រាជធានីភ្នំពេញ ៖ ជនសង្ស័ម្នាក់ត្រូវបានសន្តិសុខយាមក្នុងបុរីឃាត់ខ្លួនប្រគល់ឱ្យសមត្ថកិច្ចក្រោយពីឆែករកឃើញនៅជាប់ខ្លួនគេមានសរសៃដែកលួសសម្រាប់ឆ្កឹះសោចំនួន២សរសៃលាក់ជាប់ខ្លួន ចំណែកបក្ខពួកម្នាក់ទៀតបានរត់គេចខ្លួនបាត់ ។ ករណីនេះកើតឡើងកាលពីវេលាម៉ោង៣និង១៥នាទីទៀបភ្លឺថ្ងៃទី៥ ខែសីហា ឆ្នាំ២០១៨ ស្ថិតនៅផ្លូវសូឡា១ ភូមិអ័រគីដេ សង្កាត់អូរបែកក្អម ខណ្ឌសែនសុខ។
ជនសង្ស័យម្នាក់ដែលឃាត់ខ្លួនខាងលើឈ្មោះ ហួត ពៅ អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ចំណែកជនសង្ស័យម្នាក់ទៀតជាបក្ខពួកឈ្មោះ បូរ បានរត់គេចខ្លួនបាត់។
សមត្ថកិច្ចបានប្រាប់ឱ្យដឹងថា មុនកើតហេតុ ជនសង្ស័យមានគ្នា២នាក់បានចូលទៅក្នុងបុរីនៅចំណុចខាងលើ ពេលនោះសន្តិសុខឃើញ ហើយមានការសង្ស័យក៍ឃាត់បានម្នាក់ និងបានឆែកខ្លួនជនសង្ស័យខាងលើឃើញមានសរសៃដែកលួសសម្រាប់ឆ្កឹះសោចំនួន២សសៃនៅជាប់ខ្លួន រីឯបក្ខពួកម្នាក់ទៀតឃើញដូច្នេះក៏បានរត់គេចខ្លួនបាត់តែម្តង។
សមត្ថកិច្ចដដែលបានប្រាប់បន្តទៀតថា ក្រោយសន្តិសុខឃាត់បានជនសង្ស័យម្នាក់ ក៏ទំនាក់ទំនងមកខាងសមត្ថកិច្ចដើម្បីនាំខ្លួនជនសង្ស័យយកមកកាន់ប៉ុស្តិ៍នគរបាលរដ្ឋបាលអូរបែកក្អមធ្វើការសាកសួរ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានចូលក្នុងបុរីខាងលើពិតប្រាកដមែនដើម្បីរករើសអេតចាយតែប៉ុណ្ណោះ ដោយឡែកសរសៃដែកលួស២សរសៃខាងលើ ខ្លួនរើសបាន ដោយឃើញទំនងក៏ទុកតាមខ្លួនតែម្តងទៅ ។ ទោះជាយ៉ាងណា កន្លងមកគោលដៅខាងលើធ្លាប់មានបទល្មើសឆ្កឹះសោផ្ទះប្រជាពលរដ្ឋលួចទ្រព្យសម្បត្តិជាញឹកញាប់ ខណៈដែលម្ចាស់ចាក់សោចោលដោយជាប់រវល់ទៅដើរលេងតាមបណ្តាខេត្តនានា។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ៕
ចែករំលែកព័តមាននេះ