រាជធានីភ្នំពេញ ៖ ក្មេងប្រុសដុះសាច់ក្នុងភ្នែកលៀនចេញមកក្រៅ ដែលសារព័ត៌មានកោះសន្តិភាពបានចុះផ្សាយកាលពីថ្ងៃចន្ទ កន្លងមកនោះ ត្រូវបានលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាមានក្តីអាណិតអាសូរ ហើយបានចាត់តាំងលោកឌួង អេលីត នាយកពិធីការនាំក្មេងប្រុសរូបនោះព្រមទាំងឪពុកម្តាយទៅមន្ទីរពេទ្យកាល់ម៉ែតកាលពីព្រឹកថ្ងៃទី៧ ធ្នូ ដើម្បីឱ្យក្រុមវេជ្ជបណ្ឌិតជំនាញកម្ពុជា និងបរទេសពិនិត្យ និងវាយតំលៃឈានទៅធ្វើការវះកាត់ព្យាបាល ។ លោកឌួង អេលីត នាយកពិធីការលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាមានប្រសាសន៍ថា បន្ទាប់ពីលោកជំទាវបណ្ឌិតប៊ុន រ៉ានី ហ៊ុន សែន ឃើញសារព័ត៌មានកោះសន្តិភាពចេញផ្សាយស្តីពី «ក្មេងប្រុសដុះសាច់ក្នុងភ្នែកលៀនចេញមកក្រៅគួរអាណិត» នោះកាលពីថ្ងៃទី៦ ធ្នូ ២០១០ លោកជំទាវបណ្ឌិតបានចាត់តាំងឱ្យលោកទៅលំនៅឋានក្មេងប្រុសរូបនោះដោយសហការជាមួយអាជ្ញាធរមូលដ្ឋាន ហើយនៅព្រឹកថ្ងៃ ទី៧ ធ្នូ ២០១០ លោកបាននាំក្មេងប្រុសដុះសាច់ក្នុងភ្នែករូបនេះទៅកាន់មន្ទីរពេទ្យកាល់ម៉ែត ដើម្បីឱ្យវេជ្ជបណ្ឌិតជំនាញពិនិត្យ និងព្យាបាល ។
ឪពុកកុមារាអភ័ព្វបាននិយាយថា កូនប្រុសរបស់លោកត្រូវវេជ្ជបណ្ឌិតកម្ពុជា និងបរទេសនាំគ្នាមកពិនិត្យភ្នែកដែលដុះសាច់ ហើយបញ្ជូនទៅពិនិត្យឈាម ថតសួត អេកូ និងស្គែន នៅព្រឹកថ្ងៃទី៨ ធ្នូ ២០១០ បន្តទៀត តែលទ្ធផលបែបណានោះ លោកគ្រូពេទ្យមិនទាន់បានឱ្យដឹងទេ ។ លោកវេជ្ជបណ្ឌិតជំនាញជំងឺភ្នែកមួយរូបបាននិយាយថា ពេលនេះក្រុមគ្រូពេទ្យមិនទាន់ហ៊ានវាយតំលៃបែបណាទេ គឺរង់ចាំលទ្ធផលពិនិត្យឈាម សួត អេកូ និងស្គែន ហើយពិនិត្យយ៉ាងយកចិត្តទុកដាក់ទើបឈានទៅវះកាត់យកដុំសាច់នោះ ។ ពេលនេះវេជ្ជបណ្ឌិតមិនទាន់សន្និដ្ឋានអំពីដុំសាច់ដែលដុះលៀនចេញមកខាងក្រៅបណ្តាលមកពីជំងឺអ្វីនៅឡើយទេ ។ លោកឌួង អេលីត បានលើកឡើងថា ជានិច្ចកាលលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាតែងតែយកចិត្តទុកដាក់ទៅលើជីវភាពរស់នៅរបស់ប្រជាពលរដ្ឋទូទាំងប្រទេសដោយមិនប្រកាន់ពណ៌សំបុរនោះទេ ។ ជាក់ស្តែងដូចករណីកុមារាដុះសាច់នៅភ្នែកនេះ ពេលលោកជំទាវបណ្ឌិតជ្រាបភ្លាម បានចាត់តាំងលោកឱ្យស្វែងរក ហើយបញ្ជូនទៅព្យាបាលនៅមន្ទីរពេទ្យដោយមិនឱ្យក្រុមគ្រួសារភ័យព្រួយចំពោះថវិកាព្យាបាលឡើយ ។
លោកប៉ុម សារុំ ជាឪពុកកុមារាអភ័ព្វបានថ្លែងថា លោកនិងភរិយាមានក្តីរំភើបរីករាយក្រៃលែងរកអ្វីមកផ្ទឹមពុំបានឡើយ បន្ទាប់ពីទទួលដំណឹងថា លោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាអាណិតអាសូរ ដល់កូនប្រុសរបស់លោក ហើយជួយបញ្ជូនទៅព្យាបាលនៅមន្ទីរពេទ្យកាល់ម៉ែតដោយពុំអស់ប្រាក់ ហើយលោកបានចាត់ទុកលោកជំទាវបណ្ឌិតប៊ុន រ៉ានី ហ៊ុន សែន ជាម្តាយទីពីរ ដែលស្រោចស្រង់ជីវិតកូនរបស់លោក ។ ជាមួយគ្នានេះដែរ លោកនិងភរិយាក៏មិនភ្លេចគុណលោកវេជ្ជបណ្ឌិតទាំងអស់ ជាពិសេសលោកវេជ្ជបណ្ឌិតឈាង រ៉ា នាយកមន្ទីរពេទ្យកាល់ម៉ែត ដែលបានយកចិត្តទុកដាក់ជួយជ្រោមជ្រែងតាមដានពិនិត្យសុខភាពកូនរបស់លោក ។ ក្មេងប្រុសអភ័ព្វដែលដុះដុំសាច់ក្នុងភ្នែកឈ្មោះបេន មករា អាយុ៤ឆ្នាំ ឪពុកឈ្មោះប៉ុម សារុំ អាយុ៣៧ឆ្នាំ និងម្តាយឈ្មោះជួប សារិន អាយុ៣២ឆ្នាំ ជាជាងកាត់សក់ ស្នាក់នៅផ្ទះជួល ក្នុងភូមិប៉ប្រកខាងត្បូង សង្កាត់កាកាប ខណ្ឌដង្កោ ។ កុមារអភ័ព្វចាប់ផ្តើមកើតជំងឺនៅភ្នែកខាងឆ្វេងតាំងពីឆ្នាំ២០០៩មក ខណៈអាយុ២ឆ្នាំ ៕
ចែករំលែកព័តមាននេះ