ខេត្តសៀមរាប ៖ បុរសជនជាតិអូស្ត្រាលីម្នាក់ដេកស្លាប់នៅក្នុងភូមិគ្រឹះ ណេត ឈ ប៊ូទិក មួយកន្លែង ខណៈបុគ្គលិកបានប្រទះឃើញនៅក្នុងបន្ទប់លេខ១ បង្កឱ្យមានការភ្ញាក់ផ្អើលពេញក្រុងសៀមរាប។ ហេតុការណ៍នេះបង្កឱ្យការភ្ញាក់ផ្អើលឡើងកាលពីវេលាម៉ោងប្រហែល៦យប់ថ្ងៃទី១ ខែសីហា ឆ្នាំ២០១៨ ស្ថិតនៅចំណុចភូមិគ្រឹះ ណេត ឈ ប៊ូទិក រ៉េស៊ីដិន ក្នុងក្រុមទី១ ភូមិកក្រាញ់ សង្កាត់សៀមរាប ក្រុងសៀមរាប ខេត្តសៀមរាប ។
តាមប្រភពពីមន្ត្រីនគរបាលខេត្តបានប្រាប់ឱ្យដឹងថា ជនរងគ្រោះដែលស្លាប់ឈ្មោះ MCCRANN JAKEBEN JAMIN ភេទប្រុស អាយុ៤៣ឆ្នាំ ជនជាតិអូស្ត្រាលីកាន់លិខិតឆ្លងដែនលេខPA១៤០៩០៩៩ ជាភ្ញៀវទេសចរចូលមកស្នាក់នៅបន្ទប់លេខ១ ក្នុងភូមិគ្រឹះខាងលើ កាលពីថ្ងៃទី១៧ ខែមីនា ឆ្នាំ២០១៨។
បើតាមការបំភ្លឺរបស់បុគ្គលិកភូមិគ្រឹះបានឱ្យសមត្ថកិច្ចដឹងថា នៅវេលាម៉ោងប្រហែល៦យប់ថ្ងៃទី១ ខែសីហា ឆ្នាំ២០១៨ ដោយមិនឃើញជនរងគ្រោះខាងលើចេញពីក្នុងបន្ទប់ ខ្លួនក៍បានដើរទៅគោះទ្វារបន្ទប់តែគ្មានអ្នកឆ្លើយតប ដោយមានការសង្ស័យ ខ្លួនក៏បាននាំគ្នាគាស់ទ្វារបន្ទប់ចូលមើល ស្រាប់តែឃើញជនរងគ្រោះដេកស្លាប់នៅលើគ្រែក្នុងបន្ទប់តែម្តង។
បន្ទាប់ពីសមត្ថកិច្ចធ្វើការស្រាវជ្រាវ រួចមកកម្លាំងជំនាញបានសហការជាមួយលោកវេជ្ជបណ្ឌិត អុិត ឆបឆរ័ត្ន គ្រូពេទ្យអមតុលាការ ហើយបានសន្និដ្ឋានថា ជនរងគ្រោះពិតជាស្លាប់ដោយខ្យល់គរពិតប្រាកដមែន ពុំមែនជាករណីឃាតកម្មនោះទេ។
បច្ចុប្បន្ន សពជនរងគ្រោះត្រូវបានកម្លាំងសមត្ថកិច្ចបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យមិត្តភាពខ្មែរ-សូវៀត(ពេទ្យរុស្ស៊ី) នៅរាជធានីភ្នំពេញតាមសំណូមពរ របស់តំណាងស្ថានទូត ដើម្បីប្រគល់សពជូនក្រុមគ្រួសារ៕
ចែករំលែកព័តមាននេះ