រាជធានីភ្នំពេញ ៖ សហព័ន្ធកីឡាចំបាប់កម្ពុជាបានសម្រេចបញ្ជូនកីឡាករ២រូប និងកីឡាការិនី២រូប ទៅចូលរួមការប្រកួត SEA Games នៅទីក្រុងរ៉ង់ហ្គូន ប្រទេសមីយ៉ាន់ម៉ា កាលពីថ្ងៃទី៣ មេសា ដើម្បីត្រៀមលក្ខណៈមុនចូលរួមព្រឹត្តិការណ៍ប្រកួត SEA Games ពិតប្រាកដលើកទី២៧ នាចុងឆ្នាំ២០១៣ ខាងមុខ ។
លោក វ៉ាន់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាចំបាប់បានចាត់ទុកថា នេះជាការប្រកួតដ៏សំខាន់ដែលយើងត្រូវស្ទង់សមត្ថភាពខ្លួនឯងផង និងដើម្បីបានពិនិត្យមើលពីសមត្ថភាពរបស់គេផង ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់និងជាប្រធានប្រតិភូនោះបាននិយាយថា ការប្រកួតត្រៀមSEA Gamesគឺតែងតែរៀបចំឡើងនៅមុនការប្រកួតមកដល់ ដើម្បីឱ្យប្រទេសជាសមាជិកអាស៊ានទាំងអស់បានធ្វើការស្វែងយល់ពីរបៀបនៃការប្រកួត ។ តាមពិតការប្រកួតចាប់ផ្តើមពីថ្ងៃទី៥ដល់៨ មេសា ដែលប្រទេសទាំង១១ ក្នុងតំបន់អាស៊ាន ចូលរួម តែលើកនេះមិនដឹងថា ប្រទេសណាចូលរួម ប្រទេសណាមិនចូលរួមនោះទេ ។ លោកបន្ថែមថា តាមពិតយើងចង់បញ្ជូនកីឡាករ-កីឡាការិនីយើងទៅចូលរួមឱ្យបានច្រើន ប៉ុន្តែដោយសារយើងខ្វះខាត ទើបយើងសម្រេចបញ្ជូនកីឡាករ-កីឡាការិនីចំនួន៤រូប ទៅចូលរួមប៉ុណ្ណោះ ។
ចំពោះកីឡាករ-កីឡាការិនី ដែលទៅចូលរួមនោះ គឺបានកំណត់ប្រភេទទម្ងន់រួចរាល់ហើយ ដោយកីឡាការិនី ២រូប មានឈ្មោះចូវ សុធារ៉ា ជាម្ចាស់មេដាយមាស SEA Games ទី២៥ នៅឡាវ ប្រកួតប្រភេទទម្ងន់៤៨គីឡូក្រាម និងកីឡាការិនី ឌន ស្រីម៉ៅ ប្រកួតក្នុងប្រភេទទម្ងន់៥៥គីឡូក្រាម ។ ចំពោះកីឡាករ២រូបនោះ គឺ កីឡាករ ងួន គឹមហេង ប្រកួតក្នុងប្រភេទទម្ងន់៨៦គីឡូក្រាម និងកីឡាករ ងួន មករា ដែលប្រកួតក្នុងប្រភេទទម្ងន់៦៣ គីឡូក្រាម ៕
ចែករំលែកព័តមាននេះ