ប្រពន្ធចៅសង្កាត់បាត់ខ្លួន នាំគ្នាដើររក ស្រាប់តែប្រទះឃើញ…
- មណ្ឌលគិរី
ខេត្តមណ្ឌលគិរី ៖ ស្ត្រីម្នាក់ត្រូវបានគេប្រទះឃើញលង់ទឹកស្លាប់ នៅក្នុងអូរក្រោយផ្ទះ កាលពីព្រឹកថ្ងៃទី៣ សីហា ២០១៨ នៅភូមិជ្រៃសែន សង្កាត់មនោរម្យ ក្រុងសែនមនោរម្យ…
ខេត្តមណ្ឌលគិរី ៖ ស្ត្រីម្នាក់ត្រូវបានគេប្រទះឃើញលង់ទឹកស្លាប់ នៅក្នុងអូរក្រោយផ្ទះ កាលពីព្រឹកថ្ងៃទី៣ សីហា ២០១៨ នៅភូមិជ្រៃសែន សង្កាត់មនោរម្យ ក្រុងសែនមនោរម្យ ។
លោក កាន់ ពេញ អធិការនគរបាលក្រុងសែនមនោរម្យ ឲ្យដឹងថា នៅវេលាម៉ោង៩និង១៥នាទីព្រឹក ថ្ងៃទី៣ សីហា សមត្ថកិច្ចបានទទួលបណ្តឹងរាយការណ៍ថា មានករណីមនុស្សបាត់ពីផ្ទះកាលពីវេលាម៉ោង៣ទៀបភ្លឺថ្ងៃទី៣ សីហា ឆ្នាំ២០១៨ ។
លោកអធិការបន្តថា តាមរបាយការណ៍ ជនរងគ្រោះដែលបាត់ខ្លួនឈ្មោះ ណន អុីវ ភេទស្រី អាយុ៣៨ឆ្នាំ ជាប្រពន្ធលោកឆុំ សូរី ចៅសង្កាត់មនោរម្យ ស្ថិតនៅភូមិជ្រៃសែន សង្កាត់មនោរម្យ ។ ជនរងគ្រោះដែលបាត់ខ្លួនជាមនុស្សញៀនស្រា ស្រវឹងរាល់ថ្ងៃ សតិមិនប្រក្រតីហើយនៅល្ងាចថ្ងៃទី២ សីហា ក្រោយបាយហើយជនរងគ្រោះមានអាការៈចម្លែក អុជធូបនិយាយផ្តេសផ្តាសមិនព្រមចូលសម្រាក ឃើញអាការៈបែបនេះក្រុមគ្រួសារក៏នាំគ្នាយាមចាំមើលរហូតដល់គាត់(ណន អុីវ)បានចូលសម្រាក រីឯក្រុមគ្រួសារដែលចាំយាមឃ្លាំមើលក៏នាំគ្នាចូលសម្រាកដែរទៅ ។
លុះដល់ម៉ោង៣ទៀបភ្លឺថ្ងៃទី៣ សីហា លោក ឆុំ សូរី ភ្ញាក់ពីដំណេកស្រាប់តែបាត់ប្រពន្ធពីគ្រែ ក៏នាំគ្នាតាមរករហូតដល់ម៉ោង៩និង១៥នាទីព្រឹកថ្ងៃដដែលនោះនៅតែរកមិនឃើញ ទើបរាយការណ៍មកសមត្ថកិច្ចឲ្យជួយអន្តរាគមន៍ដើររក ស្រាប់តែប្រទះឃើញស្ត្រីរងគ្រោះលង់ទឹកអូរស្លាប់បាត់ទៅហើយ ។
សមត្ថកិច្ចបញ្ជាក់ថា តាមការពិនិត្យស្លាកស្នាមលើសពរួចមក ឃើញថាសពមានរបួសសើរស្បែកលើស្មងជើងទាំងសងខាង ដងខ្លួនមានស្នាមរលាត់សើរៗស្បែក ។ តាមការពិនិត្យស្នាមជើង ស្ត្រីរងគ្រោះដើរចុះចំណោតទៅអូរគឺចោតជ្រៅ ហើយបាត់ដានជើង និងឃើញស្នាមទក់ស្មៅសំដៅទៅអូរ ។ តាមសន្និដ្ឋាន ស្ត្រីរងគ្រោះពេលដើរចុះទៅបានរអិលធ្លាក់ចូលអូរបណ្តាលឲ្យលង់ទឹកស្លាប់តែម្តង ម្យ៉ាងស្ត្រីរងគ្រោះស្រវឹងស្រាផង ៕
ចែករំលែកព័តមាននេះ