រាជធានីភ្នំពេញ ៖ ក្នុងរយៈពេល១ឆ្នាំចុងក្រោយនេះ អ្នកជំនាញអចលនទ្រព្យកម្ពុជាមើលឃើញថា តម្លៃដីធ្លីនៅខណ្ឌព្រែកព្នៅ កំពុងបង្ហាញសញ្ញាងើបឡើងគួរឱ្យកត់សម្គាល់ បើធៀបនឹងកាលពីចុងឆ្នាំ២០១៧ ។ ការកើនឡើងនេះ ដោយសារតែកំណើននៃប្រជាសាស្ត្រ ដែលកំពុងមានតម្រូវលំនៅឋានសម្រាប់ស្នាក់នៅ និងភាពរីកចម្រើននៃខណ្ឌផ្សេងៗដែលនៅជាប់គ្នា បានជះឥទ្ធិពលវិជ្ជមានដល់ការអភិវឌ្ឍនៅខណ្ឌនេះដែរ។
តាមនាយកក្រុមហ៊ុន KEY REAL ESTATE បានប្រាប់កោះសន្ដិភាពថា ក្នុងចំណោមខណ្ឌ១២របស់រាជធានីភ្នំពេញ ខណ្ឌព្រែកព្នៅកំពុងលេចធ្លោគួរឲ្យកត់សម្គាល់ ទាំងប្រភេទតម្លៃដីលំនៅឋាន និងពាណិជ្ជកម្ម ។ បើធៀបនឹងតម្លៃពីមុន និងតម្លៃដីក្នុងខណ្ឌដែលនៅជាប់គ្នា គឺកើនឡើងប្រមាណ១០% ។
លោក សន សៀប នាយកក្រុមហ៊ុនរូបនេះបានប្រសាសន៍ថា ៖« បើយើងមើលជារួមក្នុងចំណោមខណ្ឌទាំង១២ ឃើញថា ខណ្ឌព្រែកព្នៅ កំពុងលេចធ្លោ ។ ខណ្ឌនេះ ខ្ញុំបានសិក្សានៅចុងឆ្នាំ២០១៧ តម្លៃដីនៅទាបជាងគេ តែមកដល់ឆមាសទី១ ឆ្នាំ២០១៨នេះ ខ្ញុំសង្កេតឃើញថា តម្លៃដីប្រភេទលំនៅឋាន ធៀបនឹងខណ្ឌដង្កោ គឺស្មើគ្នា ហើយប្រភេទដីដែលអាចរកស៊ីបាន ខ្ពស់ជាងគេបន្តិច ។ អីចឹង បើយើងគិតពីកំណើនតម្លៃដីនៅខណ្ឌព្រែកព្នៅ វាលូតខ្ពស់ជាងគេគួរឱ្យកត់សម្គាល់ » ។
លោកបញ្ជាក់ថា ៖« កាលពីចុងឆ្នាំ២០១៧ តម្លៃដីលំនៅឋានគិតជាមធ្យម ៩០ដុល្លារក្នុង១ម៉ែត្រការ៉េ តែមកដល់ឆមាសទី១ឆ្នាំនេះ បានឡើងដល់១០០ដុល្លារក្នុង១ម៉ែត្រការ៉េ។ ចំណែកដីពាណិជ្ជកម្មវិញ បានកើនឡើងពី៣៣០ដុល្លារទៅ៣៤០ដុល្លារក្នុង១ម៉ែត្រការ៉េ»។
កត្តាដែលជំរុញឲ្យខណ្ឌនេះរីកលូតលាស់លឿនគួរឲ្យចាប់អារម្មណ៍នេះ ដោយសារតែខណ្ឌសែនសុខកំពុងតែអភិវឌ្ឍន៍ខ្លាំងដែលបានជះឥទ្ធិពលជាវិជ្ជមានដល់ខណ្ឌដែលនៅជាប់គ្នា ។
