រាជធានីភ្នំពេញ ៖ រថយន្តមួយគ្រឿងដឹកឧបករណ៍តន្ត្រីចេញពីផ្ទះនៅខេត្តកំពង់ស្ពឺ ដើម្បីទៅប្រគំនៅស្រុកស្អាង ខេត្តកណ្ដាល ប៉ុន្តែខណៈកំពុងបើកលឿនគួរសមដែរស្រាប់តែដាច់កង់មុខបណ្ដាលឲ្យរេចង្កូតជ្រុលធ្លាក់ចូលទៅក្នុងប្រឡាយគ្មានទឹកក្រឡាប់បះជើង ប៉ុន្តែសំណាងល្អមិនបានបណ្ដាលឲ្យ មានមនុស្សណាម្នាក់រងរបួសនោះឡើយ។ គ្រោះថ្នាក់ចរាចរណ៍នេះបានកើតឡើងកាលពីរវេលាម៉ោង១២និង២០នាទីថ្ងៃត្រង់ ថ្ងៃទី២ ខែសីហា ឆ្នាំ២០១៨ នៅតាមផ្លូវជាតិលេខ២០A ស្ថិតនៅក្នុងភូមិប្រធាត្រ សង្កាត់រលួស ខណ្ឌដង្កោ រាជធានីភ្នំពេញ។
តាមប្រភព័ត៌មានបានឲ្យដឹងថា រថយន្តខាងលើនេះម៉ាកហ៊ីយ៉ាន់ដាយ ពណ៍ខៀវ បើកដោយបុរសម្នាក់ឈ្មោះ ចាន់ វិរៈ អាយុ២៨ឆ្នាំ មានទីលំនៅក្នុងភូមិបឹងច្រាំ ឃុំព្រះនិព្វាន ស្រុកគងពិសី ខេត្តកំពងស្ពឺ ។ នៅលើរថយន្តនោះមានអ្នកចម្រៀង អ្នករៀបចំឆាក ព្រមទាំងតន្ត្រីករជិះជាច្រើននាក់ផងដែរ ប៉ុន្តែសំណាងណាស់ដែលអ្នកទាំងនោះបានរួចផុតពីគ្រោះថ្នាក់ទាំងអស់។
ប្រភពដដែលបានបន្តថា នៅមុនពេលកើតហេតុ រថយន្ដខាងលើបានដឹកឧបករណ៍តន្ត្រីចេញពីផ្ទះដើម្បីទៅប្រគំនៅក្នុងពិធីជប់លៀងមួយនៅឯស្រុកស្អាង ខេត្តកណ្ដាល ដោយបើកបរធ្វើដំណើរក្នុងទិសដៅពីលិចទៅកើតក្នុងល្បឿនលឿនគួរសមដែរ។ លុះពេលទៅដល់ត្រង់ចំណុចកើតហេតុ ស្រាប់តែដាច់កង់មុខខាងស្ដាំ ទើបរេចង្កូត បណ្តាលឱ្យជ្រុលធ្លាក់ចូលប្រឡាយគ្មានទឹក ហើយក៏បានក្រឡាប់តែម្ដង ។
ក្រោយកើតហេតុ ម្ចាស់រថយន្តខាងលើបានស្ទូចយករថយន្តនោះទៅធ្វើការជួសជុលឡើងវិញដោយខ្លួនឯង និងយករថយន្តផ្សេងទៀតមកដឹកឧបករណ៍តន្ត្រី និងក្រុមតន្ត្រីករ ព្រមទាំងអ្នកចម្រៀងបន្តដំណើរទៅមុខទៀត៕
ចែករំលែកព័តមាននេះ