រាជធានីភ្នំពេញ ៖ បុរសម្នាក់បើករថយន្តលឿនក្នុងភូមិ ខឹងអ្នកភូមិស្រែកថាឲ្យ បានថយរថយន្តបើកបំបុក និងកិនម៉ូតូរងការខូចខាតអស់ចំនួន២គ្រឿង បណ្តាលឲ្យបុរសម្នាក់រងរបួសធ្ងន់ ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩និង១៥នាទីយប់ថ្ងៃទី៥ ខែ…
រាជធានីភ្នំពេញ ៖ បុរសម្នាក់បើករថយន្តលឿនក្នុងភូមិ ខឹងអ្នកភូមិស្រែកថាឲ្យ បានថយរថយន្តបើកបំបុក និងកិនម៉ូតូរងការខូចខាតអស់ចំនួន២គ្រឿង បណ្តាលឲ្យបុរសម្នាក់រងរបួសធ្ងន់ ។ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩និង១៥នាទីយប់ថ្ងៃទី៥ ខែ សីហា ឆ្នាំ២០១៨ នៅផ្លូវលំ មុខផ្ទះដីឡូត៍លេខ១១ ស្ថិតនៅភូមិ ត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ។
រថយន្តបង្កខាងលើម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ ២AQ-២៣១៧ បើកបរដោយបុរសម្នាក់ដែលគេស្គាល់ថាជាថៅកែឃ្លាំងស្តុកភេសជ្ជៈ ។ ចំណែកម៉ូតូដែលរងការខូចខាតទាំងមាន២គ្រឿងរួមមានមួយគ្រឿងម៉ាកហុងដាឌ្រីម ពណ៌ខ្មៅ និងមួយគ្រឿងទៀត ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៤ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញរថយន្តបង្កម៉ាកឡិចស៊ីស RX300 ដែលបើកបរដោយបុរសម្នាក់ជាថៅកែឃ្លាំងស្តុកភេសជ្ជៈ មានទីតាំងជិតកន្លែងកើតហេតុខាងលើ បើកក្នុងទិសដៅពីកើតទៅលិចក្នុងល្បឿនយ៉ាងលឿន លុះមកដល់ចំណុចមុខផ្ទះខាងលើមានម៉ូតូ២គ្រឿងដែលចតខាងមុខ បន្ទាប់មកប្រជាពលរដ្ឋបានស្រែកប្រាប់អ្នកបើកបររថយន្តខាងលើថា
«កុំឲ្យបើកលឿនពេក ក្រែងប៉ះពារគេឯង ព្រោះផ្លូវលំផង» ។
ប្រភពដដែលបានបន្តថា អ្នកបើកបររថយន្តខាងលើដែលធ្លាប់តែបើករថយន្តក្នុងល្បឿនលឿននោះខឹង បានឈប់រថយន្តហើយបើកចម្រៀងក្នុងរថយន្តឮយ៉ាងខ្លាំងៗ ពេលនោះប្រជាពលរដ្ឋយ៉ាងច្រើនបានជួយនិយាយកុំឲ្យមានបញ្ហានៅកន្លែងកើតហេតុ ស្រាប់តែអ្នកបើកបររថយន្តនោះបានបើករថយន្តរយ៉ែថយក្រោយ ហើយបើកបំបុកម៉ូតូ និងប្រជាពលរដ្ឋ បណ្តាលឲ្យកិនម៉ូតូរងការខូចខាតចំនួន២គ្រឿង និងបុរសម្នាក់រងរបួសធ្ងន់ ចំណែកអ្នកបើកបររថយន្តបានបើកចេញពីកន្លែងកើតហេតុបាត់។
បន្ទាប់មកមានកម្លាំងនគរបាលប៉ុស្តិ៍មកដល់កន្លែងកើតហេតុ ហើយបានទាក់ទងទៅថៅកែខាងលើដើម្បីឱ្យមកសម្របសម្រួលគ្នានៅកន្លែងកើតហេតុ។ ចំណែកភាគីអ្នកបើកបររថយន្តបង្កខាងលើពេលអ្នកសារព័ត៌មានសាកសួរ មិនបានបញ្ជាក់ប្រាប់អ្នកសារព័ត៌មាន និងមិនចង់ឱ្យគេថតខ្លួនទៀតផង ។
ក្រោយពេលកើតហេតុ កម្លាំងនគរបាលប៉ុស្តិ៍បានទាក់ទងទៅកម្លាំងជំនាញចរាចរណ៍ខណ្ឌពោធិ៍សែនជ័យដើម្បីមកកន្លែងកើតហេតុ ចុះវាស់វែងយករថយន្តនិងម៉ូតូទាំង២គ្រឿងដែលរងការខូចខាត ព្រមទាំងអ្នកបើកបររថយន្តបង្កខាងលើនាំយកទៅខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