រាជធានីភ្នំពេញ ៖ ជីវិតពិតជាគ្មានអ្វីដែលទៀងទាត់ឡើយ ថ្ងៃនេះជួបសើចសប្បាយក្អាកក្អាយជុំបងជុំប្អូន ក្រុមគ្រួសារសាច់ញាតិ លុះថ្ងៃស្អែកត្រូវបែកព្រាត់គ្មានថ្ងៃត្រឡប់វិញជារៀងរហូត។ ជាក់ស្ដែងបុរសម្នាក់ រួមនឹងប្អូនស្រី បាននាំគ្នាទៅលេងផ្ទះបង ហើយពេលទៅដល់មានកម្មវិធីផឹកស៊ីជុំគ្នាយ៉ាងសប្បាយ…
រាជធានីភ្នំពេញ ៖ ជីវិតពិតជាគ្មានអ្វីដែលទៀងទាត់ឡើយ ថ្ងៃនេះជួបសើចសប្បាយក្អាកក្អាយជុំបងជុំប្អូន ក្រុមគ្រួសារសាច់ញាតិ លុះថ្ងៃស្អែកត្រូវបែកព្រាត់គ្មានថ្ងៃត្រឡប់វិញជារៀងរហូត។ ជាក់ស្ដែងបុរសម្នាក់ រួមនឹងប្អូនស្រី បាននាំគ្នាទៅលេងផ្ទះបង ហើយពេលទៅដល់មានកម្មវិធីផឹកស៊ីជុំគ្នាយ៉ាងសប្បាយ ក្រោយពេលស្រវឹងបានដេកស្នាក់នៅផ្ទះបង១យប់។ លុះព្រឹកឡើងបានត្រឡប់ទៅផ្ទះជួលវិញរួចបាន ចូលដេកក្នុងបន្ទប់តែម្នាក់ឯង ហើយក៏បានស្លាប់ដោយគ្មានអ្នកដឹងឡើយ ចំណែកប្អូនស្រីមិនបានត្រឡប់ ទៅផ្ទះវិញជាមួយឡើយព្រោះជាប់រវល់ជួយលក់បង្អែមបងប្អូន។
ហេតុការណ៍នោះបានកើតឡើង បង្កឲ្យមានការភ្ញាក់ផ្អើល កាលពីវេលាម៉ោង៣ និង៣០នាទីរសៀល ថ្ងៃទី៥ ខែសីហា ឆ្នាំ២០១៨ នៅបន្ទប់ជួលលេខ៣ ស្ថិតនៅក្នុងភូមិប៉ប្រកខាងត្បូង សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។ នគរបាលបានឲ្យដឹងថា បុរសដែលដេកស្លាប់នោះឈ្មោះ ឆៃ រ៉ា អាយុ២៦ឆ្នាំជាសិស្សរៀនភាសាកូរ៉េ និងមានមុខរបរមួយទៀតធ្វើជាជាងសំណង់ មានស្រុកកំណើតនៅភូមិត្រពាំងឈូក ឃុំជ្រលង ស្រុកបារាយណ៍ ខេត្តកំពង់ធំ។ សព្វថ្ងៃស្នាក់នៅបន្ទប់លេខ៣ ផ្ទះជួលនៅក្នុងភូមិប៉ប្រកខាងត្បូង សង្កាត់កាកាប១។
តាមការសន្និដ្ឋានបុរសនេះស្លាប់ដោយសារតែជំងឺខ្យល់គ ដែល បណ្ដាលមកពីគាត់ផឹកស្រាច្រើនកាលពីវេលាយប់ហើយពេលចូលដេកក៏ស្លាប់តែម្ដង។ ដោយឡែកស្ត្រី ម្នាក់ ឈ្មោះ ឆៃ សារ៉េត អាយុ១៧ឆ្នាំ មុខរបរកម្មការិនីរោងចក្រកាត់ដេរត្រូវជាប្អូនស្រីបង្កើតរបស់បុរស ដែលស្លាប់នោះបាននិយាយថា នាង និងបងប្រុសបានស្នាក់នៅក្នុងបន្ទប់ជួលជាមួយគ្នា ហើយកាលពីវេលាល្ងាចថ្ងៃទី៤ ខែសីហា បងប្រុសខាងលើបានបបួលនាងទៅលេងផ្ទះបងប្រុសម្នាក់ទៀត ដែលស្ថិតនៅក្នុងភូមិកើតហេតុនោះដែរ។
