រាជធានីភ្នំពេញ ៖ កម្លាំងនគរបាលផ្នែកសន្តិសុខ រួមជាមួយផ្នែកប្រឆាំងគ្រឿងញៀន និងផ្នែកអន្តរាគមន៍ខណ្ឌពោធិ៍សែនជ័យ ព្រមទាំងនគរបាលប៉ុស្តិ៍ចោមចៅ៣ បានធ្វើការស្រាវជ្រាវរហូតចាប់ខ្លួនជនសង្ស័យជួញដូរគ្រឿងញៀនចំនួន២នាក់ និងដកហូតបានគ្រឿងញៀនចំនួន៦កញ្ចប់ និងជញ្ជីងថ្លឹងគ្រឿងញៀន១ផងដែរ។ ហេតុការណ៍នោះបានកើតឡើង កាលពីវេលាម៉ោង១និង១០នាទីរសៀលថ្ងៃទី៥ ខែសីហា ឆ្នាំ២០១៨ នៅក្នុងភូមិព្រៃព្រីងខាងជើង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យទាំង២នាក់ខាងលើ ម្នាក់ឈ្មោះ ឯក សារិន អាយុ២៩ឆ្នាំ ស្នាក់នៅក្នុងភូមិកើតហេតុខាងលើហើយកម្លាំងនគរបាលដកហូតបានថ្នាំញៀនចំនួន៥កញ្ចប់តូច និងជញ្ជីងថ្លឹងថ្នាំញៀន១គ្រឿង ព្រមទាំងម៉ូតូ ១គ្រឿង ម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៍ក្រហម ពាក់ស្លាកលេខ ភ្នំពេញ ១HB-៨៣០១។ ចំណែកម្នាក់ទៀតមិនទាន់ត្រូវបានស្គាល់ឈ្មោះនោះឡើយ ហើយកម្លាំងនគរបានដកហូតបានគ្រឿងញៀន១កញ្ចប់ធំ ម៉ូតូមួយគ្រឿងម៉ាកយ៉ាម៉ាហា អុិចស៊ិនទ័រ ពណ៍ខ្មៅ ពាក់ស្លាកលេខ ភ្នំពេញ ១FQ-៩៨១៦ ហើយជននេះត្រូវចាប់ខ្លួននៅតាមផ្លូវចូលផែស្ងួត ក្នុងភូមិជម្ពូវ័ន សង្កាត់ចោមចៅ៣ ។
តាមប្រភពព័ត៌មានបានបន្តទៀតថា នៅមុនពេលកើតហេតុ កម្លាំងនគរបាលខាងលើបានធ្វើការស្រាវជ្រាវលើមុខសញ្ញាបទល្មើសគ្រប់ប្រភេទ ហើយក្រោយមកបានទទួលព័ត៌មានពីប្រជាពលរដ្ឋថាមានជនសង្ស័យកំពុងជួញដូរគ្រឿងញៀននៅចំណុចកើតហេតុទាំង២ចំណុចនោះ ទើបកម្លាំងចុះធ្វើការចាប់ខ្លួនជនសង្ស័យទាំង២នាក់បានភ្លាមៗតែម្ដង បន្ទាប់មកបាននាំទៅសាកសួរដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