ខេត្តឧត្តរមានជ័យ ៖ ប្រភពព័ត៌មានពីខេត្តឧត្តរមានជ័យបានឲ្យដឹងថា កាលពីថ្ងៃទី៤ សីហា ម្សិលមិញនេះ កម្លាំងសមត្ថកិច្ចនគរបាលស្រុកប្រាសាទ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធករណីលួចគោ១ក្បាល។ ជនសង្ស័យឈ្មោះ…
ខេត្តឧត្តរមានជ័យ ៖ ប្រភពព័ត៌មានពីខេត្តឧត្តរមានជ័យបានឲ្យដឹងថា កាលពីថ្ងៃទី៤ សីហា ម្សិលមិញនេះ កម្លាំងសមត្ថកិច្ចនគរបាលស្រុកប្រាសាទ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធករណីលួចគោ១ក្បាល។ ជនសង្ស័យឈ្មោះ ឡេង លីគា ភេទប្រុស អាយុ៣៣ឆ្នាំ មានទីលំនៅភូមិទួលប្រសើរ ឃុំបាក់អន្លូង ស្រុកត្រពាំងប្រាសាទ ខេត្តឧត្តរមានជយ័។ គួរបញ្ជាក់ផងដែរថា កាលពីអំឡុងឆ្នាំ២០១៣ ឈ្មោះ យ៉ុង សំអុល ភេទប្រុស អាយុ៣២ឆ្នាំ បានមករស់នៅភូមិជាមួយឈ្មោះ ឡេង លីគា (ជនសង្ស័យ) ដោយបានរាប់អានគ្នាចាត់ទុក ជាបងប្អូនធម៌ទៀតផង។
ការដែលរស់នៅក្នុងភូមិជាមួយគ្នានោះ ឈ្មោះ យ៉ុង សំអុល បានជួយការងារដូចជាចិញ្ចឹមជ្រូក ធ្វើចម្ការ និងជួយធ្វើម៉ូតូបងធម៌(ឡេង លីគា)ជារៀងរាល់ថ្ងៃ។ លុះដល់ឆ្នាំ២០១៤ ឈ្មោះ ឡេង លីគា បានទិញកូនគោតូចៗចំនួន៣ក្បាលមកចិញ្ចឹម ហើយពេលនោះបានឲ្យទៅឈ្មោះ យ៉ុង សំអុល កូនគោមេ១ក្បាលទុកចិញ្ចឹមជាកម្មសិទ្ធិរបស់ខ្លួន។ លុះដល់ចុងឆ្នាំ២០១៥ ឈ្មោះ យ៉ុង សំអុល បានទៅរៀនធ្វើម៉ូតូនៅខេត្តកំពង់ធំ ហើយបានផ្ញើសត្វគោ របស់ខ្លួន១ក្បាលនោះទុកឲ្យបងធម៌ជួយមើល។ គ្រានោះឈ្មោះ យ៉ុន សំអុល ទៅរៀនជួសជុលម៉ូតូ មេគោនោះកើតបានកូនមួយក្បាល ហើយកូននោះគឺឈ្មោះ ឡេង លីគា បានយកធ្វើកម្មសិទ្ធផ្ទាល់ខ្លួន ដែលឈ្មោះ យ៉ុន សំអុល មិនបានជំទាស់ឡើយ និងបានប្រើពាក្យថាបើបងធម៌យកក៏យកចុះ។
លុះខែវិច្ឆិកា ឆ្នាំ២០១៧ ឈ្មោះ យ៉ុន សំអុល មកពីរៀនធ្វើម៉ូតូវិញជនសង្ស័យ ឡេង លីគា ក៏បានប្រគល់មេគោនោះឲ្យទៅ យ៉ុន សំអុល មើលថែដោយខ្លួនឯងវិញ ហើយឈ្មោះ យ៉ុន សំអុល ក៏បានទទួលយកទៅចិញ្ចឹមមើលថែ នៅឯផ្ទះម្តាយរបស់ខ្លួនឯងនៅភូមិទួលប្រសើរវិញដែរ។ នៅថ្ងៃទី២៦ កក្កដា ២០១៨ ឈ្មោះ យ៉ុន លីគា ក៏បាទាស់ពាក្យសម្តីជាមួយឈ្មោះ យ៉ុន សំអុល ពីរឿងអស់ផ្លែខ្វិតពីដើម។ ក្នុងថ្ងៃដដែលនោះដែរឈ្មោះ ឡេង លីគា ខឹងឈ្មោះ យ៉ុន សំអុល ក៏បានទៅលួចដឹកគោមេរបស់ប្អូនធម៌ យកទៅទុកនៅផ្ទះរបស់ខ្លួនបាត់។
លុះដល់ថ្ងៃទី២៨ កក្កដា ២០១៨ ពេលល្ងាចឈ្មោះ យ៉ុន សំអុលបានអញ្ជើញប្រធានភូមិ និង ប្រជាការពារទៅជួយសុំគោ ពីបងធម៌មកវិញ តែពេលនោះត្រូវបងធម៌ឈ្មោះ ឡេង លីគា បានវាយទៅលើប្អូនធម៌ឈ្មោះ យ៉ុន សំអុល ចំនួនបីដៃ និងមិនព្រមប្រគល់មេគោឲ្យប្អូនធម៌វិញទេ។ ទើបនៅថ្ងៃទី០២ សីហា ២០១៨ ជនរងគ្រោះឈ្មោះ យ៉ុន សំអុល បានសម្រេចចិត្តដាក់ពាក្យបណ្តឹង ប្តឹងបងធម៌ដែលបានប្រើអំពើហិង្សាលើខ្លួន ដើម្បីទាមទាររកយុត្តិធម៌មកវិញ។ ក្រោយពីសមតត្ថកិច្ចទទួលបានបណ្តឹងហើយ មន្ត្រីជំនាញនគរបាលផ្នែកព្រហ្មទណ្ឌស្រុកប្រាសាទ ខេត្តឧត្តរមានជ័យ បានធ្វើការស្រាវជ្រាវ និងបានកោះហៅជនសង្ស័យទៅសាកសួរ ដើម្បីរកការពិត ងាយស្រួលរកយុត្តិធម៌ដល់ភាគីដើមចោទ និងចុងចម្លើយ។
ក្រោយពីសាកសួរជនសង្ស័យ បានសារភាពថា ខ្លួនពិតជាបានលួចយកមេគោរបស់ប្អូនធម៌មែន។ ដោយមានការសម្របសម្រួល ពីសំណាក់លោកព្រះរាជអាជ្ញាអមសាលាដំបូងខេត្តឧត្តរមានជ័យ តម្រូវឲ្យសមត្ថកិច្ចធ្វើការឃាត់ខ្លួន ជនសង្ស័យ និងចាប់យកវត្ថុតាង មេគោ១ក្បាលប្រគល់ឲ្យជនរងគ្រោះវិញ។ ចំពោះករណីខាងលើនេះ សមត្ថកិច្ចបាន និងកំពុងរៀបចំកសាងសំណុំរឿង បញ្ជូនជនសង្ស័យទៅសាលាដំបូងខេត្តការតាមនីតិវិធី ៕
ចែករំលែកព័តមាននេះ