វៀតណាមមានគោលដៅក្លាយជាប្រទេសកំពូលទាំង15
ទីក្រុងហាណូយ ៖ នាយករដ្ឋមន្ត្រីវៀតណាម លោក Nguyen Xuan Phuc បាននិយាយថា រដ្ឋាភិបាល និងអាជីវករត្រូវតែសហការគ្នា…
ទីក្រុងហាណូយ ៖ នាយករដ្ឋមន្ត្រីវៀតណាម លោក Nguyen Xuan Phuc បាននិយាយថា រដ្ឋាភិបាល និងអាជីវករត្រូវតែសហការគ្នា ដើម្បីធ្វើឲ្យវៀតណាមស្ថិតក្នុងចំណោមប្រទេសអភិវឌ្ឍន៍ផ្នែកកសិកម្មជាងគេទាំង១៥ លើពិភពលោក ។
លោកនាយករដ្ឋមន្ត្រីបាននិយាយក្នុងសន្និសីទមួយនៅខេត្ត Lam Dong កាលពីថ្ងៃចន្ទថា ៖« កសិកម្មបានជួយដល់ជីវិតកសិករ ខណៈចូលរួមដល់ការលូតលាស់សេដ្ឋកិច្ចប្រទេសថែមទៀត » ។
ទោះជាយ៉ាងណា វិស័យនេះស្មើតែ១៨% នៃផលិតផលក្នុងស្រុកសរុប (GDP) របស់ប្រទេសប៉ុណ្ណោះ បើទោះជាមានពលរដ្ឋ៧០%នៃពលរដ្ឋទាំងអស់ ធ្វើការក្នុងវិស័យនេះក្តី ។ លោកបន្ថែមថា វិស័យកសិកម្មត្រូវតែមានការកែតម្រង់ដោយប្រើប្រាស់វិទ្យាសាស្ត្រ និងបច្ចេកវិទ្យា ។
លោកបន្ថែមថា ៖« ក្នុងរយៈពេល១០ឆ្នាំខាងមុខ ការកែច្នៃកសិផលរបស់វៀតណាម ត្រូវតែស្ថិតក្នុងចំណោមប្រទេសដែលមានវិស័យកសិកម្មអភិវឌ្ឍន៍ជាងគេទាំង១០ លើពិភពលោក » ។
លោកនាយករដ្ឋមន្ត្រីរូបនេះបានស្នើដល់រដ្ឋមន្ត្រី និងភ្នាក់ងារដទៃឲ្យបន្តធ្វើកំណែទម្រង់រដ្ឋបាល ជាពិសេស ដំណើរការទាក់ទងនឹងការប្រើប្រាស់ដី, កាត់បន្ថយដំណើរការរដ្ឋបាលក្នុងវិស័យកសិកម្ម និងតំបន់ជនបទ ប្រមាណ៥០% ខណៈកាត់បន្ថយភាពសាំញ៉ាំនៃដំណើរការបង់ពន្ធ ។
លោកក៏បានស្នើឲ្យលើកកម្ពស់ការដាំដុះមានគុណភាពខ្ពស់ និងជំរុញការប្រកួតប្រជែង ដោយផ្តោតសំខាន់លើផ្នែកធំៗចំនួន៣គឺ បន្លែ ការនេសាទ និងរុក្ខជាតិឱសថ ។
ការលើកកម្ពស់ការធ្វើពាណិជ្ជកម្មដោយផ្តោតសំខាន់លើប្រទេសចិន សហរដ្ឋអាមេរិក និងសហភាពអឺរ៉ុប ក៏ជាកិច្ចការមួយត្រូវធ្វើដែរ។ លោកបានស្នើឲ្យបង្កើនប្រាក់កម្ចី ដែលមិនចាំបាច់ដាក់វត្ថុបញ្ចាំសម្រាប់បុគ្គល ឬគ្រួសារណាដែលចូលរួមធ្វើកសិកម្ម និងបង្កើនចំនួនអ្នកអាចទាញអត្ថប្រយោជន៍ពីគោលនយោបាយឥណទាន ក្នុងវិស័យកសិកម្មប្រើបច្ចេកវិទ្យាខ្ពស់ ។
យោងតាមក្រសួងផែនការ និងវិនិយោគ គឺមានក្រុមហ៊ុនជាង៤៩.៦០០ បានវិនិយោគក្នុងវិស័យកសិកម្ម និងបានបង្កើតការងារប្រមាណ៤.៥០០កន្លែងឯណោះ ។
កាលពីឆ្នាំមុន ផលិតផលកសិកម្មចំនួន៩ ប្រភេទអាចរកប្រាក់ចំណូលដល់ប្រទេសបានជាង១ប៊ីលានដុល្លារ រួមមាន ផ្នែកនេសាទនាំចេញបាន៨,៣ប៊ីលាន, គ្រាប់ស្វាយចន្ទីនាំចេញបាន៣,៥ប៊ីលាន, ផ្លែឈើនិងបន្លែ នាំចេញបាន៣,៥ប៊ីលាន, កាហ្វេនាំចេញបាន៣,២៤ប៊ីលាន, អង្ករនាំចេញបាន២,៦ប៊ីលាន និងម្រេចនាំចេញបាន១,១ប៊ីលានដុល្លារ ៕
ចែករំលែកព័តមាននេះ