រាជធានីភ្នំពេញ ៖ សេចក្តីរាយការណ៍បឋមឱ្យដឹងថា វិស្វករសំណង់២នាក់ ក្នុងចំណោមគ្នា៥នាន់បានស្លាប់ដោយសារតែលង់ទឹកស្ទឹងព្រែកត្នោត ខណៈដែលជនរងគ្រោះរួមនិងមិត្តភក្ដិខាងលើ នាំគ្នាទៅផឹកស៊ីជុំគ្នានៅខ្យូសបណ្ដែតទឹកស្ទឹងយីហោ «ជំនោរស្ទឹងព្រែកត្នោត» ហើយបានអង្គុយលើបង្កាន់ដៃខ្យូស ។…
រាជធានីភ្នំពេញ ៖ សេចក្តីរាយការណ៍បឋមឱ្យដឹងថា វិស្វករសំណង់២នាក់ ក្នុងចំណោមគ្នា៥នាន់បានស្លាប់ដោយសារតែលង់ទឹកស្ទឹងព្រែកត្នោត ខណៈដែលជនរងគ្រោះរួមនិងមិត្តភក្ដិខាងលើ នាំគ្នាទៅផឹកស៊ីជុំគ្នានៅខ្យូសបណ្ដែតទឹកស្ទឹងយីហោ «ជំនោរស្ទឹងព្រែកត្នោត» ហើយបានអង្គុយលើបង្កាន់ដៃខ្យូស ។ ស្របពេលនោះ ទឹកស្ទឹងរលកខ្លាំងបង្កឱ្យខ្យូសនោះឃ្លេងឃ្លោងប៉េលប៉ាល ទើបឱ្យជនរងគ្រោះទាំង២នាក់ធ្លាក់ចូលទៅក្នុងទឹកស្ទឹង ដែលកំពុងហូរខ្លាំងលិចលង់បាត់តែម្ដង ។
ហេតុការណ៍នេះ បានកើតឡើងកាលពីវេលាម៉ោង០៥ និង៥០នាទីល្ងាចថ្ងៃទី០៣ សីហា ក្នុងភូមិបឹងធំទី១ សង្កាត់បឹងធំ ខណ្ឌពោធិ៍សែនជ័យ រាជធានីភ្នំពេញ ។ តាមប្រភពឱ្យដឹងថា យុវជនរងគ្រោះដែលស្លាប់នោះម្នាក់ ឈ្មោះ ជង់ តុងសាន អាយុ២៨ឆ្នាំ ជាវិស្វករសំណង់ មានស្រុកកំណើតភូមិសាគរ «ក» ឃុំសាគរ ស្រុកកំពង់ស្វាយ ខេត្តកំពង់ធំ បានមកស្នាក់នៅធ្វើការផ្ទះជួល ក្នុងភូមិព្រៃបឹង សង្កាត់កន្ទោក ខណ្ឌពោធិសែនជ័យ ។ ចំណែកម្នាក់ទៀត ឈ្មោះ ជួង រដ្ឋា អាយុ ២៨ឆ្នាំ ជាវិស្វករសំណង់ដែរ មានស្រុកកំណើតភូមិភ្នំដិល ឃុំតាំងក្រាំង ស្រុកបាធាយ ខេត្តកំពង់ចាម ស្នាក់នៅធ្វើការនៅក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ប្រភពដដែលបន្តថា នៅវេលារសៀលថ្ងៃកើតហេតុ មុនពេលកើតហេតុនោះ យុវជនរងគ្រោះរួមជាមួយមិត្តភក្ដិ៣នាក់ទៀត (សរុប៥នាក់) នាំគ្នាទិញស្រាបៀរចំនួន៥កេស យកទៅអង្គុយផឹកនៅក្នុងខ្យូសបណ្ដែតទឹកជំនោរស្ទឹងព្រែកត្នោតនោះ ។ ខណៈនោះ ពួកគេបានផឹកជុំគ្នាយ៉ាងសប្បាយ តែក្រោយមក មិត្តភក្ដិម្នាក់បានទៅផ្ទះមុន នៅសល់គ្នា៤នាក់បានផឹកបន្ត រហូតដល់វេលាម៉ោងកើតហេតុ អស់ស្រាបៀរជិត៤កេស ។
ប្រភពបានបន្តទៀតថា ពេលនោះ យុវជនរងគ្រោះទាំង២នាក់ បានអង្គុយផឹកនៅលើបង្កាន់ដៃខ្យូស ប៉ុន្តែដោយសារតែទឹកស្ទឹងរលកខ្លាំង បង្កឱ្យខ្យូសនោះមានសភាពឃ្លេងឃ្លោង ទើបបណ្ដាលឱ្យជនរងគ្រោះទាំង២នាក់ ធ្លាក់ចូលទៅក្នុងទឹកស្ទឹង ដែលកំពុងហូរខ្លាំងផងលិចលង់ ដោយគ្មានអ្នកណា អាចជួយទាន់ឡើយ ។
បន្ទាប់មកកម្មវិធីផឹកស៊ីសប្បាយ បានក្លាយទៅជាទុក្ខ ហើយទាំងអ្នកជិតខាងនិងនគរបាលបាននាំគ្នាចុះរាវរកប៉ុន្តែរកមិនឃើញឡើយ រហូតដល់វេលាម៉ោង១ និង៣០នាទីរំលងអធ្រាត្រ ទើបប្រទះឃើញសាកសព ។
ចែករំលែកព័តមាននេះ