ខេត្តកំពង់ឆ្នាំង ៖ នៅតាមណ្តោយផ្លូវជាតិលេខ៥ ចម្ងាយប្រមាណជាង១០គីឡូម៉ែត្រពីខាងកើតទីរួមខេត្តកំពង់ឆ្នាំងមានកន្លែងលក់ដូរមួយកន្លែង ដោយដាក់តាំងលក់នូវរបស់របរជាច្រើន ប៉ុន្តែអ្វីដែលចាប់អារម្មណ៍នោះ គឺការតាំងលក់សំបុកចាបដែលអតិថិជនតែងតែឈប់រថយន្តទិញយកទៅតាំងលំអលំនៅឋានដាក់អំពូលភ្លើង ឬក៏ដាក់ឱ្យចាបនៅជាដើម ។
បើតាមការឲ្យដឹងពីអ្នកលក់សម្បុកចាបប្រាប់ថា ខែវស្សានេះមិនសូវមានសម្បុកចាបលក់ទេ គឺសម្បូរតែនៅរដូវប្រាំង ។ យ៉ាងនេះក្តី បើតាមអ្នកដែលកាន់ព្រះពុទ្ធសាសនាវិញបាននិយាយថា មិនគួរទៅកាច់យកសម្បុកចាបយកមកដាក់លក់បែបនេះទេ គឺបាបខ្លាំងណាស់ព្រោះដូចទៅយកផ្ទះសម្បែងជាទីជម្រករបស់គ្នាយ៉ាងនេះដែរ ។
ស្ត្រីឈ្មោះ សំអូន ដែលជាអ្នកលក់ស្បូវកណ្តបសម្រាប់ប្រក់ផ្ទះ និងដាក់តាំងលក់សម្បុកចាបខាងលើបាននិយាយថា គាត់បានឲ្យគេរកសម្បុកចាបពីតាមដងទន្លេ យកមកឱ្យគាត់លក់ ប៉ុន្តែនៅខែនេះមិនសម្បូរទេ សម្បូរតែខែប្រាំង ម្លោះហើយរកសម្បុកចាប់លក់ឲ្យអតិថិជនមិនទាន់ទេមានប៉ុន្មានក៏គេទិញដែរ ។ គាត់លក់ពី២៥០០ ទៅ៣០០០រៀល ក្នុងសម្បុកចាប១ ។
ចំណែកបុរសឈ្មោះ សារ៉ាត់ដែលជាជាងប៉ះកង់ម៉ូតូវិញបាននិយាយស្រដៀងគ្នាដែរថា គាត់បានដាក់លក់សម្បុកចាបនេះ២-៣ ឆ្នាំហើយ ឃើញគេចេះតែសួររកទិញច្រើនពេក ម្លោះហើយគាត់ទិញពីអ្នកទន្លេគេយកមកតាំងលក់នឹងគេដែរ គ្រាន់បានចំណេញខ្លះ បន្ថែមពីលើរបរប៉ះកង់ម៉ូតូ ។ សម្បុកចាបសម្បូរតែខែប្រាំងទេ ពិសេសខែស្រូវប្រាំងទុំ ដល់ខែវស្សា វាហើរទៅនៅខាងលើទៅរកភ្នំអស់ហើយ ។ គាត់បាននិយាយថា បើតាមអ្នកដែលកាច់សម្បុកចាបមកលក់បានប្រាប់ថា សម្បុកចាបវាធ្វើលឿនណាស់ តែ៣-៤ថ្ងៃឃើញធ្វើជិតរូចហើយ ។ ខ្លះប្រាប់គាត់ថា ពេលទៅកាច់យកអស់នៅកន្លែងណាមួយ ៤-៥ ថ្ងៃទៅម្តងទៀត ឃើញកើតមានរយីងរយោងទៀតហើយ ។ សម្បុកដែលវាធ្វើ គឺពីស្បូវ ស្មៅ និងស្រែង៉ែ ជាដើម ។
យ៉ាងនេះក្តី បើតាមអ្នកដែលមានជំនឿលើព្រះពុទ្ធសាសនា បាននិយាយថា មិនគួរណាប្រជាពលរដ្ឋកាច់សម្បុកចាបមកដាក់លក់បែបនេះទេ ព្រោះថាគ្នាត្រូវការធ្វើសម្បុកដើម្បីពងកូន ប៉ុន្តែបើយើងកាច់យកមកបែបហ្នឹងហាក់បីដូចជា យើងទៅបំផ្លាញជម្រកគ្នាយ៉ាងនោះដែរ ។
ម្យ៉ាងវិញទៀតបើតាមការពិនិត្យសម្បុកចាបនីមួយៗ វាចាក់ព័ទ្ធស្រេះគ្នាដោយដើមស្មៅ ដើមស្រង៉ែ និងស្បូវ ជាដើម ដែលពិបាកនិងធ្វើណាស់ មិនមែនធ្វើលឿនដូចគេថាទេ ។ ប៉ុន្តែសម្បុកវាមានរន្ធចូល ហើយមានកន្លែងដាក់ពងមើលទៅដូចជា ជំនាញវិស្វករ យ៉ាងប្រសប់នឹងមិនគួរយើងជាមនុស្សទៅបំផ្លាញគ្នាឡើយ ៕
ចែករំលែកព័តមាននេះ