រាជធានីភ្នំពេញ ៖ កម្ពុជានឹងធ្វើជាម្ចាស់ផ្ទះការប្រកួតបាល់ទាត់ជម្រុះពូលC នៃព្រឹត្តិ ការណ៍ AFC Presiden’s Cup ២០១៣ នេះដោយមានការយល់ព្រមប្រគល់សិទ្ធិជាផ្លូវការពីសហព័ន្ធបាល់ទាត់ទ្វីបអាស៊ី (AFC) ។ ការប្រកួតជម្រុះពូលC នេះមាន៤ក្រុមគឺក្រុមចម្ការកៅស៊ូបឹងកេត(ជើងឯកLeague របស់កម្ពុជា ) ក្រុមAlqudsHilal Club(ជើងឯកLeague របស់ប៉ាឡេស្ទីននិងជាជើងឯករង
រាជធានីភ្នំពេញ ៖ កម្ពុជានឹងធ្វើជាម្ចាស់ផ្ទះការប្រកួតបាល់ទាត់ជម្រុះពូលC នៃព្រឹត្តិ ការណ៍ AFC Presiden’s Cup ២០១៣ នេះដោយមានការយល់ព្រមប្រគល់សិទ្ធិជាផ្លូវការពីសហព័ន្ធបាល់ទាត់ទ្វីបអាស៊ី (AFC) ។ ការប្រកួតជម្រុះពូលC នេះមាន៤ក្រុមគឺក្រុមចម្ការកៅស៊ូបឹងកេត(ជើងឯកLeague របស់កម្ពុជា ) ក្រុមAlqudsHilal Club(ជើងឯកLeague របស់ប៉ាឡេស្ទីននិងជាជើងឯករងPresiden’s Cup ឆ្នាំចាស់) ក្រុមBalkan (ជើងឯកLeague របស់តួកមេនីស្ថាន ) និងក្រុម Sri Lanka Army Sport Club (ជើងឯក League របស់ស្រីលង្កា) ។
ដោយកម្ពុជាធ្វើជាម្ចាស់ផ្ទះសហព័ន្ធបាល់ទាត់អាស៊ីបានរៀបចំកម្មវិធីប្រកួតរួចរាល់អស់ហើយគឺនៅថ្ងៃទី៦ ឧសភា ក្រុមចម្ការកៅស៊ូបឹងកេតរបស់កម្ពុជា ប្រកួតជាមួយក្រុម Sri Lanka Army Sport Club របស់ស្រីលង្កា និងក្រុមAlquds Hilal Club របស់បា៉ាឡេស្ទីន ប្រកួតជាមួយក្រុម Balkan របស់តួកមេនីស្ថាន ។ នៅថ្ងៃទី៨ ឧសភា ក្រុម Sri Lanka Army Sport Club របស់ស្រីលង្កា ប្រកួតជាមួយក្រុម Alquds Hilal Club របស់ប៉ាឡេស្ទីន និងក្រុមBalkan របស់តួកមេនីស្ថាន ប្រកួតជាមួយក្រុមចម្ការកៅស៊ូបឹងកេតរបស់កម្ពុជា ។ នៅថ្ងៃទី១០ ឧសភា ដែលជាថ្ងៃចុងក្រោយក្រុម Balkan របស់តួកមេនីស្ថាន ប្រកួតជាមួយក្រុម Sri Lanka Army Sport Club របស់ស្រីលង្កា និងក្រុមចម្ការកៅស៊ូបឹងកេតរបស់កម្ពុជា ប្រកួតជាមួយក្រុម Alquids Hilal Club របស់ប៉ាឡេស្ទីន ។
លោកប្រាក់ វុទ្ធី ដែលជាគ្រូបង្វឹករបស់ក្រុមចម្ការកៅស៊ូបឹងកេតបានបង្ហើបពីការត្រៀមខ្លួនតាំងពីដំបូងម៉្លេះ ព្រោះជើងឯក League មានកាតព្វកិច្ចចូលរួមប្រកួតក្នុងព្រឹត្តិការណ៍ AFC Presiden’s Cup ដែលត្រូវតែលេងឱ្យបានល្អក្នុងនាមជាម្ចាស់ផ្ទះ ។
