ខេត្តបាត់ដំបង ៖ ក្រោយពេលបោះឆ្នោតកងកម្លាំង កងទ័ពពង្រឹងការងារនៅក្នុងអង្គភាពបន្ថែមទៀត ដើម្បីធានាគុណភាព ប្រសិទ្ធិភាព ផលប្រយោជន៍ដល់ប្រទេសជាតិ និងប្រជាពលរដ្ឋកំពុងរស់នៅក្នុងភាពសុខសន្តិភាព និងការអភិវឌ្ឍ ។…
ខេត្តបាត់ដំបង ៖ ក្រោយពេលបោះឆ្នោតកងកម្លាំង កងទ័ពពង្រឹងការងារនៅក្នុងអង្គភាពបន្ថែមទៀត ដើម្បីធានាគុណភាព ប្រសិទ្ធិភាព ផលប្រយោជន៍ដល់ប្រទេសជាតិ និងប្រជាពលរដ្ឋកំពុងរស់នៅក្នុងភាពសុខសន្តិភាព និងការអភិវឌ្ឍ ។
នេះជាបណ្តាំផ្តាំផ្ញើបស់លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ក្នុងកម្មវិធីបំពាក់ឋានន្តរសក្តិ និងប្រគល់មុខងារដល់នាយទាហានដល់អង្គភាពកងពលតូចថ្មើរជើងលេខ៥៣ ស្ថិតនៅភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង ។
ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក លោកឧត្តមសេនីយ៍ទោ ឯក សំអូន មេបញ្ជាការរង នាយសេនាធិការយោធភូមិភាគទី៥ ព្រមទាំងមេបញ្ជាការរង អង្គភាពនានាចំណុះកងពលឈរជើងតាមព្រំដែន សរុបចំនួន២០៣នាក់ បានធ្វើឡើងនៅវេលាព្រឹកថ្ងៃទី០៤ ខែសីហា ឆ្នាំ២០១៨ ។ ដោយបានស្តាប់អំពីរបាយការណ៍ពីលោកឧត្តមសេនីយ៍ទោ ជា ភួងភិរម្យ មេបញ្ជាការរងយោធភូមិភាគទី៥ មេបញ្ជាការកងពលលេខ៥៣ បានរាយការណ៍ថា នេះជាមោទនភាពរបស់អង្គភាពកងពលលេខ៥៣យើងខ្ញុំ ដែលបានថ្នាក់ដឹកនាំ និងរាជរដ្ឋាភិបាលបានឃើញពីស្នាដៃក្នុងការងារការពារកសាងប្រទេសរួមគ្នាកន្លងមក ហើយគ្រប់ៗគ្នាក៏បានទៅបោះឆ្នោតបំពេញកាតព្វកិច្ចជាពលរដ្ឋខ្មែររួចរាល់អស់ហើយដែរ ។ បន្តមកលោកឧត្តមសេនីយ៍ត្រី ប៊ិន សារ៉ន នាយការិយាល័យទី១បានអានសេចក្តីប្រកាសតែងតាំងផ្លាស់ប្តូរមុខងារដល់នាយទាហានចំនួន២៩នាក់ សេចក្តីសម្រេចបំពាក់ឋានន្តរសក្តិ ដល់នាយទាហាន នាយទាហានរង ឋានៈវរសេនីយ៍ទោ០៣នាក់ វរសេនីយ៍ត្រី១៧នាក់ អនុសេនីយ៍ឯកចំនួន១១នាក់ អនុសេនីយ៍ទោចំនួន០៧នាក់ ឋានៈអនុសេនីយ៍ត្រីចំនួន៣៣នាក់ នាយចំណង់៣៥នាក់ ដែលសរុបទាំងអស់១៣៥នាក់ ចំណុះក្នុងកងពលលេខ៥៣ ។
