រាជធានីភ្នំពេញ ៖ ប្រមុខរាជរដ្ឋាភិបាលបានផ្តល់អនុសាសន៍ឱ្យពិនិត្យឡើងវិញនូវការប្រើប្រាស់ផ្លូវទឹក ដើម្បីបង្កើតជាប្រព័ន្ធដឹកជញ្ជូនមួយដែលមានភាពប្រទាក់ក្រឡាគ្នា ដើម្បីជំរុញការអភិវឌ្ឍវិស័យទាំងឡាយនៃខឿនសេដ្ឋកិច្ចសង្គម ។ នេះបើតាមការថ្លែងរបស់មន្ត្រីជាន់ខ្ពស់ក្រសួងសាធារណការ និងដឹកជញ្ជូន កាលពីថ្ងៃទី១ សីហា ម្សិលមិញ។
ក្នុងពិធីដាក់ឱ្យដំណើរការជាផ្លូវការនូវនាវាដឹកជញ្ជូនអ្នកដំណើរសាធារណៈពីព្រែកព្នៅទៅតាខ្មៅ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា ៖ « ក្នុងគោលបំណងធ្វើឱ្យវិស័យដឹកជញ្ជូនមានច្រើនជម្រើស សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់អនុសាសន៍ណែនាំដល់យើងខ្ញុំឱ្យពិនិត្យឡើងវិញនូវការប្រើប្រាស់ផ្លូវទឹក ដើម្បីបង្កើតជាប្រព័ន្ធដឹកជញ្ជូនមួយដែលមានលក្ខណៈប្រទាក់ក្រឡាគ្នា មិនអាចខ្វះបាន សម្រាប់ជួយដល់ការកសាងអភិវឌ្ឍវិស័យទាំងឡាយនៃខឿនសេដ្ឋកិច្ច និងសង្គម ជំរុញធ្វើឱ្យជីវភាពរស់នៅរបស់ប្រជាជនរីកចម្រើនកាន់តែប្រសើរឡើង ដោយហេតុថា ការដឹកជញ្ជូនតាមផ្លូវទឹក អាចដឹកបានច្រើនក្នុងតម្លៃទាប ប្រកបដោយសុវត្ថិភាព និងទៀងទាត់ពេលវេលា ដោយមិនមានការកកស្ទះចរាចរណ៍ » ។
លោកទេសរដ្ឋមន្ត្រីគូសបញ្ជាក់ថា ៖«ក្នុងជំហានបន្ត ដើម្បីឆ្លើយតបទៅនឹងការរីកចម្រើនរបស់ប្រទេសជាតិ និងតម្រូវការប្រើប្រាស់ជាក់ស្តែង សម្រួលដល់ការធ្វើដំណើរ ក៏ដូចជាដឹកជញ្ជូនកសិផលដែលចាំបាច់បម្រើជីវភាពរស់នៅប្រចាំថ្ងៃរបស់ប្រជាពលរដ្ឋ ក្រសួងគ្រោងរៀបចំពង្រីកឱ្យមានសេវាចំណតនាវា និងប្រតិបត្តិការនាវាដឹកអ្នកដំណើររបៀបនេះជាបន្តទៀត នៅតាមភូមិសាស្ត្រផ្សេងទៀតដូចជាទន្លេសាប (ព្រែកព្នៅ-ពញាឮ), ទន្លេបាសាក់ (ស្អាង), ទន្លេមេគង្គលើ (ស្ពានព្រែកតាមាក់) និងទន្លេមេគង្គក្រោម (ដីឥដ្ឋ)។
ទន្ទឹមនឹងនេះ ក្រសួងបានសហការជាមួយKOICAក្នុងការបញ្ចប់ការសិក្សាផែនការមេ នៃការដឹកជញ្ជូនតាមផ្លូវទឹកពីភ្នំពេញទៅក្រចេះ ដើម្បីជំរុញការប្រើប្រាស់ឱ្យអស់លទ្ធភាពនូវសក្តានុពលនៃទន្លេរបស់កម្ពុជា សំដៅអភិវឌ្ឍន៍ផ្នែកហេដ្ឋារចនាសម្ព័ន្ធផ្លូវទឹក និងការដឹកជញ្ជូនតាមផ្លូវទឹកឱ្យកាន់តែល្អប្រសើរឡើង » ។
បើតាមលោកទេសរដ្ឋមន្ត្រី ស៊ុន ចាន់ថុល ចំណតនាវាដឹកអ្នកដំណើរ ដែលដាក់ឱ្យដំណើរការមាន៥កន្លែង ក្នុងនោះស្ថិតនៅក្នុងភូមិសាស្ត្ររាជធានីភ្នំពេញមាន៤កន្លែង គឺចំណតឫស្សីកែវ, ផ្សារចាស់, ចតុមុខ និងច្បារអំពៅ និងមួយកន្លែងផ្សេងទៀត ស្ថិតនៅសួនច្បារតាខ្មៅ ខេត្តកណ្តាល ។
លោកបន្ដថា បន្ទាប់ពីដាក់ឱ្យប្រើប្រាស់ជាបណ្តោះអាសន្ននូវការធ្វើប្រតិបត្តិការដឹកអ្នកដំណើរដោយឥតគិតថ្លៃ ចាប់ពីថ្ងៃទី៦ មេសា ២០១៨ រហូតដល់ថ្ងៃទី១ សីហា ២០១៨ គឺប្រើប្រាស់នាវាដឹកអ្នកដំណើរចំនួន៤គ្រឿង (២គ្រឿងទិញពីប្រទេសវៀតណាម និង២គ្រឿងទៀតជួលពីក្រុមហ៊ុន Royal Express Boat)ដែលនាវានីមួយៗមានសមត្ថភាពផ្ទុកអ្នកដំណើរបាន៥៤ដល់៦០នាក់ និងមានល្បឿនជាមធ្យម៤០គីឡូម៉ែត្រក្នុង១ម៉ោង។
បើតាមក្រសួងសាធារណការ និងដឹកជញ្ជូន នាវាដឹកអ្នកដំណើរសាធារណៈពីព្រែកព្នៅ ទៅតាខ្មៅ គិតចាប់ពីថ្ងៃដាក់ដំណើរការបណ្តោះអាសន្ន រហូតដល់ថ្ងៃទី២៣ កក្កដា ២០១៨ មានអ្នកដំណើរសរុប៣០.៦៤៧នាក់ ដែលជាមធ្យមមានអ្នកដំណើរប្រមាណ២០០នាក់ក្នុង១ថ្ងៃ ៕
ចែករំលែកព័តមាននេះ