រាជធានីភ្នំពេញ ៖ តារាសម្តែងជើងចាស់អ្នកនាងបូនីតា ដាដេណា បានទម្លាយរឿងភូតភរមួយរបស់នាងចំពោះស្វាមី ។ កន្លងមកនាងតែងតែរកលេសកុហក ផ្សេងៗដើម្បីចេញទៅក្រៅផ្ទះធ្វើអ្វីដែលនាងចង់ធ្វើលាក់បាំងស្វាមីជាជនបរទេស ។ តើបូនីតា ដាដេណា ភូតកុហករឿងអីទៅ ?
កាលពីថ្ងៃទី១ សីហា ២០១៨ អ្នកនាង បូនីតា ដាដេណា បានបង្ហាញមុខគួរឲ្យភ្ញាក់ផ្អើល បន្ទាប់ពីបាត់មុខពីពិភពសិល្បៈជាយូកន្លងមក ។ នាងបានបង្ហាញមុខក្នុងពិធីសម្ពោធខ្សែភាពយន្តថ្មីមួយដែលនាងចូលរួមសម្ដែងជាតួឯក ។ បន្ទាប់ពីនាងបានស្វាមីជាសេដ្ឋីអារ៉ាប់មក ដាណេបានដកខ្លួនពីសិល្បៈអស់រយៈពេលជាង៧ឆ្នាំ ។
ក្នុងពិធីនោះអ្នកនាងបូនីតា ដាដេណា និយាយថា «ការសម្ដែងដែលបានបង្ហាញនេះនឹងក្លាយជាស្នាដៃលើកចុងក្រោយដែលនាងខ្ញុំសម្រេចចិត្តបង្ហាញខ្លួនក្នុងការសម្ដែងហើយ។ ខ្ញុំមានហេតុផលច្រើន ដែលជំរុញឲ្យនាងខ្ញុំត្រូវតែឃ្លាតឆ្ងាយពីការសម្ដែង បើទោះជានាងខ្ញុំនៅបន្តផលិតភាពយន្តប្រកួតប្រជែងក្តី »។
អ្នកនាងបូនីតា ដាដេណា បានថ្លែងក្នុងពិធីសម្ពោធរឿង «ម្ចាស់ទាយាទ» ថា ភាពយន្តនេះនាងសម្រេចចិត្តដាក់បញ្ចាំងជាផ្លូវការគ្រប់រោង ចាប់ពីថ្ងៃទី២ សីហា ។ មួយរឿងនេះនាងបោះទុនទាំងប្រាក់ ស្នាដៃ និងកម្លាំង ដោយសារតែនាងចង់បង្ហាញឲ្យអ្នកគាំទ្រដឹងថា ស្នាដៃចុងក្រោយដែលនាងសម្ដែងមានភាពឥតខ្ចោះ ។
បូនីតា ដាដេណា និយាយថា «មួយរឿងនេះនាងខ្ញុំបានលាក់បាំងស្វាមីច្រើន កុហកគ្រប់បែបយ៉ាង ព្រោះគាត់ហាមមិនឲ្យប្រើកម្លាំងដើរសម្តែងឡើយ ។ សូម្បីតែប្រព័ន្ធទូរស័ព្ទទាក់ទងមកក៏កុហក ហេតុតែចូលចិត្ត ស្រឡាញ់ធ្វើឲ្យទាល់តែបាន ។ តាមតែខ្លួនរវល់នឹងមុខជំនួញ និងមានស្វាមីជាសេដ្ឋីក្រៅស្រុកហួងហែងមិនឲ្យប្រឡូកសិល្បៈ ប្រហែលជានាងខ្ញុំមិនចំណាយផលិតភាពយន្តរឿង «ម្ចាស់ទាយាទ» និងមិនដល់ថ្នាក់សម្ដែងដោយខ្លួនឯងទេ ប៉ុន្តែបណ្ដាលមកពីស្រឡាញ់សាច់រឿងដែលបានតាក់តែងនេះខ្លាំងពេក ទើបនាងខ្ញុំចំណាយពេលសម្ដែងដោយផ្ទាល់ ។ នេះជាស្នាដៃចុងក្រោយ ដោយទោះជានាងខ្ញុំនៅបន្តផលិតភាពយន្តសម្រាប់រឿងក្រោយ ក៏នឹងមិនសម្ដែងដោយខ្លួនឯងទៀតដែរ»។
ក្នុងភាពយន្តរឿង«ម្ចាស់ទាយាទ» អ្នកនាងបូនីតា ដាដេណា សម្ដែងជាតួអង្គធ្មប់កាចសាហាវ ដោយក្រៅពីលងបន្លាចតួអង្គផ្សេងៗ ក៏មានឈុតខ្វេះ និងស៊ីពោះវៀនមនុស្ស ដូចគ្នានឹងរឿងដែលនាងធ្លាប់បានសម្ដែងជាតួអាបកន្លងមក ។ នាងរំពឹងថាភាពយន្តនេះនឹងដក់ជាប់អារម្មណ៍មហាជនមុនពេលនាងសម្រេចចិត្តឈប់សម្ដែង ។ ទោះជាយ៉ាងណាក្តីប្រសិនបើក្នុងពេលក្រោយមានសាច់រឿងណាដែលនាងយល់ថាសកិ្ដសម នាងនឹងចូលរួមសម្ដែង ។
នៅក្នុងពិធីសម្ពោធរឿង«ម្ចាស់ទាយាទ»មានវត្តមានតារាចម្រៀង តារាសម្ដែង និងផលិតករ ចាស់ៗជាច្រើនចូលរួម ។ អ្នកនាងបូនីតា ដាដេណា ប្រកាសថាទោះជាភាពយន្តនេះជោគជ័យ ឬមិនជោគជ័យ ក៏នាងនៅតែបន្តផលិតស្នាដៃក្រោយៗ ដើម្បីឲ្យតារាជំនាន់ក្រោយបានបង្ហាញទេពកោសល្យ ៕
ចែករំលែកព័តមាននេះ