ខេត្តព្រៃវែង ៖ ដោយសារតែការធ្វេសប្រហែសបានធ្វើឱ្យបុរសម្នាក់ស្លាប់បាត់បង់ជីវិតនៅពេលចុះឆក់ត្រីនៅក្នុងស្រះ។ ហេតុការណ៍នេះបានកើតឡើងកាលពីវេលាម៉ោង៤ល្ងាច ថ្ងៃទី២ សីហា នៅខាងក្រោយផ្ទះឈ្មោះ ទូច ថុល ភេទប្រុស អាយុ៥៨ឆ្នាំ ស្ថិតនៅភូមិព្រៃចំការជើង ឃុំស្វាយជ្រុំ ស្រុកមេសាង ខេត្តព្រៃវែង។
ជនរងគ្រោះដែលស្លាប់ឈ្មោះ វ៉េង ជីវ៉ា ភេទប្រុស អាយុ៣២ឆ្នាំ មានទីលំនៅក្នុងភូមិកើតហេតុខាងលើ។
ប្រភពព័ត៌មានពីសមត្ថកិច្ចបានឱ្យដឹងថា មុនពេលកើតហេតុ ជនរងគ្រោះបានយកអាគុយ និងដុំអាំភ្លីមក.តខ្សែភ្លើងភ្ជាប់ជាមួយដែកកែច្នៃដើម្បីធ្វើឧបករណ៍ឆក់ត្រី ពេលធ្វើរួចហើយក៏ចុះទៅឆក់ត្រីក្នុងស្រះកន្លែងកើតហេតុខាងលើតែម្នាក់ឯង ហើយក៏ភ្លាត់ស្នៀតឆក់ទាំងត្រី ឆក់ទាំងមនុស្សក្នុងស្រះនោះតែម្តង។ លុះមួយម៉ោងក្រោយមក ទំរាំមានអ្នកឃើញកាយយកឧបករណ៍ឆក់ចេញ និងស្រង់ជនរងគ្រោះពីក្នុងទឹកយកមកដាក់លើគោកបាន គឺជនរងគ្រោះបានស្លាប់បាត់ទៅហើយ។
គ្រោះថ្នាក់នេះកើតឡើងដោយសារតែជនរងគ្រោះមានការធ្វេសប្រហែសទើបបណ្តាលឱ្យឆក់ស្លាប់បែបនេះ ដូច្នេះសូមបងប្អូនប្រជាពលរដ្ឋដែលមានបំណងកែច្នៃឧបករណ៍សម្រាប់ឆក់ត្រី សូមប្រុងប្រយ័ត្នខ្ពស់ ៕
ចែករំលែកព័តមាននេះ