រាជធានីភ្នំពេញ ៖ ជំងឺធ្ងន់ធ្ងរមួយចំនួនដែលកំពុងតែវាយលុកលើប្រជាពលរដ្ឋកម្ពុជាយ៉ាង ស្ងៀមស្ងាត់ដូចជាជំងឺមហារីកថ្លើម ជំងឺមហារីកមាត់ស្បូន និងជំងឺមហារីកសុដន់ជាដើម បានរុញច្រានឲ្យប្រជាជនកម្ពុជាដែលមានជីវភាពធូរធាសម្រេចចិត្តជ្រើសរើសការព្យាបាលនៅក្រៅប្រទេស ប៉ុន្តែពួកគេបានត្អូញត្អែរពីការចំណាយខ្ពស់់ទាក់ទងនឹងការពិនិត្យ និងព្យាបាលជំងឺ និងការធ្វើដំណើរឆ្លងដែន…
រាជធានីភ្នំពេញ ៖ ជំងឺធ្ងន់ធ្ងរមួយចំនួនដែលកំពុងតែវាយលុកលើប្រជាពលរដ្ឋកម្ពុជាយ៉ាង ស្ងៀមស្ងាត់ដូចជាជំងឺមហារីកថ្លើម ជំងឺមហារីកមាត់ស្បូន និងជំងឺមហារីកសុដន់ជាដើម បានរុញច្រានឲ្យប្រជាជនកម្ពុជាដែលមានជីវភាពធូរធាសម្រេចចិត្តជ្រើសរើសការព្យាបាលនៅក្រៅប្រទេស ប៉ុន្តែពួកគេបានត្អូញត្អែរពីការចំណាយខ្ពស់់ទាក់ទងនឹងការពិនិត្យ និងព្យាបាលជំងឺ និងការធ្វើដំណើរឆ្លងដែន ។
អ្នកនាង ដានី វ័យ ៣៤ ឆ្នាំ ដែលបានទៅព្យាបាលនៅមន្ទីរពេទ្យមួយនាក្រុងបាងកកបានអះអាងថា អ្នកនាងចំណាយជិត ១ ម៉ឺនដុល្លារសហរដ្ឋអាមេរិក សម្រាប់ការវះដុំសាច់កាច (សង្ស័យមហារីក) ក្នុងដៃស្បូនបានលើកឡើងថា តម្លៃនេះគិតថាថ្លៃជាងពេទ្យក្នុងស្រុក តែបើនិយាយពីសេវាកម្មវិញគឺល្អ ហើយ គេមើលថែដិតដល់ណាស់ មិនបាច់ក្រុមគ្រួសាររវល់នោះទេ» ។
ចំណែក លោក សុខ សាន្ត ដែលមានវ័យប្រមាណជាង ៦០ ឆ្នាំ បានអះអាងថា ថ្លៃព្យាបាលនៅបាងកក ប្រទេសថៃ តាមលោកដឹងគឺពិតជាថ្លៃ តែសម្រាប់រូបលោកផ្ទាល់ដែលធ្លាប់ទៅព្យាបាលនៅពេទ្យថៃនៅខេត្តសុរិន្ទ គឺតម្លៃអាចទទួលយកបាន ហេតុដូច្នេះហើយទើបរូបលោក និងក្រុមគ្រួសារជ្រើសការព្យាបាលនៅសុរិន្ទ មិនមែនមន្ទីរពេទ្យល្បីនៅទីក្រុងបាងកកនោះទេ ។
លោក សាន្ត បានបន្ថែមថា៖ «ធម្មតាទៅព្យាបាលនៅក្រៅប្រទេស គឺមានបច្ចេកវិទ្យាឈាននមុខ តែតម្លៃវិញក៏ថ្លៃដែរ មិនមែនថោកទេ ។ ជាក់ស្តែងរូបខ្ញុំផ្ទាល់សម្រាប់ការព្យាបាលជំងឺមហារីកក្រពះ គឺចាយអស់រាប់ម៉ឺនដុល្លារឯណោះ» ។
លោក ភាព សុផា ប្រធានគ្រប់គ្រងអភិវឌ្ឍន៍ផ្នែកទីផ្សារកម្ពុជានៃមន្ទីរពេទ្យចូឡារ៉ាត់ ៣ ដែលជាមន្ទីរពេទ្យឯកជនមួយមានទីតាំងនៅជាយក្រុងបាងកក ឬចម្ងាយប្រមាណត្រឹម ២០ គីឡូម៉ែត្រពីព្រលានយន្តហោះអន្តរជាតិសុវណ្ណភូមិ បានឲ្យដឹងថា ការព្យាបាលជំងឺធ្ងន់ធ្ងរ ដូចជាជំងឺគ្រោះថ្នាក់សរសៃឈាមក្នុងខួរក្បាល ជំងឺបេះដូង ជំងឺមហារីក និងជំងឺមហារីកថ្លើមជាដើម គឺមានតម្លៃថ្លៃទៅតាមកំរិត និងដំណាក់កាលនៃការរក្សាព្យាបាល ។
លោក ភាព សុផា បានបញ្ជាក់ថា ដោយសារតែមន្ទីរពេទ្យរបស់ខ្លួនផ្តោលលើអតិថិជនពីប្រទេសកម្ពុជា ដូច្នេះចំនួនប្រជាពលរដ្ឋខ្មែរមកព្យាបាលនៅមន្ទីរពេទ្យរបស់លោកបម្រើការ គឺមានការកើនឡើងពីមួយឆ្នាំទៅមួយឆ្នាំ ជាក់ស្តែងអ្នកជំងឺទាំងនោះ គឺមានបញ្ហាជំងឺស្ទះសរសៃឈាមក្នុងខួរក្បាល ជំងឺស្ទះសរសៃឈាមបេះដូង ជាពិសេសគឺមហារីកសុដន់ (សម្រាប់ស្ត្រី) និងជំងឺមហារីកសួត(សម្រាប់បុរស) ។
ពាក់ព័ន្ធនឹងតម្លៃនៃការព្យាបាលនៃជំងឺមហារីកមានច្រើនប្រភេទ ឧទាហរណ៍ មហារីកសួតសម្រាប់ដំណាក់កាលទី ១ និងទី២ គឺអាចព្យាបាលជាដាច់ក្នុងតម្លៃប្រមាណជាង ២ ម៉ឺនដុល្លារសហរដ្ឋអាមេរិក ខណៈជំងឺមហារីកមាត់ស្បូនសម្រាប់ស្ត្រីក្នុងដំណាក់កាលបឋម (ដំណាក់កាលទី ១ និងទី២) ក៏ព្យាបាលបានជាដាច់ ហើយតម្លៃគឺជាង ១ ម៉ឺនដុល្លារសហរដ្ឋអាមេរិក ។
ទន្ទឹមនឹងនេះផងដែរ ពាក់ព័ន្ធនឹងជំងឺមហារីកក្នុងដំណាក់កាលធ្ងន់ធ្ងរ (ដំណាក់កាលទី ៣ ឬទី៤) គឺមិនអាចព្យាបាលបានជាដាច់នោះទេ គឺតាមស្ថានភាពខ្លះ គឺត្រឹមអាចទទួលការព្យាបាលពន្យាអាយុជីវិតតែប៉ុណ្ណោះ ហើយការចំណាយគឺមិនទៀងនោះទេ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