ខេត្តបាត់ដំបង ៖ ស្ត្រីម្នាក់ដែលមានប្រវត្តិធ្លាប់ដើរគាស់ផ្ទះលួចទ្រព្យសម្បត្តិប្រជាពលរដ្ឋឆ្លងខេត្ត និងធ្លាប់ត្រូវសមត្ថកិច្ចចាប់ខ្លួនបានផង
ពេលនេះត្រូវម្ចាស់ផ្ទះរងគ្រោះចាប់ខ្លួនប្រគល់ឱ្យសមត្ថកិច្ចជាថ្មី ពេលកំពុងធ្វើសកម្មភាពចូលលួចទ្រព្យសម្បត្តិក្នុងផ្ទះពលរដ្ឋម្នាក់ នៅភូមិសំណាញ់ ឃុំភ្នំសំពៅ ស្រុកបាណន់ កាលពីវេលាម៉ោង១០ និង១៥នាទីព្រឹកថ្ងៃទី៣១ កក្កដា ខណ:ម្ចាស់ផ្ទះកំពុងលក់ដូរនៅខាងមុខ ។
របាយការណ៍សមត្ថកិច្ចបានឱ្យដឹងថា ជនសង្ស័យដៃឆើតរូបនេះ ឈ្មោះភិន សុភឿន ហៅឡី វីន ភេទស្រី អាយុ៣៥ឆ្នាំ នៅភូមិបាឡាត់ ឃុំនរា ស្រុកសង្កែ ។ ស្ត្រីរូបនេះបានទាញចំរឹងបង្អូចផ្ទះរបស់ឈ្មោះភួង សារ៉ង ភេទស្រី អាយុ៥៣ឆ្នាំ ហើយចូលទៅគាស់ទូក្នុងបន្ទប់ដោយប្រើកន្ត្រៃ ខណ:ម្ចាស់កំពុងលក់ដូរនៅខាងមុខផ្ទះ ប៉ុន្តែភ្លាមៗនោះ ត្រូវម្ចាស់ចូលទៅទាន់ក៏ចាប់ប្រគល់ឲ្យនគរបាលប៉ុស្ដិ៍តែម្ដង ។
គួរំលឹកថា បើតាមរបាយការណ៍សមត្ថកិច្ចបានឱ្យដឹងថា ស្ត្រីឈ្មោះភិន សុភឿន នេះ ធ្លាប់ត្រូវកម្លាំងនគរបាលក្រុងសៀមរាបឃាត់ខ្លួនម្ដងហើយ កាលពីថ្ងៃទី១៩ មីនា ២០១៨ ដែលស្ត្រីដៃឆើតរូបនេះ បានធ្វើសកម្មភាពគាស់ផ្ទះគ្រួបង្រៀនម្នាក់ នៅភូមិប្រិយ៍ចាស់ សង្កាត់ទឹកវិល ក្រុងសៀមរាប ខេត្តសៀមរាប ។
គេមិនដឹងថា សមត្ថកិច្ចខេត្តសៀមរាបបានបញ្ជូនស្ត្រីរូបនេះទៅតុលាការតាមនីតិវិធីច្បាប់ ឬយ៉ាងណានោះទេ ទើបបានជាស្ត្រីរូបនេះ មានឱកាសនៅក្រៅឃុំដើរប្រព្រឹត្តបទល្មើសដដែលៗនេះ ជាបន្តបន្ទាប់បែប
នេះ។ ប៉ុន្តែបើតាមការស្រង់សំដីរបស់សមត្ថកិច្ច ដែលបានសួរចម្លើយស្ត្រីដៃឆើតរូបនេះ បាននិយាយថា សមត្ថកិច្ចខេត្តសៀមរាប មិនបានឃុំខ្លួនទេ ទើបខ្លួនមានឱកាសនៅក្រៅឃុំបែបនេះ ។
