រាជធានីភ្នំពេញ ៖ មហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ បាននឹងកំពុងក្លាយទៅជាទីតាំងរបស់ក្រុមចោរឆក់ ដែលតែងតែបានធ្វើសកម្មភាពឆក់កាបូបពីអ្នកដំណើរឬភ្ញៀវទេសចរអន្តរជាតិ…
រាជធានីភ្នំពេញ ៖ មហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ បាននឹងកំពុងក្លាយទៅជាទីតាំងរបស់ក្រុមចោរឆក់ ដែលតែងតែបានធ្វើសកម្មភាពឆក់កាបូបពីអ្នកដំណើរឬភ្ញៀវទេសចរអន្តរជាតិ ជាបន្តបន្ទាប់ស្ទើរតែរាល់ថ្ងៃ ។
បន្ទាប់មក ក្រុមចោរបានគេចខ្លួនបាត់ដោយសុវត្ថិភាព ដែលសកម្មភាពនេះបានបង្កឱ្យមានភាពអសន្តិសុខនិងការភ័យខ្លាចដល់អ្នកដំណើរគ្រប់រូប ហើយប្រការនេះគួរតែអាជ្ញាធរដែនដី គិតគូរធ្វើយ៉ាងណា មានស្មារតីភ្ញាក់រលឹក និងចេញចំណាត់ការខ្ពស់ ក្នុងការដឹកនាំកម្លាំងល្បាតពួនស្ទាក់ ដើម្បីទប់ស្កាត់និងបង្ក្រាបក្រុមចោរដៃស្អិតនោះឱ្យបានផង កុំចាំបាច់ទាល់តែមានបញ្ជា ឬការរុញច្រាន ទើបស្ទុះស្ទារនោះឡើយ។
ជាក់ស្ដែង នៅវេលាម៉ោង៧ និង៣០នាទីព្រឹកថ្ងៃទី០៣ សីហា មានជនសង្ស័យ១ក្រុម បានធ្វើសកម្មភាពឆក់កាបូបស្ពាយពីបុរសជនជាតិចិន២នាក់បានសម្រេច រួចហើយក្រុមចោរបានគេចខ្លួនទៅបាត់ដោយសុវត្ថិភាព ។ បុរសជនជាតិចិនរងគ្រោះ ទាំង២នាក់នេះមិនត្រូវបានគេស្គាល់អត្តសញ្ញាណឡើយ ហើយនៅក្នុងកាបូបស្ពាយរបស់ពួកគាត់នោះមានលុយ រួមជាមួយលិខិតឆ្លងដែន ឯកសារនិងសម្ភារផ្សេងៗមួយចំនួនទៀត ។
នៅមុនពេលកើតហេតុ ជនរងគ្រោះបានជិះម៉ូតូរ៉ឺម៉កកង់បី១គ្រឿង ចេញពីភ្នំពេញឆ្ពោះទៅឡើងយន្តហោះ នៅអាកាសយានដ្ឋានអន្តរជាតិភ្នំពេញ ។ លុះពេលទៅដល់ចំណុចកើតហេតុ ខណៈម៉ូតូរ៉ឺម៉កកង់បី បានបន្ថយល្បឿនដើម្បីបត់ចូលទៅក្នុងអាកាសយានដ្ឋាន ស្រាប់តែមានចោរ២នាក់ ជិះម៉ូតូហុងដាឌ្រីមសេ១២៥ មួយគ្រឿង ទៅអែបជិតរួចធ្វើសកម្មភាព ឆក់យកកាបូបបានសម្រេច និងគេចខ្លួនបាត់តែម្ដង ។
ចែករំលែកព័តមាននេះ