿនៗពេក បណ្ដាលឲ្យមានរលកធំៗទៅវាយផ្ទប់នឹងជើងទេនៃផ្លូវលេខ៥២ ដែលទើបនឹងចាក់ថ្មី បណ្ដាលឲ្យធ្លាក់បាក់ដាច់ធំៗច្រើនកន្លែងធ្វើឲ្យមានការព្រួយបារម្មណ៍ខ្លាចបាក់ស្រុតផ្លូវថ្មីនេះជាក់ជាមិនខាន បើយើងមិនជួយទប់ស្កាត់គ្នាទេនោះ ។
លោកសុំឲ្យអ្នកបើកបរជលយាន្តទាំងអស់សូមបើកយឺតៗវានឹងមិនមានរលកអាចទៅវាយជើងទេនៃផ្លូវដែលទើបនឹងកសាងនោះឡើយ ។ លោកសុំមិនបានបញ្ជាក់វែងឆ្ងាយទេ ដោយសារតែរូបលោកកំពុងតែបើកបររថយន្តនាំចៅទៅមន្ទីរពេទ្យ ។ ប៉ុន្តែគោលបំណងសំខាន់របស់លោក គឺសូមឲ្យបងប្អូនអ្នកប្រើប្រាស់ជលយានទាំងអស់នៅតំបន់ឃុំឆ្នុកទ្រូ សូមមេត្តាជួយថែរក្សាផ្លូវដែលទើបកសាងចាក់ថ្មីទាំងអស់គ្នា ព្រោះថា បច្ចុប្បន្នយើងឃើញជើងទេផ្លូវថ្មីខាងលើ គឺបានបាក់ស្ទើរគ្រប់កន្លែងទាំងអស់ទៅហើយ អាចនឹងបាក់ស្រុតនៅកន្លែងណាមួយជាពុំខាន ។
រំលឹកដែរថា ផ្លូវលេខ៥២នេះ គឺបានតភ្ជាប់ពីចំណុចផ្សារពន្លៃចុះរហូតទៅដល់មាត់កំពង់ទឹកឆ្នុកទ្រូ គឺជាផ្លូវសេដ្ឋកិច្ចយ៉ាងសំខាន់សម្រាប់ដឹកកសិផលក៏ដូចជា ដឹកផលនេសាទនានា ពីតាមតំបន់ជាច្រើនក្នុងឃុំឆ្នុកទ្រូ ស្រុកបរិបូរណ៌ និងស្រុកកំពង់លែង ខេត្តកំពង់ឆ្នាំង និងមកពីស្រុកផាត់សណ្ដាយ ខេត្តកំពង់ធំផងដែរ ដែលបច្ចុប្បន្នកំពុងមានការមមាញឹកដឹកជញ្ជូនជារៀងរាល់ថ្ងៃ ។
ផ្លូវនេះ បន្ទាប់ពីរាជរដ្ឋាភិបាលដកសិទ្ធពីវិស័យឯកជនដែលគ្រប់គ្រងក្នុងរយៈពេលកន្លងមកត្រូវបានរាជរដ្ឋាភិបាលក៏បានចាប់ផ្ដើមកសាងឡើងវិញនៅឆ្នាំ២០១៧ និងឆ្នាំ២០១៨ ដើម្បីធ្វើឲ្យខ្ពស់ផុតទឹក ទន្លេឡើងក្នុងខែវស្សា និងត្រៀមអភិវឌ្ឍន៍តំបន់ឆ្នុកទ្រមិនឲ្យមានអ្នករស់នៅលើផ្ទះបណ្តែតលើទឹកទៀតនោះឡើយ ៕
ចែករំលែកព័តមាននេះ