រាជធានីភ្នំពេញ៖ ច្រើនឆ្នាំមកហើយដែលតារាកំប្លែងម៉ក់ សុគន្ឋដានិច្ច ហៅនាងប្រិមប្រិយលាក់បាំងកូនស្រីកូនស្រីរបស់ខ្លួន ។ ទើបតែពេលនេះប្រិមប្រិយបានទម្លាយអាថ៌កំបាំងដោយបង្ហាញមុខកូនស្រីរបស់នាង ។
កូនស្រីរបស់នាងប្រិមប្រិយ គឺជាតំណក់ឈាមជាមួយបុរសម្នាក់ដែលមានអាជីពជាអ្នកសិល្បៈដែរក្រោយពេលនាងប្រិមប្រិយបោះជំហានចូលអាជីពសិល្បៈអំឡុងវ័យប្រមាណ១៨ឆ្នាំ ។ ពួកគេលង់ស្នេហ៍ទៅវិញទៅមក ហើយបន្ទាប់ពីសាងស្នេហ៍មានកូនស្រីមួយក៏បែកបាក់គ្នាវិញ ។ ប្រិមប្រិយមើលថែកូនស្រី ផ្តល់ភាពកក់ក្តៅមិនចាញ់អ្នកផ្សេងឡើយ ។
កាលពីច្រើនខែមុននេះនាងប្រិមប្រិយបានរកឃើញបុរសខ្មែរនៅអាមេរិកធ្វើជាម្ចាស់ស្នេហ៍ពេញមុខក្នុងពេលនាងទៅសម្តែងនៅទីនោះប្រមាណជិត១ឆ្នាំ ។ បុរសខ្មែរនៅអាមេរិកដែលជាអ្នកចម្រៀងឈ្មោះរ៉ានីត បានមកកម្ពុជា ហើយភ្ជាប់ពាក្យជាមួយប្រិមប្រិយ។ ចំណងស្នេហ៍នោះមិនបានប៉ុន្មានផងស្រាប់តែនាងប្រិមប្រិយ ប្រកាសថានាង និងគូដណ្តឹងបែកបាក់គ្នាហើយ ។
បន្ទាប់ពីនាងប្រិមប្រិយ បង្ហាញមុខកូនស្រីរបស់ខ្លួនវ័យ១០ឆ្នាំ ធ្វើឱ្យមានការចាប់អារម្មណ៍ទាំងអ្នកក្នុង និងក្រៅរង្វង់សិល្បៈ ។ ការចាប់អារម្មណ៍ព្រោះកន្លងមកមានតែមិត្តភក្តិសិល្បៈស្និទ្ធស្នាលប៉ុណ្ណោះដែលដឹងថាប្រិមប្រិយ មានកូនស្រី ពីព្រោះនាងតែងលាក់បាំងអំពីជីវិតឯកជនរបស់ខ្លួន ទោះបីជាជជីកសួរនាងយ៉ាងណាក៏នាងមិនសារភាពដែរ ដោយសារតែខ្លាចធ្លាក់ប្រជាប្រិយភាព ។
បើតាមប្រភពព័ត៌មានមួយខ្សឹបឲ្យដឹងកាលពីពេល ថ្មីៗកន្លងមកថា មូលហេតុដែល ប្រិមប្រិយ សម្រេចចិត្តបើកបង្ហាញមុខមាត់ពិតរបស់កូនស្រីខ្លួននៅក្នុងពេលនេះ គឺដោយសារមិនចង់លាក់បាំងតទៅទៀត ហើយក៏មិនចង់ឱ្យគេសួរសំណួរ ដដែលៗ ជាពិសេស ថ្មីៗនេះមានបុរសមួយចំនួនតាមនាងច្រើនពេក ទោះជានាងព្យាយាមប្រកែកក៏គេនៅតែតាមនាងស្អិត ។ ដើម្បីគេចចេញពីរឿងរ៉ាវទាំងនេះ នាងត្រូវបង្ហាញការណ៍ពិតឱ្យគ្រប់គ្នាបានដឹង និងឈប់រំខាននាងទៀត ។
ពេលដែលប្រិមប្រិយ សម្រេចចិត្តបង្ហាញមុខកូនស្រីរបស់ខ្លួនជាសាធារណៈបែបនេះ ធ្វើឱ្យនាងសប្បាយចិត្ត មិនសូវខ្វាយខ្វល់ដូចមុនទេ នាងចាប់ផ្តើមទទួលស្គាល់ និងទទួលការណ៍ពិតគ្រប់បែបយ៉ាងនៃជីវិតរបស់ខ្លួន ដោយមិនខ្លាចដូចជាពេលមុនទៀតឡើយ ។
មិត្តហ្វេសប៊ុកសរសើរថា កូនស្រីរបស់ ប្រិមប្រិយ ស្រស់ស្អាតមិនចាញ់ម្តាយទេ ។ មិនតែប៉ុណ្ណោះអ្នកគាំទ្រជូនពរឲ្យនាងប្រិមប្រិយរកបានគូគ្រងសមតាមបំណង ៕
ចែករំលែកព័តមាននេះ