រាជធានីភ្នំពេញ ៖ បុរសម្នាក់ដែលគេស្គាល់ ជាមន្ត្រីនគរបាលបម្រើការងារនៅក្រសួងមហាផ្ទៃ និងមានឋានន្តរស័ក្តិថ្នាក់វរសេនីយ៍ទោ (សក្តិ៤កន្លះ) ត្រូវបានគេប្រទះឃើញសង្ស័យធ្វើអត្តឃាតក្នុងបន្ទប់សណ្ឋា គារខារ៉ាអូខេ«កូឡូសូ» តែមិនមានប្រភពណាមួយបញ្ជាក់ពីមូលហេតុពិតនៃការបាញ់សម្លាប់ខ្លួន ដោយកាំភ្លើងខ្លីនេះនៅឡើយទេ ។
មន្ត្រីប៉ូលិសរូបនេះ ឈ្មោះ ម៉ុន រតនៈឧត្តម អាយុ២៦ឆ្នាំ បម្រើការងារនៅក្រសួងមហាផ្ទៃ ស្នាក់នៅក្នុងសង្កាត់បឹងទំពុន២ ខណ្ឌមានជ័យ និងមានស្រុកកំណើតនៅភូមិគោកស្វាយ ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ ។
តាមប្រភពព័ត៌មានថា សាកសពមានស្នាមបាញ់សម្លាប់ ដោយប្រើកាំភ្លើងខ្លីម៉ាកK៥៤ ដោយបាញ់ចំសៀតផ្កាខាងស្តាំ ធ្លាយសៀតផ្កាខាងឆ្វេងមកក្រៅ ។ ហេតុការណ៍នេះ បានបង្កឱ្យមានការភ្ញាក់ផ្អើលនៅវេលាម៉ោង២រសៀលថ្ងៃទី១ សីហា នៅចំណុចសណ្ឋាគារ និងខារ៉ាអូខេកូឡូសូ ដែលមានទីតាំងលើបណ្តោយផ្លូវលេខ៣៦០ ក្នុងសង្កាត់បឹងកេងកងទី៣ ខណ្ឌចំការមន ។
តាមប្រភពពីសមត្ថកិច្ចនគរបាលខណ្ឌចំការមនម្នាក់បានប្រាប់ឱ្យដឹងថា ពាក់ព័ន្ធទៅនឹងករណីបាញ់សម្លាប់ខ្លួននៅក្នុងបន្ទប់សណ្ឋាគារ និងខារ៉ាអូខេ «កូឡូសូ» ត្រូវបានរកឃើញថា នៅក្បែរសាកសពមានគ្រាប់មិនទាន់ផ្ទុះចំនួន១គ្រាប់ និងក្បាលគ្រាប់ផ្ទុះរួចចំនួន១ផងដែរ ។
ពាក់ព័ន្ធទៅនឹងករណីគួរឱ្យភ្ញាក់ផ្អើលនេះ មិនមានប្រភពណាមួយបានបញ្ជាក់ប្រាប់ឱ្យដឹងពីមូលហេតុនៅឡើយទេ ។ តាមការបំភ្លឺមិនទាន់ជាផ្លូវការ ពីបុគ្គលិកក្នុងសណ្ឋាគារខារ៉ាអូខេនេះ បានប្រាប់ថា កាលពីថ្ងៃ៣១ កក្កដា មន្ត្រីប៉ូលិសសក្តិ៤កន្លះរូបនេះ ស្លៀកពាក់ស៊ីវិល បានចូលស្នាក់នៅសណ្ឋាគារជាន់ទី២ បន្ទប់លេខ២០៩ គឺសម្រាក១យប់ ។
លុះដល់ម៉ោង១២ និង៣០នាទីថ្ងៃត្រង់ ថ្ងៃទី១ សីហា ដោយសារមិនឃើញមន្ត្រីប៉ូលិសរូបនោះ ចុះមករកបាយរកទឹក ទើបមានការសង្ស័យក៏ឡើងគោះទ្វារហៅ ។ ទោះបីគោះយូរយ៉ាងណា ក៏មិនឃើញបើកទ្វារដែរ ទើបកាន់តែសង្ស័យ ក៏សម្រេចចិត្តគាស់ទ្វារចូល ក៏ប្រទះឃើញគាត់ដេកស្លាប់ក្នុងថ្លុកឈាមបាត់ទៅហើយ ។
គួរបញ្ជាក់ថា ហាងខាងរ៉ាអូខេ «កូឡូសូ»នេះដែរ នាពេលកន្លងមក ក៏ធ្លាប់មានការភ្ញាក់ផ្អើលយ៉ាងខ្លាំង នៅតាមបណ្តាញសង្គមហ្វេសប៊ុក ។ ដោយកាលនោះ មានស្ត្រីខារ៉ាអូខេម្នាក់រាំស្រាត នៅខាងក្នុងបន្ទប់ខារ៉ាអូខេខាងលើនេះ ហើយក៏ត្រូវបានកម្លាំងមានសមត្ថកិច្ចមូលដ្ឋានចុះមកបិទអស់មួយរយៈពេលខ្លី ទើបឱ្យបើកដំណើរការជាធម្មតាវិញ ដោយសារកំហុសនោះ មិនមែនមកពីម្ចាស់ហាងនោះទេ ។
រហូតមកទល់នឹងពេលនេះ ទើបមានការភ្ញាក់ផ្អើលម្តងទៀត ដោយមន្ត្រីនគរបាលថ្នាក់វរសេនីយ៍ទោម្នាក់ស្លាប់ដោយគ្រាប់កាំភ្លើងក្នុងបន្ទប់នៃសណ្ឋាគារ ។ ដោយសារតែសមត្ថកិច្ចកំពុងស្រាវជ្រាវរកការពិត ដូច្នេះព័ត៌មានច្បាស់ការណ៍នឹងផ្សាយជូននៅពេលក្រោយទៀត ។
ចែករំលែកព័តមាននេះ