សហរដ្ឋអាមេរិក ៖ ប្រធានាធិបតីអាមេរិកលោកដូណាល់ ត្រាំ បានឆ្លងកាត់ដំណាក់កាលថ្មីមួយទៀតនៃវោហាសាស្ត្ររបស់លោក ប្រឆាំងរដ្ឋអាជ្ញាពិសេសលោក ROBERT MUELLER ដោយបញ្ជាក់យ៉ាងម៉ឺងម៉ាត់កាលពីថ្ងៃទី១ សីហា ពីបំណងរបស់លោកចង់ឲ្យរដ្ឋមន្ត្រីយុត្តិធម៌ លោក JEFF SESSIONS បញ្ចប់ការស៊ើបអង្កេតលើការជ្រៀតជ្រែករបស់រុស្ស៊ីចូលក្នុងយុទ្ធនាការឃោសនាបោះឆ្នោតឆ្នាំ២០១៦។
តាម TWITTER លោកត្រាំបានសរសេរថា លោក JEFF SESSIONS គួរបញ្ចប់ការស៊ើបអង្កេតនេះ មុនពេលវាធ្វើឲ្យប្រទេសយើងបាក់មុខបន្តិចថែមទៀត។ ទោះបីយ៉ាងណាសេតវិមានតែងមានការថ្លឹងថ្លែងចំពោះពាក្យពេចន៍ប្រធានាធិបតី ចៀសវាងប្រតិកម្មខ្លាំងក្លានានាលើអន្តរាគមន៍ចូលក្នុងកិច្ចការតុលាការ។ លោកស្រី SARAH SANDERSអ្នកនាំពាក្យសេតវិមាននិយាយថា នោះពុំមែនជាបទបញ្ជាទេតែជាមតិរបស់ប្រធានាធិបតីប៉ុណ្ណោះ។
លោកត្រាំចាប់តាំងពីច្រើនខែមកហើយប៉ុនប៉ងឲ្យឈប់ធ្វើការស្រាវជ្រាវនេះ ដោយលោកយល់ថា ធ្វើមកពីជម្លោះផលប្រយោជន៍របស់លោក ROBERT MUELLER ជាមួយរូបលោកក្នុងរឿងរកស៊ីកាលពីគ្រាកន្លងទៅ ហើយពេលនេះគេបង្កការបំពុលដល់អាណត្តិរបស់លោក។
ក្នុងក្របខណ្ឌនៃការស៊ើបអង្កេតនេះបណ្ដាភ្នាក់ងារ និងឥស្សរជនរុស្ស៊ីទាំងឡាយរងការចោទប្រកាន់ ក៏ប៉ុន្តែបណ្ដាសមាជិកក្រុមយុទ្ធនាការឃោសនាបោះឆ្នោតរបស់លោកត្រាំ ក៏រងការស៊ើបអង្កេតដែរ ពីបទល្មើសផ្សេងៗ ប៉ុន្តែមិនទាក់ទិនដោយផ្ទាល់ដល់ការឃុបឃិតគ្នាជាយថាហេតុជាមួយក្រុងមូស្គូឡើយ។
អតីតប្រមុខក្រុមឃោសនាបោះឆ្នោតរបស់លោកត្រាំ គឺលោក PAUL MANAFORT តាមពិតទៅសវនាការកាត់ក្ដីប្រឆាំងរូបលោក គឺលើការចោទប្រកាន់ពីការក្លែងបន្លំ និងលាងលុយកខ្វះ ខណៈការកាត់ក្ដីនោះចាប់ផ្ដើមកាលពីថ្ងៃទី៣១ កក្កដា នៅជាយក្រុងវ៉ាស៊ិនតោន៕
ចែករំលែកព័តមាននេះ