លោកឧត្តមសេនីយ៍ឯក ប៊ុន សេង បានបញ្ជាក់ថា នេះជាការឆ្លុះបញ្ចាំងអំពីទឹកចិត្តឆន្ទៈស្មារតីដែលបងប្អូនយើងបានគោរពស្រឡាញ់ប្រទេសជាតិយើងឲ្យមានសុខសន្តិភាពកន្លងមក តែដោយសារការកែទម្រង់ សម្រួលកងអង្គភាពដែលបានបង្រួមបង្រួមជាតិកន្លងមក បានច្របាច់បញ្ចូលគ្នាពីក្បាលអង្គភាពធំៗ រហូតដល់អង្គភាពតូចៗ រក្សាកងកម្លាំងយើងដែលមានស្នាដៃកន្លងមក ទើបមានបងប្អូនយើងមួយចំនួនមិនបានតម្លើងសក្កិឲ្យបានសមស្របទៅតាមតម្រូវការទឹកចិត្តបងប្អូនដែលបានតស៊ូ ដើម្បីប្រទេសជាតិកន្លងមក តែអ្វីៗនៅក្នុងអង្គភាពយោធភូមិភាគទី៥ កន្លងមកពីខែ០៤ ដល់ខែ០៧ ឆ្នាំ២០១៨ បានប្រកាសមុខងារបានជាង៥០០នាក់ និងបំពាក់សក្កិជាង១៥០០នាក់ ហើយត្រៀមបើកអង្គសន្និបាតក្នុងខែ០៩ខាងមុខនេះ ដើម្បីឲ្យថ្នាក់ដឹកនាំជួយវាយតម្លៃ និងរកផលប្រយោជន៍ចំណុចល្អបន្តអនុវត្តន៍ទៅមុខទៀត ដែលយើងតែងតែមានអារម្មណ៍ គិតគូរដល់បងប្អូនមុនគេជានិច្ចទូទាំងប្រទេស តាមរយៈក្រសួងការពារជាតិ និងរាជរដ្ឋាភិបាលបានដាស់តឿនឲ្យមានការចងចាំជានិច្ច ចំពោះកាតព្វកិច្ចរបស់បងប្អូនដែលមានស្នាដៃ និងបានអនុវត្តន៍កែទម្រង់ទៅមុនគេនៅក្នុងប្រទេសកម្ពុជា ។
លោកឧត្តមសេនីយ៍ឯកបានបន្ថែមថា យើងបានកែទម្រង់តាមស្ថានភាពដែលមានទ្រង់ទ្រាយ៣សំខាន់ៗ គឺ ១- នាយទាហានមានវ័យចំណាស់ត្រូវតែអនុវត្តន៍ទៅតាមច្បាប់សោធននិវត្តន៍ តម្រូវតាមបុណ្យសក្កិ និងអាយុ ។ ២- ទ្រង់ទ្រាយបន្តវេណត្រូវធានាថែររក្សាឲ្យបានក្នុងជួរកងទ័ព និង៣- ជាទ្រង់ទ្រាយទាហានវ័យក្មេង គឺត្រូវបណ្តុះបណ្តាល ធនធានមនុស្ស លើកកម្ពស់សមត្ថភាព មានឆន្ទៈនយោបាយ បំពេញតួនាទីជាទំពាំងស្នងឬស្សី ដែលថ្លឹងថ្លែងធានាគុណភាពឲ្យបាន សម្រាប់រក្សាការពារ កសាងប្រទេសជាតិបន្តទៅមុខទៀត ។ លោកឧត្តមសេនីយ៍ឯក បានប្រៀបធៀបបទពិសោធន៍ពីបងប្អូនទាំងអស់ស្រឡាញ់សុខសន្តិភាព មិនចង់ជួបទេប្រទេសដែលមានសង្គ្រាមរ៉ាំរ៉ៃដែលមាននៅក្នុងប្រទេសកម្ពុជាយើងមានរាប់សិបឆ្នាំកន្លងមកហើយនោះទេ ហើយរាជរដ្ឋាភិបាលយើងក៏បានលើកទឹកចិត្តដល់បងប្អូនយើងដែលបានចូលនិវត្តន៍ទៅហើយនោះក៏ត្រូវបានទទួលការតម្លើងឋានន្តរសក្កិ ប្រាក់បៀវត្សឧបត្ថម្ភបន្ថែមទៀតដល់បងប្អូន ។
ចុងក្រោយលោកឧត្តមសេនីយ៍ឯក បានផ្តាំផ្ញើគ្រប់កងកម្លាំងទាំងអស់ត្រូវពង្រឹងការងារក្នុងអង្គភាពបន្ថែមទៀត រួមសាមគ្គីគ្នា ពេលមានបញ្ហាត្រូរួមគ្នាយកមកដោះស្រាយនៅលើតុ ហើយធ្វើតែអំពើល្អ ចេះស្រឡាញ់ជួយគ្នានៅក្នុងអង្គភាព គ្រួសារកងទ័ព បន្តរហូតដល់ប្រជាពលរដ្ឋជួបការលំបាកឲ្យបានគ្រប់ៗគ្នា ហើយបានជួយឧបត្ថម្ភជាថវិកាចំនួន២លានរៀល ក្នុងកម្មវិធីនេះផងដែរ ៕
ចែករំលែកព័តមាននេះ