ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់បន្ទាប់ពីជិះម៉ូតូទៅបុកជាមួយនឹងរថយន្ត ក្នុងទិសបញ្ច្រាសគ្នានៅចំណុចផ្លូវបំបែកជា៤ ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។ ហេតុការណ៍នេះបានកើតឡើងកាលពីវេលាម៉ោង៤និង១០នាទីល្ងាចថ្ងៃទី៤ ខែសីហា…
ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់បន្ទាប់ពីជិះម៉ូតូទៅបុកជាមួយនឹងរថយន្ត ក្នុងទិសបញ្ច្រាសគ្នានៅចំណុចផ្លូវបំបែកជា៤ ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។ ហេតុការណ៍នេះបានកើតឡើងកាលពីវេលាម៉ោង៤និង១០នាទីល្ងាចថ្ងៃទី៤ ខែសីហា ឆ្នាំ ២០១៨។
សមត្ថកិច្ចនគរបាលចរាចរណ៍ក្រុងកំពង់ឆ្នាំង បានឱ្យដឹងថា ជនរងគ្រោះខាងលើឈ្មោះ ហម ណាវីន ភេទប្រុស អាយុ១៩ឆ្នាំ មានទីលំនៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។
ប្រភពដដែលបានបន្តថា មុនពេលកើតហេតុ ជនរងគ្រោះខាងលើបានជិះម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពាក់ស្លាកលេខ កំពង់ឆ្នាំង ១G-៦៨៩៦ បើកបរក្នុងទិសដៅពីកើតមកលិច លុះមកដល់ចំណុចកើតហេតុ ស្រាប់តែជ្រុលទៅបុករថយន្តមួយគ្រឿងម៉ាកហ៊ីយ៉ាន់ដាយ ជាប្រភេទរថយន្តដឹកកុងតឺន័រ ពាក់ស្លាកលេខ ភ្នំពេញ ៣D-៧៦៣៦ យ៉ាងពេញទំហឹង បណ្ដាលឲ្យជនរងគ្រោះដែលជាអ្នកបើកបរម៉ូតូបានបោកក្បាលទៅនឹងរថយន្តរួចក៏ធ្លាក់មកបោកនឹងថ្នល់ទៀត បណ្តាលឱ្យបែកក្បាលហូរឈាមរងរបួសយ៉ាងធ្ងន់ធ្ងរ ។ ដោយឡែកអ្នកបើកបររថយន្តបានរត់គេចខ្លួនបាត់ស្រមោល ។
ជុំវិញករណីគ្រោះថ្នាក់ចរាចរណ៍ខាងលើនេះ សមត្ថកិច្ចបានបញ្ជាក់ថា គឺបណ្ដាលមកពីអ្នកបើកបរម៉ូតូខ្វះការប្រុងប្រយ័ត្នជិះចូលចំណែកផ្លូវទៅខាងឆ្វេងដៃ ទើបបុករថយន្តតែម្ដង ។
ក្រោយពេលកើតហេតុ សមត្ថកិច្ចបានពិនិត្យ និងវាស់វែងរួចក៏បានហៅរថយន្តសង្គ្រោះមកដឹកយក ជនរងគ្រោះទៅព្យាបាលនៅមន្ទីរពេទ្យខេត្តកំពង់ឆ្នាំង ។ ចំណែករថយន្តនិងម៉ូតូត្រូវបានសមត្ថកិច្ចយកទៅរក្សាទុកនៅក្រុងកំពង់ឆ្នាំង ដើម្បីដោះស្រាយតាមនីតិវិធី ៕
ចែករំលែកព័តមាននេះ