បន្ទាយមានជ័យ ៖ គួរឲ្យអាណោចអាធ័មក្មេងប្រុសវ័យជំទង់ម្នាក់ត្រូវបានរន្ទះបាញ់ស្លាប់ភ្លាម នៅនឹងកន្លែង ពេលដែលក្មេងប្រុសរងគ្រោះរត់លេងបាល់ទាត់ជាមួយមិត្តភក្តិក្នុងភូមិជាមួយគ្នានៅពេលមេឃកំពុងភ្លៀង ។ ហេតុការណ៍នេះបានកើតឡើងនៅវេលាម៉ោង៤រសៀលថ្ងៃទី៣០ ខែកក្កដា ឆ្នាំ២០១៨ នៅភូមិអូរស្វាយ ឃុំតាគង់ ស្រុកម៉ាឡៃ ខេត្តបន្ទាយមានជ័យ។
តាមប្រភពព័ត៌មានពីនគរបាលមូលដ្ឋានបានឲ្យដឹងថា ក្មេងប្រុសដែលស្លាប់ឈ្មោះ ឆន ចន្ថា អាយុ១៧ឆ្នាំ នៅភូមិអូរស្វាយ ឃុំតាគង់ ស្រុកម៉ាឡៃ ខេត្តបន្ទាយមានជ័យ។
តាមប្រភពព័ត៌មានបានឱ្យដឹងថា មុនពេលកើតហេតុ ផ្ទៃមេឃមានភ្លៀងមួយមេយ៉ាងខ្លាំងលាយឡំជាមួយ
នឹងផ្គររន្ទះ ពេលនោះក្មេងរងគ្រោះរួមជាមួយនឹងមិត្តនៅក្នុងភូមិជាមួយគ្នាចំនួន៥ទៅ៦នាក់បាននាំគ្នារត់លេងទាត់បាល់នៅពេលមេឃកំពុងទឹកភ្លៀងធំលាយនឹងផ្គរន្ទះ ហើយបាល់បានខ្ទាតទៅក្រោមដើមចាន់គីរីមួយដើមយ៉ាងធំជិតកន្លែងលេងបាល់ក្នុងភូមិ ហើយក្មេងប្រុសរងគ្រោះក៏រត់ទៅរើសបាល់នៅក្រោមដើមចាន់គីរីនោះ ស្រាប់តែពេលនោះរន្ទះបានបាញ់ដើមចាន់គីរី បណ្តាលឱ្យត្រូវចំក្មេងប្រុសរងគ្រោះនោះស្លាប់ភ្លាមៗផងដែរ ចំណែកក្មេងៗដែលលេងជាមួយពុំមានគ្រោះថ្នាក់អ្វីនោះទេ ។
បច្ចុប្បន្ន សពក្មេងរងគ្រោះត្រូវបានក្រុមគ្រួសារចាត់ចែងធ្វើបុណ្យតាមប្រពៃណី។
សូមបញ្ជាក់ផងដែរថា នៅវេលាម៉ោង២និង៤៥នាទីរសៀលថ្ងៃទី២៩ ខែកក្កដា ឆ្នាំ២០១៨ នៅស្រុកអូរជ្រៅ ក៏មានភ្លៀងធ្លាក់យ៉ាងខ្លាំងលាយឡំជាមួយនឹងខ្យល់ ផ្គរន្ទះផងដែរ ។ ពេលនោះមានសត្វគោចំនួន២ក្បាល កំពុងដើរស៊ីស្មៅនៅវាលស្រែ ក្នុងភូមិសាស្ត្រឃុំចង្ហារក៏ត្រូវរន្ទះបាញ់ងាប់នៅនឹងកន្លែងទាំង២ក្បាលតែម្តង៕
ចែករំលែកព័តមាននេះ