រាជធានីភ្នំពេញ៖ បុរសម្នាក់ត្រូវបានប្រជាពលរដ្ឋប្រទះឃើញដេកស្លាប់នៅលើដងផ្លូវលីយ៉ុងផាត់ក្បែរម៉ូតូមួយគ្រឿង ខណៈមេឃកំពុងភ្លៀង សង្ស័យជិះម៉ូតូបុករថយន្តពីក្រោយបណ្តាលអោយបោកក្បាលស្លាប់ ។ ហេតុការណ៍នេះបង្កអោយមានការភ្ញាក់ផ្អើលដល់សមត្ថកិច្ចកាលពីវេលាម៉ោង៣និង៣០នាទីរសៀលថ្ងៃទី២ ខែសីហា ឆ្នាំ២០១៨ នៅតាមផ្លូវលីយ៉ុងផាត់ ចំងាយប្រមាណជិត១០០ម៉ែត្រពីផ្លូវជាតិលេខ៦ ក្នុងភូមិបាក់ខែង សង្កាត់បាក់ខែង ខណ្ឌជ្រោយចង្វារ ។
នគរបាលបានឱ្យដឹងថា ជនរងគ្រោះដែលឈ្មោះ សាំង សាធ អាយុ៦៩ឆ្នាំ មានទីលំនៅផ្លូវលេខ១៥១ ភូមិបឹង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ ជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១DL-០០៣៩។
តាមប្រភពព័ត៌មានបានឱ្យដឹងថា នៅមុនពេលកើតហេតុ ពេលមេឃកំពុងភ្លៀងមានប្រជាពលរដ្ឋឆ្លងកាត់នៅតាមផ្លូវលីយ៉ុងផាត់ក៍បានប្រទះឃើញបុរសចំណាស់ខាងលើដេកស្លាប់ទាំងពាក់អាវភ្លៀងក្បែរម៉ូតូមួយគ្រឿងដែលបែកបាក់កាបាំង ហើយមួកសុវត្ថិភាពរបស់ជនរងគ្រោះបានបែកកញ្ចក់ខ្ទេច ។
ទោះបីជាយ៉ាងណា គេពុំដឹងថាជនរងគ្រោះខាងលើស្លាប់ដោយសារអ្វីពិតប្រាកដឡើយ ។ បន្ទាប់ពីមានការភ្ញាក់ផ្អើលថាមានមនុស្សស្លាប់នៅលើផ្លូវ នគរបាលមូលដ្ឋានក៍បានចុះមកពិនិត្យកន្លែងកើតហេតុ តាមការសង្ស័យថា ជនរងគ្រោះខាងលើជិះម៉ូតូបុករថយន្តពីក្រោយបណ្តាលអោយដួលបោកក្បាលស្លាប់ ។ នៅកន្លែងកើតហេតុ ក៍បានបន្សល់ទុកដែកវីមួយកំណាត់ផងដែរ ។
សពត្រូវបាននគរបាលទាក់ទងក្រុមគ្រួសារដើម្បីមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