ប្រទេសកូឡុំប៊ី ៖ លោកទីតូកាស្តែល ឡាណូស មេប៉ូលិសប្រឆាំងគ្រឿងញៀនកូឡុំប៊ីម្នាក់និយាយកាលពីថ្ងៃទី២ សីហាថា ពួករត់ពន្ធគ្រឿងញៀនក្រុម DEL GOLFO បានគំរាមតាមសម្លាប់មេឆ្កែប្រឆាំងគ្រឿងញៀនដ៏ពូកែមួយក្បាល។
មេប៉ូលិសរូបនោះបន្តថា មេឆ្កែប្រឆាំងគ្រឿងញៀនពូកែនេះឈ្មោះ SOMBRA រងការតាមសម្លាប់របស់ក្រុមរត់ពន្ធគ្រឿងញៀននោះ ជាក្រុមរត់ពន្ធគ្រឿងញៀនសាហាវបំផុតនៅកូឡុំប៊ី ហេតុនេះហើយបានជាប៉ូលិសចាត់ការលាក់មេឆ្កែពូជប៊ែរហ្សេអាល្លឺម៉ង់ អាយុ៦ឆ្នាំនេះ។
តាមពិតទៅ SOMBRA ពុំមែនជាឆ្កែរកគ្រឿងញៀនតែមួយក្បាលគត់ដែលគេតាមសម្លាប់ឡើយ តែឆ្កែប៉ូលិសជាច្រើនក្បាលទៀតក៏ជាកម្មវត្ថុនៃការគំរាមកំហែងដែររបស់ពួករត់ពន្ធគ្រឿងញៀនកូឡុំប៊ី។
មេឆ្កែ SOMBRA នៅជាមួយក្រុមប្រឆាំងគ្រឿងញៀនពីឆ្នាំ២០១៦មក។ នាឆ្នាំនោះមេឆ្កែនេះរកឃើញកូកាអ៊ីនដល់ទៅ២,៩តោននៅកំពង់ផែអ៊ូរ៉ាបា ដែលលាក់ក្នុងកុងតឺន័រដាក់ចេកមួយដឹកទៅកាន់ក្រុង ANVERS បែលហ្ស៊ិក។ ហើយរយៈពេល៥ឆ្នាំនៃសកម្មភាពរបស់វា មេឆ្កែនេះរកឃើញគ្រឿងញៀនដល់ទៅ៩តោន។ ដោយសារវាពូកែបែបនេះទើបពួករត់ពន្ធគ្រឿងញៀនជាមនុស្សរបស់ជនឈ្មោះ DAIRO ANTONIO USAGA ហៅOTONIELខឹងនឹងមេឆ្កែនោះយ៉ាងខ្លាំងណាស់ ហើយប៉ុនប៉ងសូកប៉ាន់ប៉ូលិសម្នាក់ឲ្យប្រាក់៧០០០ដុល្លារជាថ្នូរនឹងមេឆ្កែនេះ។ មេឆ្កែ SOMBRA ពេលនេះត្រូវបានគេយកទៅលាក់ទុកក្នុងកន្លែងសម្ងាត់មួយ៕
ចែករំលែកព័តមាននេះ