លោកបែ មករា ជាអ្នកចាត់ការទូទៅរបស់ក្រុមចម្ការកៅស៊ូបឹងកេត បាននិយាយថា ពេលនេះលោកកំពុងតាមដានការប្រកួតរបស់ក្រុមលោកជាប្រចាំ ជាពិសេសការប្រកួតក្នុងក្របខ័ណ្ឌ League នេះតែម្តង ។ លោកទទួលស្គាល់ថា ក្រុមរបស់លោករឹងមាំល្អណាស់ដោយ៦ប្រកួតក្នុង League ក្រុមរបស់លោកឈ្នះទាំង៦ប្រកួត ។ ទោះបីជាយ៉ាងណាលោកមិនទាន់ស្ងប់ចិត្តទេ នៅតែរកមើលពីចំណុចខ្សោយរបស់ក្រុមជានិច្ច បើឃើញលោកនឹងរកកីឡាករល្អៗមកបំពេញបន្ថែមទាំងកីឡាករខ្មែរទាំងកីឡាករបរទេស ។ លោកមានជំនឿចិត្តថា ក្រុមរបស់លោកនឹងឆ្លងផុតវគ្គជម្រុះនេះជាមិនខាន ។
សូមបញ្ជាក់ថា AFC Presiden’s Cup ជាព្រឹត្តិការណ៍នៃការជួបគ្នារវាងក្រុមបាល់ទាត់ជើងឯក League របស់ប្រទេសនីមួយៗ ។ ២ឆ្នាំកន្លងមកព្រឹត្តិការណ៍នេះគឺក្រុមភ្នំពេញក្រោនជាអ្នកបានទទួលសិទ្ធិទៅចូលរួមប្រកួតចំនួន២លើកក្នុងឋានៈជាក្រុមជើងឯក League ២ឆ្នាំជាប់ៗគ្នា ។ ឆ្នាំ២០១១ ក្រុមភ្នំពេញក្រោនឡើងដល់វគ្គផ្តាច់ព្រ័ត្រតែប្រកួតចាញ់ក្រុមតៃប៉ិជាម្ចាស់ផ្ទះធ្វើឱ្យក្រុមនេះទទួលបានឋានៈជាជើងឯករងប៉ុណ្ណោះ លុះនៅឆ្នាំ២០១២ ក្រុមភ្នំពេញក្រោនបានចូលរួមម្តងទៀត តែលេងមិនបានល្អដូចឆ្នាំ២០១១ឡើយ ។ សម្រាប់ឆ្នាំ២០១៣ នេះជារដូវកាលថ្មីរបស់ក្រុមចម្ការកៅស៊ូបឹងកេតវិញម្តង ដែលជាក្រុមជើងឯក League របស់កម្ពុជា ដោយក្រុមនេះបានយកឈ្នះគូប្រកួតរបស់ខ្លួនកន្លងមកក្នុងព្រឹត្តិការណ៍ Metfone Cambodia League ២០១២ ដែលការប្រកួតមានរយៈពេល៦ខែហើយមានរហូតដល់ទៅ១០ក្លិបចូលរួមក្នុងនោះមានក្លិបភ្នំពេញក្រោន ,ព្រះខ័នរាជ , ណាហ្គាខប , ចម្ការកៅស៊ូបឹងកេត , អគ្គស្នងការដា្ឋននគរបាលជាតិ ,បៀលប្រាយយូណាយធីត ,ឆ្លាមសមុទ្រ , សាកលវិទ្យាល័យវេស្ទើន , ក្រសួងការពារជាតិ និងគិរីវង់សុខសែនជ័យ ។
ក្លិបចំនួន៤បានឡើងដល់វគ្គពាក់កណ្តាលផ្តាច់ព្រ័ត្រគឺក្លិបព្រះខ័នរាជ ,ណាហ្គាខប ចម្ការកៅស៊ូបឹងកេត និងអគ្គស្នងការដ្ឋាននគរបាលជាតិធ្វើការប្រកួតយកចំណាត់ថ្នាក់លេខ១,២,៣ និង៤។ ជាភ័ព្វសំណាងក្រុមចម្ការកៅស៊ូបឹងកេតទទួលបានជ័យជម្នះជាប្រវត្តិសាស្ត្រក្នុងការប្រកួតផ្តាច់ព្រ័ត្រ ហើយក៏មានសិទ្ធិចូលរួមការប្រកួតពានរង្វាន់ AFC Presiden’s Cup ។ ចាំមើលថាតើក្រុមចម្ការកៅស៊ូបឹងកេតមានសំណាងដណ្តើមបានជ័យជម្នះដូចការប្រកួតក្នុង League ដែរឬអត់ ?
ចែករំលែកព័តមាននេះ