លោក សន សៀប គូសបញ្ជាក់ថា ៖« ខ្ញុំឃើញថា ខណ្ឌព្រែកព្នៅនេះមានកត្តាមួយចំនួនដែលជំរុញឲ្យតម្លៃដីធ្លីងើបឡើងគឺទី១- វារីករាលដាលចេញពីខណ្ឌសែនសុខ ព្រោះខណ្ឌសែនសុខកំពុងមានការអភិវឌ្ឍច្រើន ។ ទី២-វាជាប់ជាមួយតំបន់អភិវឌ្ឍន៍លីយ៉ុងផាត់ដែលនៅតំបន់ព្រែកព្នៅនេះ មានបឹងមួយកំពុងមានការអភិវឌ្ឍ។ លើសពីនេះ បើតាមព័ត៌មានលេចឮតៗគ្នាគឺថា គេនឹងធ្វើឱ្យតំបន់នោះក្លាយជាតំបន់ទេសចរណ៍មួយ ។ ចំណុចទាំងនេះហើយដែលធ្វើឱ្យតម្លៃដីនៅខណ្ឌព្រែកព្នៅលេចធ្លោ »។
លោកកត់សម្គាល់ថា ៖« ខណ្ឌនេះបានចាប់ផ្ដើមរីកលូតលាស់តាំងពីឆ្នាំ២០១៧មក ពិសេស សម្បូរដោយដីពុះឡូត៍ ហើយតម្លៃដីឡើងរហូត និងថ្លៃជាងតម្លៃដីនៅខណ្ឌដង្កោ »។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ក្រុមហ៊ុន Emerging Markets Consulting លោក ង៉ែត ជូ បានឲ្យដឹងដែរថា ខណ្ឌព្រែកព្នៅនេះ ស្ថិតនៅជាប់ខណ្ឌដែលរីកចម្រើនមួយចំនួនដូចជា ខណ្ឌពោធិ៍សែនជ័យ ខណ្ឌឫស្សី និងខណ្ឌសែនសុខជាដើម។ លើសពីនេះ ឥរិយាបថរបស់មនុស្សកំពុងពុះកញ្ជ្រោលទៅលើអ្វីដែលជាតម្រូវការចាំបាច់ ។
លោកមានប្រសាសន៍ថា ៖« តាមពិតទៅ ខណ្ឌព្រែកព្នៅនេះ វាជាប់ខណ្ឌពោធិ៍សែនជ័យ, ខណ្ឌសែនសុខ និងខណ្ឌឫស្សីកែវ ជាដើម ហើយមួយរយៈចុងក្រោយនេះមានការរីកចម្រើនខ្លាំង ដោយសារវាបន្តរីករាលចេញពីខណ្ឌទាំងនេះទៅ។ ទន្ទឹមនឹងនេះ ការកើនឡើងនៃចំនួនប្រជាពលរដ្ឋរស់នៅក្រុងភ្នំពេញ ហើយមួយផ្នែកទៀត គឺលក្ខណៈចិត្តសាស្ត្រ ជាឥរិយាបថមនុស្សច្រើនជាង ដោយមានការពុះកញ្ជ្រោលបន្ថែមទៅលើអ្វីដែលជាសេចក្តីត្រូវការចាំបាច់ » ។
លោកលើកឡើងថា ៖« បើយើងមើលអំពីកំណើនប្រជាពលរដ្ឋ និងការព្យាករតម្រូវការលំនៅឋានទៅថ្ងៃអនាគត ក្នុងមួយឆ្នាំមានពី៤ឬ១០ម៉ឺនល្វែង នៅឆ្នាំ២០៣០ ។ អីចឹង ចង់មិនចង់ ខណ្ឌព្រែកព្នៅហ្នឹងជាទិសដៅសំខាន់មួយទទួលយកការរីកដុះដាលខាងផ្នែកលំនៅឋានពីក្រុងភ្នំពេញទៅ » ៕
ចែករំលែកព័តមាននេះ