លុះពេលទៅដល់បានបង្កើតកម្មវិធីផឹកស៊ីសប្បាយជួបជុំគ្នា រហូតដល់ស្រវឹងទើបឈប់ ហើយបងប្រុសនាង និងនាងបានសម្រេចចិត្តដេកនៅផ្ទះបង១យប់ មិនបានត្រឡប់ទៅ បន្ទប់ជួលទាំងយប់វិញឡើយ។ លុះដល់វេលាម៉ោងជាង៦ព្រឹក ថ្ងៃទី៥ ខែសីហា ដែលជាថ្ងៃបន្ទាប់ បងប្រុសដែលជាជនរងគ្រោះរូបនោះបានជិះម៉ូតូត្រឡប់ទៅបន្ទប់ផ្ទះជួលវិញតែម្នាក់ឯង ចំណែកនាងមិនបានទៅជាមួយឡើយព្រោះជាប់រវល់ទៅជួយលក់បង្អែមបងប្អូន។ ស្ត្រីខាងលើបាន រៀបរាប់ឲ្យដឹងបន្តទៀតថា នាងមិនស្មានថា មានរឿងបែបនេះកើតឡើងឡើយ ហើយដោយសារតែ រវល់ការងារច្រើន។
រហូតដល់វេលាម៉ោង១២ថ្ងៃត្រង់ថ្ងៃដដែលទើបនាង និងបងប្អូនផ្សេងទៀត បាននាំគ្នាខលរកជនរងគ្រោះដើម្បីសួរនាំពីសុខភាពគាត់ព្រោះដឹងថាពីល្ងាចស្រវឹងខ្លាំង។ ប៉ុន្តែខណៈនោះខលចូលជាច្រើនដងបែរជាគាត់មិនទទួលសោះទើបមានការសង្ស័យក៏បាននាំគ្នាទៅមើល តែពេលទៅដល់ឃើញបិទទ្វារខ្ទាស់គន្លឹះពីខាងក្នុងជាប់។ ប្រភពដដែលបានបន្តទៀតថា ពេលនោះនាង និងបងប្អូនបានស្រែកហៅជាច្រើនដង ប៉ុន្តែមិនឮឆ្លើយ ឬចេញមកបើកទ្វារឡើយ ទើបធ្វើឲ្យរឹតតែមាន ការងឿងឆ្ងល់កាន់តែខ្លាំងឡើងៗ និងបានបង្កឲ្យមានការភ្ញាក់ផ្អើលដល់អ្នកជិតខាងថែមទៀត។
ខណៈនោះដោយមានការសង្ស័យខ្លាចគត់ចងកសម្លាប់ខ្លួនអ្នកជិតខាងក៏បាននាំគ្នាជួយឡើងអឺតមើលតាមប្រហោងឥដ្ឋខ្យល់ ប៉ុន្តែមិនបានឡើយ។ បន្ទាប់មកមកនាំគ្នាយករណារអារដែករបស់អ្នកជិតខាងទៅ អារផ្ដាច់ទ្វារ រួចបើកចូលទៅមើលដល់ក្នុងបន្ទប់ ទើបឃើញជនរងគ្រោះដេកស្លាប់នៅលើឥដ្ឋការ៉ូ ក្បាលចូលក្រោមគ្រែបាត់ទៅហើយ។ ក្រោយពេលកើតហេតុបងប្អូនបាន រាយការណ៍ជូននគរបាល ប៉ុស្ដិ៍ឲ្យចុះទៅពិនិត្យមើល និងរាយការណ៍បន្ដទៅកាន់នគេបាលការិយាល័យបច្ចេកទេស នៃស្នងការ ដ្ឋាននគរបាលរាជធានីភ្នំពេញ ដើម្បីធ្វើការពិនិត្យ និងកោសល្យវិច្ច័យ ហើយលទ្ធផលសង្ស័យថា បុរសនោះស្លាប់ដោយជំងឺខ្យល់គ៕
https://youtu.be/Gn5-sdzgByM
ចែករំលែកព័តមាននេះ