រាជធានីភ្នំពេញ ៖ រថយន្តដឹកហ្គាសធុនធំរបស់ក្រុមហ៊ុន អេនើជី ដ្យាយអិន &ត្រេឌីង មួយគ្រឿង បើកក្នុងល្បឿនយ៉ាងលឿន ខណៈមកដល់ផ្លូវកោង រថយន្តបួងចង្កូតមិនទាន់ក៏ជ្រុលឡើងខឿនសួនច្បារពុះចែកទ្រូងផ្លូវទៅបុកនឹងដើមអំពិលទឹកបារាំងមួយដើម…
រាជធានីភ្នំពេញ ៖ រថយន្តដឹកហ្គាសធុនធំរបស់ក្រុមហ៊ុន អេនើជី ដ្យាយអិន &ត្រេឌីង មួយគ្រឿង បើកក្នុងល្បឿនយ៉ាងលឿន ខណៈមកដល់ផ្លូវកោង រថយន្តបួងចង្កូតមិនទាន់ក៏ជ្រុលឡើងខឿនសួនច្បារពុះចែកទ្រូងផ្លូវទៅបុកនឹងដើមអំពិលទឹកបារាំងមួយដើម បណ្តាលឲ្យរថយន្តហោះឆ្លងទៅផ្លូវម្ខាងទៀតរងការខូចខាតយ៉ាងដំណំ។ ហេតុការណ៍នេះកើតឡើងកាលពីវេលាម៉ោង៣និង៥០នាទីទៀបភ្លឺថ្ងៃទី២ ខែសីហា ឆ្នាំ២០១៨ ត្រង់ចំណុចខាងកើតស្ពានឧកញ៉ា លី យ៉ុងផាត់ ប្រមាណ៣០០ម៉ែត្រ តាមបណ្តោយផ្លូវឧកញ៉ា លី យ៉ុងផាត់ ស្ថិតក្នុងភូមិព្រែកតារត៍ សង្កាត់ព្រែកតាសេក ខណ្ឌជ្រោយចង្វារ ។
រថយន្តបង្កម៉ាក ដេវ៉ូ ពណ៌ស ពាក់ស្លាកលេខ ភ្នំពេញ ៣B-៨៧៥៨ ជាប្រភេទរថយន្តដឹកហ្គាសរបស់ក្រុមហ៊ុន អេនើជី ដ្យាយអិន &ត្រេឌីង ដែលបើកបរដោយបុរសម្នាក់មិនស្គាល់អត្តសញ្ញាណ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញរថយន្តបង្កខាងលើបានធ្វើដំណើរតាមបណ្តោយផ្លូវឧកញ៉ាលី យ៉ុងផាត់ ក្នុងទិសដៅពីផ្លូវជាតិលេខ៦ បំណងឆ្ពោះទៅស្ពានឧកញ៉ាលី យ៉ុងផាត់ ក្នុងល្បឿនយ៉ាងលឿន។ លុះមកដល់ក្បែរចំណុចកើតហេតុដែលមានរង្វង់មូល រថយន្តបង្កខាងលើក៏បានបើកតាមរង្វង់មូលដោយមិនបានបន្ថយល្បឿន ខណៈពេលបើកផុតពីរង្វង់មូលមកដល់ចំណុចផ្លូវកោងដែលជាកន្លែងកើតហេតុ ស្រាប់តែរថយន្តបង្កបួងចង្កូតមិនទាន់ក៏ជ្រុលចង្កូតទៅខាងឆ្វេងឡើងលើខឿនសួនច្បារពុះចែកទ្រូងផ្លូវទៅបុកនឹងដើមអំពិលទឹកបារាំងមួយដើមមានទំហំជិតមួយឱបដែលនៅចំកណ្តាលសួនច្បារពុះចែកទ្រូងផ្លូវ បណ្តាលឲ្យដើមអំពិលទឹកបារាំងនោះរលាត់សំបកបន្តិចបន្តួច ចំណែកឯរថយន្តបង្កបានបន្តឆ្លងធ្លាក់ទៅផ្លូវម្ខាងទៀតទើបអស់ល្បឿនធ្វើឲ្យដាច់កាប៊ីនខាងមុខធ្លាក់ដល់ដី។ ដោយឡែកអ្នកបើកបររថយន្តបង្ករងរបួសស្រាលត្រូវបានមិត្តភក្តីដឹកយកទៅព្យាបាលនៅឯមន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានក៏ដូចជាសមត្ថកិច្ចជំនាញបានចុះមកដល់កន្លែងកើតហេតុ ឃើញថារថយន្តបង្កខាងលើមិនបង្កឱ្យមានការខូចខាតដល់សម្បត្តិសាធារណៈ និងមិនប៉ះពាល់ដល់អ្នកដទៃ ទើបសមត្ថកិច្ចព្រមអោយតំណាងខាងរថយន្តបង្កធ្វើការស្ទូចយករថយន្តបង្កចេញពីកន្លែងកើតហេតុដោយខ្លួនឯងបាត់ទៅ៕
ចែករំលែកព័តមាននេះ