រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី០៤ សីហានេះបានសម្រេចចេញដីកាឃុំខ្លួនប្រធានអង្គការ LCDI ម្នាក់ និងអាជីវករម្នាក់ដាក់ពន្ធនាគារ PJ ជាបណ្តោះអាសន្ន ក្រោមការចោទប្រកាន់ពីបទ ប៉ុនប៉ងឆបោក និងបទប្រើប្រាស់ឯកសារសាធារណៈក្លែង ដែលប្រព្រឹត្តនៅហាងកាហ្វេអ៊ិនថៈនីន ផ្លូវ៣៦០ សង្កាត់បឹងកេងកង១ ខណ្ឌចំការមន រាជធានីភ្នំពេញ កាលពីថ្ងៃទី៣១ កក្កដា ២០១៨ ។
ដែលបទល្មើសនេះយោងតាមមាត្រា៣៧៧ មាត្រា៣៧៨ និងមាត្រា៦៣០ នៃក្រមព្រហ្មទណ្ឌ ។ ដីកាសម្រេចឲ្យឃុំខ្លួនឈ្មោះ គឹម គន្ធា ហៅធា ភេទប្រុស អាយុ៣៩ឆ្នាំ មុខរបបជាប្រធានអង្គការ LCDI មានស្រុកកំណើតខេត្តកំពត និងសព្វថ្ងៃស្នាក់នៅផ្លូវលេខ៩ សង្កាត់ទន្លេបាសាក់ខណ្ឌចំការមន និងឈ្មោះ គួយ ភារម្យ ហៅវង្ស រ៉ាយុត ហៅខេម ភេទប្រុស អាយុ២៩ឆ្នាំ មុខរបបលក់ដូរ មានស្រុកកំណើតនៅខេត្តតាកែវ និងស្នាក់នៅជាមួយឈ្មោះ គឹម គន្ធ ដែរ ។
ជនសង្ស័យទាំង២នាក់ត្រូវបានសមត្ថកិច្ចការិយាល័យបទល្មើសព្រហ្មទណ្ឌនៃកងរាជអាវុធហត្ថរាជធានីភ្នំពេញធ្វើការឃាត់ខ្លួន កាលពីវេលាម៉ោង៥ល្ងាច ថ្ងៃទី៣១ កក្កដា ២០១៨ តាមពាក្យបណ្តឹងរបស់ឈ្មោះ ចាំង សុផាត ភេទប្រុស អាយុ៤១ឆ្នាំ មុខរបបជាមន្ត្រីនគរបាលជាតិ មានទីលំនៅភូមិ៥ សង្កាត់ទំនប់ទឹក ខណ្ឌចំការមន ។
ទាក់ទិន និងការឃុំខ្លួនជនសង្ស័យ២នាក់ខាងលើនេះត្រូវបានសមត្ថកិច្ចបង្ហើបឲ្យដឹងថា កាលពីថ្ងៃទី២៥ កក្កដា ការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញបានទទួលពាក្យបណ្តឹងជនរងគ្រោះឈ្មោះ ចាំង សុផាត ដែលបានប្តឹងទៅលើជនសង្ស័យ២នាក់នោះពីបទឆបោកជាប្រពន្ធ និងប្រើប្រាស់ឯកសារសាធារណៈក្លែង ។
តាមពាក្យបណ្តឹងរបស់ជនរងគ្រោះបានបញ្ជាក់ថា នៅក្នុងអំឡុងខែកក្កដា ២០១៨ គឺជនសង្ស័យ២នាក់បានយកប្លង់ដីមួយកន្លែងនៅសង្កាត់ព្រៃស ខណ្ឌដង្កោ រាជធានីភ្នំពេញ ដែលមានចំនួន១ហិកតាកន្លះ ដែលសុទ្ធសឹងជាឯកសារក្លែងបំណងយកទៅដាក់បញ្ចាំឲ្យខ្លួន លើទឹកប្រាក់ចំនួន៥០ម៉ឺនដុល្លារអាមេរិក ។ ប៉ុន្តែក្រោយមកជនសង្ស័យ និងដើមបណ្តឹងបានជួបចចារត្រូវរ៉ូវគ្នានៅត្រឹម៣០ម៉ឺនដុល្លារទេ ហើយបានណាត់គ្នាប្រគល់ប្រាក់ ។ លុះពេលកំពុងរាប់លុយនៅហាងកាហ្វេមួយក្នុងខណ្ឌទួលគោកក៏ស្រាប់តែកម្លាំងសមត្ថកិច្ចឃាត់ខ្លួន ជនសង្ស័យទាំងពីរនាក់នោះ ដោយពិនិត្យលើឯកសារសុទ្ធតែក្លែងក្លាយ ។
ក្រោយពីឃាត់ខ្លួនជនសង្ស័យបានសារភាពដោយមានភាពស៊ីសង្វាក់គ្នាទៅ និងពាក្យបណ្តឹង ដូច្នោះសមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជាធានីភ្នំពេញតាមនីតិវិធី ៕
ចែករំលែកព័តមាននេះ