រាជធានីភ្នំពេញ៖ លោក ឃួង ស្រេង អភិបាលរាជធានីភ្នំពេញបានបញ្ជាជាបន្ទាន់ឱ្យមន្ត្រីជំនាញពាក់ព័ន្ធធ្វើការស្ថាបនាឡើងវិញនៅកំណាត់ផ្លូវមួយខ្សែដែលទទួលរងការខូចខាតដោយបាក់ផ្តាច់ដោយសារទឹកជំនន់ទន្លេសាបនាប៉ុន្មានថ្ងៃកន្លងមកនេះ នៅទីតាំង ក្រុមទី២ ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ…
រាជធានីភ្នំពេញ៖ លោក ឃួង ស្រេង អភិបាលរាជធានីភ្នំពេញបានបញ្ជាជាបន្ទាន់ឱ្យមន្ត្រីជំនាញពាក់ព័ន្ធធ្វើការស្ថាបនាឡើងវិញនៅកំណាត់ផ្លូវមួយខ្សែដែលទទួលរងការខូចខាតដោយបាក់ផ្តាច់ដោយសារទឹកជំនន់ទន្លេសាបនាប៉ុន្មានថ្ងៃកន្លងមកនេះ នៅទីតាំង ក្រុមទី២ ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ។ ការជម្រុញបែបនេះធ្វើឡើងក្នុងពេលលោកដឹកនាំអាជ្ញាធរដែនដី និងមន្ត្រីជំនាញក្រោមឱវាទចុះទៅពិនិត្យស្ថានភាពជាក់ស្តែងនៃការបាក់ច្រាំងទន្លេនាព្រឹកថ្ងៃទី៤ ខែសីហា ឆ្នាំ២០១៨ នេះ ។
លោក ឃួង ស្រេង បានជួបសំណេះសំណាលជាមួយប្រជាពលរដ្ឋ និងសម្តែងនូវការសោកស្តាយចំពោះគ្រោះធម្មជាតិ ដែលបណ្តាលឱ្យបាក់ផ្តាច់ផ្លូវតែម្តង ប៉ុន្តែរដ្ឋបាលរាជធានីភ្នំពេញបានជម្រុញឱ្យមន្ទីរពាក់ព័ន្ធជាពិសេស មន្ទីរសាធារណៈការ និងដឹកជញ្ជូនរាជធានីភ្នំពេញ និងមន្ទីរធនធានទឹក ពិនិត្យនិងសិក្សាឱ្យបានហ្មត់ចត់ មុននឹងចាក់ថ្មធ្វើគ្រឹះចាក់ដីបំពេញច្រាំងបាក់នេះឡើងវិញឲ្យបានឆាប់រហ័ស ។
លោក ឃួង ស្រេង បានបញ្ជាក់ថា ការស្ថាបនាច្រាំងទន្លេដែលបាក់នេះជាបណ្តោះអាសន្ន សំខាន់ទប់កុំឱ្យបាក់បន្ត និងអាចឱ្យប្រជាពលរដ្ឋធ្វើដំណើរបានសិន ។ នៅរដូវទឹកស្រកខាងមុខនេះ រដ្ឋបាលរាជធានីភ្នំពេញនឹងឱ្យមន្ត្រីជំនាញចុះមកសិក្សាបច្ចេកទេសឱ្យបានហ្មត់ចត់ដើម្បីបុកស៊ីផាយបន្ទះដែក ទប់ការពារច្រាំង និងធ្វើឱ្យផ្លូវឲ្យរឹងមាំ និងជាប់លាប់តែម្តង ។
តាមការអះអាងពីអាជ្ញាធរមូលដ្ឋានបានឱ្យដឹងថា ផ្លូវឬច្រាំងនៅចំណុចនោះតែងតែបាក់ជារៀងរាល់ឆ្នាំតែបាក់តិចតួច អាជ្ញាធរមូលដ្ឋានតែងតែធ្វើការជួសជុលជាបន្តបន្ទាប់ ប៉ុន្តែឆ្នាំនេះបាក់ខ្លាំង ដែលអាជ្ញាធរមូលដ្ឋានមិនមានលទ្ធភាពជួសជុលទើបរាជធានីភ្នំពេញធ្វើការជួសជុលឱ្យទាំងស្រុងតែម្តងដែលការបាក់ច្រាំងលើកនេះមានប្រវែងប្រមាណជិត១០០ម៉ែត្រ ៕
ចែករំលែកព័តមាននេះ