រាជធានីភ្នំពេញ ៖ យុវជនម្នាក់បានបើកបររថយន្តបែនដឹកថ្ម១គ្រឿងបោះពួយក្នុងល្បឿនលឿន ហើយមិនដឹងថា មានឧបសគ្គអ្វី ឬដោយសារតែងងុយដេកនោះ ហើយងោកមួយភាំងនោះទេ ស្រាប់តែរេចង្កូតជ្រុលទៅបុកចូលទ្វារ និងជញ្ជាំងប៉ុស្តិ៍យាមភូមិគ្រឹះមួយកន្លែងទាំងកម្រោល ។
ប៉ុន្តែខណៈនោះមិនបានបណ្ដាលឲ្យមានអ្នករងគ្រោះនោះឡើយគ្រាន់តែខូចខាតទ្វារ និងជញ្ជាំងប៉ុស្តិ៍យាមតែប៉ុណ្ណោះ ។ ដោយឡែករថយន្តបង្កបានក្រពឹតខ្ទេចមុខខ្លួនឯង ខូចខាតយ៉ាងដំណំ ហើយអ្នកបើកបរត្រូវបានប្រជាពលរដ្ឋចាប់ខ្លួនភ្លាមៗផងដែរ ។ ហេតុការណ៍នេះបានកើតឡើងកាលពីវេលាម៉ោង១និង១៥នាទីរសៀល ថ្ងៃទី០៣ ខែសីហា ឆ្នាំ២០១៨ នៅលើកំណាត់ផ្លូវព្រៃសស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
នគរបាលបានឲ្យដឹងថា រថយន្តបង្កនោះម៉ាកហ៊ីយ៉ាន់ដាយ ពណ៌ក្រហមលាយស ពាក់ស្លាកលេខភ្នំពេញ3C-1833 ជារថយន្តបែនដឹកថ្ម បើកបរដោយយុវជនស្ទាវម្នាក់ឈ្មោះ ផន ឡូយ អាយុ២១ឆ្នាំ មានទីលំនៅបច្ចុប្បន្ននៅក្នុងភូមិព្រៃផ្ចឹក ឃុំរកាកោះ ស្រុកគងពិសី ខេត្តកំពង់ស្ពឺ ។
ក្រោយពេលត្រូវចាប់ខ្លួនយុវជនរូបនេះបាននិយាយសារភាព គ្រោះថ្នាក់នេះបណ្ដាលមកពីរថយន្តហ្វ្រាំងអត់ស៊ី ។ ដែលនេះ គឺជាចម្លើយកុហកមិនគួរឲ្យជឿឡើយ ហើយសង្ស័យថា យុវជននេះខ្វះការប្រុងប្រយ័ត្នក្នុងពេលបើកបរអាចរវល់តែងាកទៅណា ឬងងុយដេកផងក៏មិនដឹង ។ ប្រភពដដែលបានបន្តទៀតថា នៅមុនពេលកើតហេតុរថយន្តនេះបានបើកបរធ្វើដំណើរក្នុងទិសដៅពីលិចទៅកើតដឹកថ្មចេញពីខេត្តកំពង់ស្ពឺមកភ្នំពេញ ។
ពេលទៅដល់ត្រង់ចំណុចកើតហេតុស្រាប់តែរេចង្កូតបុកចូលទ្វារ និងប៉ុស្តិ៍យាមភូមិគ្រឹះខាងលើទាំងកំរោល ប៉ុន្តែសំណាងល្អមិនបានបណ្ដាលឲ្យមានមនុស្សរងរបួសឡើយ ។ ចំណែកអ្នកបើកបរត្រូវបានប្រជាពលរដ្ឋចាប់ខ្លួនប្រគល់ជូននគរបាលសួរនាំ ហើយបុរសនេះបានប្រាប់ថា រថយន្តរបស់ខ្លួនហ្វ្រាំងអត់ស៊ី ទើបជ្រុលទៅបុកទ្វារ និងប៉ុស្តិ៍យាមភូមិគ្រឹះខាងលើបែបនេះ ៕
ចែករំលែកព័តមាននេះ