រាជធានីភ្នំពេញ ៖ នៅល្ងាចថ្ងៃសៅរ៍ ទី៤ សីហា ស្អែកនេះ ស្ថានីយទូរទស្សន៍ប៉ុស្ដិ៍លេខ៥នឹងបន្តការប្រដាល់ជាលក្ខណៈអន្តរជាតិដូចសព្វដងនៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរ ជាយរាជធានីភ្នំពេញ បន្ទាប់ពីកាលពីសប្ដាហ៍មុនសង្វៀនមួយនេះ បានផ្អាកការប្រដាល់អន្តរជាតិមួយសប្ដាហ៍ដើម្បីឱ្យកីឡាករ និងគណៈកម្មការបានទៅចូលរួមបោះឆ្នោត ។
ការប្រកួតអន្តរជាតិលើកនេះ ម្នាក់ៗមានការចាប់អារម្មណ៍យ៉ាងខ្លាំង ដោយសារតែម្ចាស់ខ្សែក្រវាត់ល្បីឈ្មោះ អ៊ុង វិរៈ ត្រូវគេឱ្យប៉ះគ្នាជាមួយកីឡាករថៃមាឌយក្ស ដែលគេមើលឃើញមាឌនិងកម្ពស់មិនស៊ីគ្នា តែទម្ងន់ត្រូវគ្នា។
ការប្រកួតដែលបានប្ដូរទៅម៉ោង៦ល្ងាចវិញនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា ។
កីឡាករកម្ពុជាត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ម្ចាស់ខ្សែក្រវាត់ល្បីឈ្មោះនៅក្នុងប្រទេសថៃ ឈ្មោះ Krak Boe Lek ដែលកីឡាកររូបនេះ ក្រៅពីជាម្ចាស់ខ្សែក្រវាត់ល្បីឈ្មោះនៅក្នុងប្រទេសថៃ ក៏មានថ្វីដៃបំបាក់កីឡាករបរទេស និងកីឡាករថៃដូចគ្នារាប់មិនអស់ផងដែរ ។ អ្នកទាំងពីរប្រកួតគ្នាក្នុងប្រភេទទម្ងន់៩០គីឡូក្រាម គឺបន្ទាប់ពីកីឡាករអ៊ុង វិរៈ បានបណ្ដោយឱ្យឡើងទម្ងន់ដល់៩០គីឡូក្រាម ហើយពិបាករកដៃគូមកប្រកួតជាមួយ ។
អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈប្រកួតចាញ់ធ្លាក់ៗសម្រាប់ជុំទី២ផងដែរ ដោយនោះគឺជាការប្រកួតជម្រុះ១៦នាក់យក៨នាក់ដែលជាវគ្គសំខាន់ ។ វត្តមានកីឡាករកម្ពុជា និងថៃ ក្នុងសប្ដាហ៍នេះ មិនថា ការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកទេ ពិតជាធ្វើឱ្យអ្នកស្នេហាវិស័យប្រដាល់មានការចាប់អារម្មណ៍ ជាពិសេសគឺការប្រកួតទម្ងន់យក្សរបស់អ៊ុង វិរៈ និងកីឡាករថៃតែម្ដង ។ វត្តមានរបស់សមាសភាពគូអន្តរជាតិ ក៏ត្រូវបានសម្រាំងយ៉ាងពិសេសផងដែរ ដើម្បីឱ្យអ្នកទស្សនាកាន់តែកន្ត្រាក់អារម្មណ៍នៅពេលកីឡាករប្រកួតគ្នា។
លោក សេង កដិកា បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ អ៊ុង វិរៈ ដោយសារតែកីឡាកររូបនេះ ធ្លាប់មានស្នាដៃរាប់មិនអស់ ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ។ លោកប្រកាសថា វត្តមានចុះមករបស់កីឡាករថៃ Krak Boe Lek មានតែអ៊ុង វិរៈ ម្នាក់ប៉ុណ្ណោះ ដែលលោកសម្លឹងឃើញថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ជាពិសេសគឺអ្នកទាំងពីរមានប្រភេទទម្ងន់ត្រូវគ្នា ។
លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរមុនពេលផ្គូរផ្គង ទើបលោកយល់ថា សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិនៅថ្ងៃសៅរ៍នេះបាន។ លោកថា កីឡាករកម្ពុជា និងថៃ សុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ អ៊ុងវិរៈ មិនសូវមានទម្លាប់ឡើងវ៉ៃលាក់ដៃស្រាប់ទៅហើយ ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយកីឡាករកម្ពុជា ក៏ល្អស្ថិតក្នុងទំនុកចិត្តលោកតាំងពីមុនផ្គូផ្គង ។
បើទោះជាកីឡាករកម្ពុជាត្រូវប្រឈមនឹងកីឡាករថៃជាគូប្រកួតល្អ ក៏លោកនៅតែប្រកាសលើកទឹកចិត្តចំពោះ អ៊ុង វិរៈថា មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន ពោលគឺល្អជាងការផ្គូផ្គងដាក់កីឡាករកម្ពុជាផ្សេងឱ្យជំនួស ។ ជំនួបរវាងពួកគេលោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង។
លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាងក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៅទៀត គឺមិនត្រឹមតែអាម៉ាស់ប៉ុណ្ណោះទេក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡាព្រោះតែថាប្រកួតលែងកើត ឬធ្លាក់ដៃ ក្រោយពីឡើងកូដមួយប្រាវ ។ យ៉ាងណាមិញ កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬ មិនអស់ពីសមត្ថភាព ក៏ពិតជារងការរិះគន់មិនតិចដែរ។
លោកថា ជំនួបរបស់ពួកគេត្រូវបានដាក់យ៉ាងពិសេសសម្រាប់ថ្ងៃសៅរ៍សប្ដាហ៍នេះ តែក៏ទាមទារឱ្យប្រឹងប្រែងណាស់ដែរ គឺមិនអាចសំអាងត្រឹមថាជាកីឡាករល្បីស្រាប់ មានការគាំទ្រស្រាប់ ហើយក៏ខ្វះការប្រឹងប្រឹងនោះទេ។ លោកនៅតែចាត់ទុកថា អ៊ុង វិរៈ នៅតែជាកីឡាករដែលខ្លាំងបើទោះជាបាត់មុខមួយរយៈ។
លោក សេង កដិកា បញ្ជាក់ថា ការប្រកួតរបស់ប៉ុស្តិ៍លេខ៥ កាន់តែមានការចាប់អារម្មណ៍ ដោយសារតែនៅសប្ដាហ៍នេះ ក៏មានការប្រកួតវគ្គជម្រុះជើងឯកក្នុងប្រភេទទម្ងន់៦០គីឡូក្រាម ដែលឈានដល់វគ្គកាន់តែសំខាន់ក្នុងចំណោមកីឡាករជម្រើសទាំង១៦រូប ដើម្បីស្វែងរកម្ចាស់កៅអី៨នាក់នៅប៉ុស្ដិ៍លេខ៥៕
ចែករំលែកព័តមាននេះ