លោក ជេត វណ្ណនី ស្នងការរងខេត្ត ក៏បានបញ្ជាក់ដែរថា ស្ត្រីរូបនេះ ពិតជាបានសារភាពដូច្នេះមែន ។ លោកស្នងការរងបានបន្ថែមថា ជុំវិញករណីគាស់បង្អូចចូលផ្ទះគេនៅឃុំភ្នំសំពៅ ស្រុកបាណន់ ខាងលើនេះ ស្ត្រីរូបនេះ កំពុងរើកកាយរកទ្រព្យសម្បត្តិ តែត្រូវម្ចាស់ផ្ទះចូលទៅទាន់ ក៏រាយការណ៍ទៅសមត្ថកិច្ចមូលដ្ឋានឱ្យឃាត់ខ្លួនតែម្ដងទៅ ។ ពេលនេះ មន្ត្រីការិយាល័យជំនាញកំពុងសួរនាំ ដើម្បីកសាងសំណុំរឿងបញ្ជូនស្ត្រីរូបនេះ ទៅតុលាការហើយ។
សូមបញ្ជាក់ដែរថា បច្ចុប្បន្ននេះ អំពើចោរកម្ម ហាក់កំពុងកើតឡើងយ៉ាងកក្រើក នៅតាមបណ្ដាស្រុកមួយចំនួន និងនៅក្នុងក្រុងបាត់ដំបង ស្របពេលដែលការតែងតាំងតំណែងស្នងការរងនគរបាលខេត្ត និងមេបញ្ជាការរងកងរាជអាវុធហត្ថខេត្ត មានចំនួនកាន់តែច្រើនឡើងៗ តែមិនបានធ្វើឱ្យបទល្មើសទាំងនេះថមថយឡើយ ។
បច្ចុប្បន្ន សម្រាប់ខេត្តបាត់ដំបង មានស្នងការរងខេត្តចំនួនជាង២០រូប រីឯមេបញ្ជាការរងកងរាជអាវុធហត្ថខេត្តប្រហែល១០រូប ។ បើតាមការកត់សម្គាល់ អំពើរចោរកម្មដែលបានកើតឡើងដ៏កក្រើក នាសព្វថ្ងៃនេះមានដូចជាបទល្មើសកាច់សោ.កលួចយកម៉ូតូ, ឆក់ទ្រព្យសម្បត្តិអ្នកដំណើរ, និងគាស់ទម្លាយលំនៅឋានប្រជាពលរដ្ឋលួចទ្រព្យសម្បត្តិ ខណ:បទល្មើសគ្រឿងញៀនកំពុងរីករាលដាលស្ទើរគ្រប់ទីកន្លែងមិនថា ទីប្រជុំជនឬទីជនបទ ។
អ្វីដែលធ្វើឱ្យប្រជាពលរដ្ឋបារម្ភកាន់តែខ្លាំងនោះ គឺជនល្មើសហាក់បង្កើនសកម្មភាពមិនថា ពេលយប់ឬពេលថ្ងៃឡើយ ដែលមើលទៅហាក់មិនខ្លាចញញើតចំពោះសមត្ថកិច្ចឡើយ ។ មិនតែប៉ុណ្ណោះ ពេលនេះមានលេចមុខចោរស្ត្រីចេញធ្វើសកម្មភាពដើរគាស់ផ្ទះប្រជាពលរដ្ឋឆ្លងខេត្តទៀត ដែលនាំឲ្យពលរដ្ឋរស់នៅតាមមូលដ្ឋានកាន់តែព្រួយបារម្ភទ្វេដង អំពីបញ្ហាអសន្តិសុខនៅក្នុងមូលដ្ឋាន ហើយមិនហ៊ានចេញពីផ្ទះទៅប្រកបរបរទទូលទានទែ ។ ប៉ុន្តែយ៉ាងណាក៏ដោយ កន្លងមកជនដៃដល់មួយចំនួន ក៏ត្រូវបានសមត្ថកិច្ចបង្ក្រាបជាបន្តបន្ទាប់ផងដែរ ។
ចែករំលែកព័តមាននេះ