រាជធានីភ្នំពេញ ៖ កម្លាំងនគរបាលព្រហ្មទណ្ឌខណ្ឌពោធិ៍សែនជ័យ បានបញ្ជូនក្រុមជនសង្ស័យចំនួន ៥នាក់ ដែលជាមុខសញ្ញាវាយប្លន់ពេលរាត្រីទៅកាន់សាលាដំបូងរាជធានីភ្នំពេញ ដើម្បីផ្ដន្ទាទោស ទៅតាមច្បាប់ កាលពីវេលាព្រឹកថ្ងៃទី១ ខែសីហា…
រាជធានីភ្នំពេញ ៖ កម្លាំងនគរបាលព្រហ្មទណ្ឌខណ្ឌពោធិ៍សែនជ័យ បានបញ្ជូនក្រុមជនសង្ស័យចំនួន ៥នាក់ ដែលជាមុខសញ្ញាវាយប្លន់ពេលរាត្រីទៅកាន់សាលាដំបូងរាជធានីភ្នំពេញ ដើម្បីផ្ដន្ទាទោស ទៅតាមច្បាប់ កាលពីវេលាព្រឹកថ្ងៃទី១ ខែសីហា ឆ្នាំ២០១៨។ បន្ទាប់ពីការឃាត់ខ្លួន និងឃុំខ្លួនបណ្ដោះអាសន្ន នៅផ្នែកនគរបាលព្រហ្មទណ្ឌនោះអស់រយៈពេល៨ថ្ងៃកន្លងមកហើយនោះ។
គួររម្លឹកផងដែរថា ជនសង្ស័យទាំង៥នាក់នោះ ត្រូវបាននគរបាលបង្ហើបប្រាប់ឲ្យស្គាល់ពីអត្តសញ្ញាណ ហើយគឺសុទ្ធតែជាបុរស។ ១,ឈ្មោះ នុត សិត ហៅអាវែង អាយុ២១ឆ្នាំ។ ស្នាក់នៅភូមិទួលពង្រ សង្កាត់ចោមចៅ១ ខណ្ឌពោធិសែនជ័យ មានភូមិកំណើតភូមិព្រៃធំ ឃុំព្រៃធំ ស្រុកកំពង់រោទិ៍ ខេត្តស្វាយរៀង។ ជននេះគឺជាបងធំគ្រប់គ្រងក្រុមមាននៅពេលថ្ងៃ ធ្វើជាកម្មករសំណង់ លុះដល់ពេលយប់ដឹកនាំកូនក្រុម ដើរវាយប្លន់យកទ្រព្យសម្បត្តិតាមទីសាធារណៈ។ ២,ឈ្មោះ សៀម វណ្ណរី អាយុ១៧ឆ្នាំ មុខរបរជាងពិដាន ស្នាក់នៅ សង្កាត់អូរបែកក្អម ខណ្ឌសែនសុខ មានស្រុកកំណើតនៅភូមិគៀនតាសៀវ ឃុំស្វាតាយយារ ស្រុកស្វាយជ្រុំ ខេត្តស្វាយរៀង។
៣,ឈ្មោះ សៀម វណ្ណរ៉ា ហៅឆាង អាយុ២២ឆ្នាំ មានស្រុកកំណើតនៅ គៀនតាសៀវ ឃុំស្វាយយ៉ា ស្រុកស្វាយជ្រំ ខេត្តស្វាយរៀង។ និងស្នាក់នៅក្នុងភូមិត្រពាំងឈូក សង្កាត់អូរ បែកក្អម ខណ្ឌសែនសុខ។ ៤,ឈ្មោះ ម៉ៅ ថែល អាយុ២៥ឆ្នាំ មានស្រុកកំណើត នៅក្នុងភូមិ ចម្ការគួយ ឃុំដំរីពួន ស្រុកស្វាយអន្ទរ ខេត្តព្រៃវែង។ ៥,ឈ្មោះ លៀប អ៊ីសា អាយុ២២ឆ្នាំ ជ័យមានស្រុកកំណើតនៅភូមិព្រៃលាន ឃុំរំលេច ស្រុកស៊ីធរកណ្តាល ខេត្តព្រៃវែង។ ស្នាក់នៅផ្ទះជួលអតីតឡឥដ្ឋ ស្ថិតនៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
