ខេត្តព្រៃវែង ៖ យ៉ាងហោចណាស់មនុស្សម្នាក់បានស្លាប់ និង៤នាក់ផ្សេងទៀតបានរងរបួសធ្ងន់ នៅក្នុងហេតុការណ៍គ្រោះថ្នាក់ចរាចរណ៍ចំនួន៣ករណីផ្សេងពីគ្នា ដែលមូលហេតុបណ្តាលមកពីការបើកបរខ្វះការប្រុងប្រយ័ត្ន និងការបើកបរដោយមិនគោរពច្បាប់ចរាចរណ៍។
ករណីទី១-កាលពីវេលាម៉ោង៧ព្រឹកថ្ងៃទី៣១ ខែកក្កដា នៅត្រង់ចំណុចចន្លោះគីឡូម៉ែត្រ៩២និង៩៣ លើកំណាត់ផ្លូវជាតិលេខ១ ក្នុងភូមិជ្រលង ឃុំប្រាសាទ ស្រុកកំពង់ត្របែក ខេត្តព្រៃវែង បានកើតឡើងរវាងរថយន្តបុកជាមួយរ៉ឺម៉កម៉ូតូដឹកអេតចាយ។
សមត្ថកិច្ចបានឱ្យដឹងថា ករណីនេះបង្កឡើងដោយរ៉ឺម៉កម៉ូតូដឹកអេតចាយមួយគ្រឿង ( គ្មានស្លាកលេខ ) បើកបរក្នុងទិសដៅពីកើតទៅលិច លុះមកដល់ចំណុចកើតហេតុ រ៉ឺម៉កម៉ូតូបានបត់ឆ្លងថ្នល់ទៅខាងឆ្វេងដៃដោយមិនបានប្រុងប្រយ័ត្ន ទើបត្រូវរថយន្តមួយគ្រឿងម៉ាកឡិចស៊ីស RX300 ពណ៍ស ពាក់ស្លាកលេខ ភ្នំពេញ ២N-០៣៦៧ បើកបរដោយឈ្មោះ អេន ជា ភេទប្រុស អាយុ២៧ឆ្នាំ បើកមកពីខាងមុខក្នុងទិសដៅផ្ទុយគ្នាបុកចំពីមុខពេញទំហឹង បណ្តាលឱ្យក្រឡាប់រ៉ឺម៉កម៉ូតូឆេះនៅកណ្តាលថ្នល់ ចំណែកអ្នកបើករ៉ឺម៉កម៉ូតូឈ្មោះ មុំ ហ៊ន់ ភេទប្រុស អាយុ៦៧ឆ្នាំ និងប្រពន្ធឈ្មោះ អៀង សុបុន អាយុ៦៥ឆ្នាំ បានខ្ទាតចេញពីរ៉ឺម៉ក រងរបួសធ្ងន់ធ្ងរទាំង២នាក់តែម្តង ហើយត្រូវបានសមត្ថកិច្ចហៅរថយន្តសង្គ្រោះដឹកយកទៅព្យាបាលនៅមន្ទីរពេទ្យបង្អែកស្រុកកំពង់ត្របែក ។ ចំពោះអ្នកបើកបររថយន្ត រួមទាំងរថយន្ត និងរ៉ឺម៉កម៉ូតូត្រូវបានសមត្ថកិច្ចឃាត់ទុកនៅអធិការដ្ឋាននគរបាលស្រុកកំពង់ត្របែកដើម្បីចាត់ការតាមនីតិវិធី។
ករណីទី២-កាលពីវេលាម៉ោង៩និង៣០នាទីព្រឹកថ្ងៃទី៣១ ខែកក្កដា នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ៧៥ និង៧៦ ត្រង់ចំណុចភូមិក្រសាជេត ឃុំរំចេក ស្រុកព្រះស្តេច ខេត្តព្រៃវែង បានកើតឡើងរវាងរថយន្តបុកជាមួយម៉ូតូ ។
ជនរងគ្រោះឈ្មោះ ស៊ាន សំណាង ភេទប្រុស អាយុ២៨ឆ្នាំ មានទីលំនៅក្នុងភូមិប្រាសាទ ឃុំប្រាសាទ ស្រុកកំពង់ត្របែក ជិះម៉ូតូមួយគ្រឿងម៉ាកហុងដាឌ្រីម ធុនC125 ពណ៍ខ្មៅ ពាក់ស្លាកលេខស្វាយរៀង ១I-៩៤៥០ ត្រូវបានរថយន្តមួយគ្រឿងមិនស្គាល់ម៉ាកបុកចំពេញទំហឹង នៅចំណុចកើតហេតុខាងលើ បណ្តាលឱ្យអ្នកបើកបរម៉ូតូស្លាប់បាត់បង់ជីវិតភ្លាមៗនៅនឹងកន្លែងកើតហេតុ រីឯរថយន្តបានបើករត់គេចខ្លួនបាត់ស្រមោល។
រីឯករណីទី៣-កាលពីវេលាម៉ោង១០ព្រឹកថ្ងៃទី៣១ ខែកក្កដា នៅលើកំណាត់ផ្លូវជាតិលេខ១ ត្រង់ចំណុចភូមិក្រាំងក្អុក ឃុំកំពង់សឹង ស្រុកព្រស្តេច ខេត្តព្រៃវែង បានកើតឡើងរវាងរថយន្ត បុកជាមួយម៉ូតូអ្នកដំណើរក្នុងទិសដៅបញ្ច្រាសគ្នា។
ចំពោះករណីនេះ មន្ត្រីនគរបាលចរាចរណ៍ស្រុកព្រះស្តេចបានអោយដឹងថា រថយន្តមួយគ្រឿង ពណ៌ក្រហម ពាក់ស្លាកលេខ ភ្នំពេញ ៣C-១៩២៧ បានបើកទៅបុកជាមួយម៉ូតូមួយគ្រឿង ម៉ាកហុងដាឌ្រីម ធុនC125 ពណ៍ខ្មៅ ពាក់ស្លាកលេខ ភ្នំពេញ ១FT-១៦៦២ នៅចំកណ្តាលទ្រូងថ្នល់ បណ្តាលឱ្យភាគីខាងអ្នកបើកបរម៉ូតូជាប្តីឈ្មោះ វេង សាបុន ភេទប្រុស អាយុ៣០ឆ្នាំ និងប្រពន្ធឈ្មោះ ឡុងបុត ឈាងម៉ៃ អាយុ២៣ឆ្នាំ បានរងរបួសធ្ងន់ ត្រូវបានដឹកយកទៅសង្គ្រោះនៅក្នុងគ្លីនិកឯកជន ចំណែកម៉ូតូនិងរថយន្តត្រូវបានសមត្ថកិច្ចយកទៅរក្សាទុករង់ចាំការដោះស្រាយនៅពេលក្រោយ។
សមត្ថកិច្ចដដែលនេះបានបញ្ជាក់ថា ភាគីទាំង២មានកំហុសដូចគ្នា ដោយម្នាក់ៗបានបើកជែងទៅកណ្តាលទ្រូងថ្នល់ដូចគ្នា ទើបបុកគ្នាបណ្តាលឱ្យគ្រោះថ្នាក់បែបនេះ៕
ចែករំលែកព័តមាននេះ