ខេត្តមណ្ឌលគិរី ៖ ដីព្រៃរបស់រដ្ឋរាប់រយហិកតា នៅជិតតំបន់របៀងដែនជម្រកសត្វព្រៃភ្នំព្រេច និងលំផាត់ ស្ថិតក្នុងភូមិរយ៉លើ និងភូមិរវ៉ាក់ ឃុំរយ៉ ស្រុកកោះញែក កំពុងរងការឈូសឆាយទ្រង់ទ្រាយធំ អស់រយៈពេលជាង២ខែមកហើយ ខណៈអាជ្ញាធរស្រុក និងខេត្តហាក់នៅស្ងៀមស្ងាត់ ទោះមានសកម្មភាពឈូសឆាយជាយូរថ្ងៃខែមកហើយក្តី ។
ប្រជាសហគមន៍ភូមិរយ៉បានឱ្យដឹងថា គេបានឃើញគ្រឿងចក្រធុនធំជាច្រើនគ្រឿង ដូចជាអេស្ការវ៉ាទ័រ ត្រាក់ទ័រ ម៉ាស៊ីនអារឈើ រួមនិងមនុស្សប្រមាណជាង១០នាក់ បានចូលទៅតំបន់ខាងលើ ត្រង់ចំណុចអូរ
តាំហច(ភូមិរយ៉លើ) ត្រពាំងតាទូត ត្រពាំងទឹកល្អក់(ភូមិរវ៉ាក់) តាំងពីមុនថ្ងៃបោះឆ្នោត ពោលគឺអំឡុងខែ៥ (ជាងពីរខែមកហើយ) ។
ប្រភពបន្តថា មនុស្សមួយក្រុមនោះ ត្រូវបានគេមើលឃើញថា ចាប់ផ្តើមវាយផ្តួលដើមឈើរាប់ម៉ឺនដើម កាប់អារឈួសឆាយយកដី ដោយគ្មានខ្លាចរអារច្បាប់បន្តិចសោះ ទោះបីតំបន់ពួកគេធ្វើសកម្មភាពជាព្រៃឈើបម្រុងទុករបស់រដ្ឋក៏ដោយ ។
លោក គង់ វិរៈ នាយសង្កាត់រដ្ឋបាលព្រៃឈើបានឱ្យដឹង នៅព្រឹកថ្ងៃទី២ សីហា នេះថា ដីនៅចំណុចហ្នឹង ជាដីរបស់បរិស្ថាន មិនមែនជាដីដែលគ្រប់គ្រងដោយរដ្ឋបាលព្រៃឈើទេ ហើយក៏មិនមែនជាដីបម្រុងទុកអចិន្ត្រៃយ៍ដែរ ។
លោក ស៊ិន វណ្ណវុឌ្ឍ អភិបាលស្រុកកោះញែកបានឱ្យដឹងដែរថា លោកមិនទាន់ស្គាល់ដីចំណុចហ្នឹងទេ… ចាំលោកចុះទៅពិនិត្យ… បើយកល្អ គួរសួរខាងបរិស្ថាន ដើម្បីមានវិធានការ…។ លោកបញ្ជាក់ថា «ឆាប់ចប់ ហើយដឹងរឿង បើខាងជំនាញ ត្រូវការកម្លាំងនោះ ស្រុកនឹងសហការ» ។
លោក ហាន សាខន នាយកដែនជម្រកសត្វព្រៃភ្នំព្រេច និងដែនជម្រកសត្វព្រៃលំផាត់ឱ្យដឹងទៀតថា
«កន្លែងហ្នឹងវាអត់មានច្បាប់ សម្រាប់ឈួសឆាយទេ តែដីទាក់ទងនឹងមានលិខិតស្នាមអី ប្រជាពលរដ្ឋលក់ មានការទទួលស្គាល់ពីស្រុកច្រើន… មានលិខិតរបស់គេ» ។
ចំពោះការឈូសឆាយដោយគ្មានច្បាប់ លោកហាន សាខន បញ្ជាក់ថា «យ៉ាប់ត្រង់០១… នៅរវ៉ាក់នៅអីនោះ… ហើយគេមានលិខិត០១របស់គេ ប៉ុន្តែគេមិនទាន់ធ្វើកាលពីមុនមក»។ លោកកែវ សុភគ៌ ប្រធានមន្ទីរបរិស្ថានខេត្តឱ្យដឹងថា «ផ្ទៀងផ្ទាត់វានៅក្រៅតំបន់ ក្រៅលំផាត់ និងភ្នំព្រេច… មិនទាន់ច្បាស់ទេ ចាំផ្ទៀងផ្ទាត់ ជាមួយដែនបម្រុងទុកអចិន្ត្រៃយ៍ និងរបៀងទៀតសិន» ។
ជុំវិញករណីខាងលើនេះ មហាជនបានលើកឡើងថា ទាំងអាជ្ញាធរដែនដី និងមន្ត្រីជំនាញ ហាក់មានការរុញដាក់គ្នាទៅវិញទៅមក គ្មានការទទួលខុសលើដែនដី ដែលខ្លួនគ្រប់គ្រង ជាពិសេសបណ្តែតបណ្តោយឱ្យជន
ទុច្ចរិតបំផ្លាញធនធានធម្មជាតិរបស់ខ្មែរ ស្រេចនឹងចិត្ត ។ មិនត្រឹមតែប៉ុណ្ណោះ មន្ត្រីដែលពាក់ព័ន្ឋក្នុងតំបន់ខាងលើបាននិយាយយករួចខ្លួន ខណៈមនុស្សមួយចំនួនត្រូវបានគេដឹងថា ទទួលបានផលប្រយោជ៍ពី អ្នកមានលុយ និងមានអំណាច ដើម្បីរុករានយកដីព្រៃជាកម្មសិទ្ធិផ្ទាល់ខ្លួន ។
គិតត្រឹមព្រឹកថ្ងៃទី២ សីហា នេះ ប្រភពបានរាយការណ៍ថា គ្រឿងចក្រកំពុងបន្តកាប់ផ្តួល និងឈូសឆាយដីព្រៃនៅចំណុចខាងលើដដែល។ ចំណែកអត្តសញ្ញាណម្ចាស់គ្រឿងចក្រទាំងនោះ កោះសន្តិភាពនៅមិនទាន់ទទួលបានជាផ្លូវការនៅឡើយ គ្រាន់តែដឹងថា ជាមនុស្សមានឥទ្ធិពលម្នាក់នៅក្នុងខេត្ត ដែលបានរៀបចំកិច្ចការរុករានដីព្រៃនេះ ជាសម្បត្តិផ្ទាល់ខ្លួន អាចមានទំហំដល់ទៅរាប់ពាន់ហិកតាឯណោះ ។
ចែករំលែកព័តមាននេះ