នគរបាលបានឲ្យដឹងថា ជនសង្ស័យទាំង៥នាក់ នេះគឺជាមុខសញ្ញាវាយប្លន់យកម៉ូតូ និងទ្រព្យសម្បត្តិប្រជាពលរដ្ឋតាមផ្លូវពេលយប់យ៉ាងសកម្ម ហើយកន្លងមកតែងបានធ្វើសកម្មភាពបានសម្រេចជាបន្តបន្ទាប់ជាច្រើនលើករួចមកហើយ។ ដោយមានឈ្មោះ នុត សិត ហៅអាវែង ជាអ្នកដឹកនាំក្រុម និងរៀបចំផែនការក្នុងការចេញធ្វើសកម្មភាព វាយប្លន់រាល់លើកហើយមិនដែលភ្លាត់ស្នៀតទេ។ប្រភពដដែលបានបន្តទៀតថា ក្រុមជនសង្ស័យជិះម៉ូតូម៉ាកហុងដាឌ្រីម សេ១១០ ស៊េរីឆ្នាំ២០១២ ចំនួន២គ្រឿង គឺក្នុងនោះ១គ្រឿង ពណ៌ខ្មៅពាក់ស្លាកលេខ ភ្នំពេញ1BM-7108 និងមួយគ្រឿងទៀត ពណ៌ខៀវ ពាក់ស្លាកលេខ ភ្នំពេញ1BH-4814។
ដោយឡែកសកម្មភាពប្លន់ចុងក្រោយ និងត្រូវអស់លក្ខណ៍នោះគឺនៅវេលា ម៉ោង៩ និង៣០នាទីយប់ ថ្ងៃទី២៤ ខែកក្កដា ឆ្នាំ២០១៨។ ក្រុមនេះបាន វាយប្លន់យកម៉ូតូ១គ្រឿងនៅមុខក្លឹមស្ប៉ាយឌ័រ ស្ថិតនៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។ ចំណែកម៉ូតូដែលពួកនេះវាយប្លន់យកនោះម៉ាក ហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ 1GC-2337 ដែលជាកម្មសិទ្ធិរបស់យុវជនម្នាក់ ឈ្មោះ ហ៊ុយ មករា អាយុ១៨ឆ្នាំ មានទីលំនៅក្នុងភូមិបឹង ឃុំរកា ស្រុកកណ្ដាលស្ទឹង ខេត្តកណ្ដាល និងស្នាក់នៅផ្ទះជួល ក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
ប្រភពខាងលើបានបន្តទៀតថា នៅមុនពេលកើតហេតុជនរងគ្រោះជិះម៉ូតូចេញពីសង្កាត់ព្រៃស ខណ្ឌដង្កោ ឆ្ពោះទៅផ្ទះជួលជាមួយមិត្តភក្ដិ២នាក់ទៀត។ លុះពេលទៅដល់ត្រង់ចំណុចកើតហេតុក៏ត្រូវជនសង្ស័យ ស្ទាក់ផ្លូវរួចបានហូតខ្សែក្រវាត់ និងកាន់ដុំថ្មដេញវាយបណ្ដាលឲ្យជនរងគ្រោះរងរបួស ទើបជនទាំងនោះ លើកយកម៉ូតូជិះគេចខ្លួន។ ស្របពេលនោះកម្លាំងនគរបាលប៉ុស្តិ៍ចោមចៅ១ និងនគរបាលចោមចៅ១ កំពុងល្បាតជិតនោះទទួលបានព័ត៌មានក៏បានចេញអន្តរាគមន៍ និងប្រកាសតាមវិទ្យុទាក់ទង ឲ្យគោលដៅផ្សេងៗជួយស្ទាក់ហើយក៏ចាប់ខ្លួនបានជាបន្តបន្ទាប់តែម្ដង៕
https://youtu.be/tf0IIpRtXpw
ចែករំលែកព័តមាននេះ